O le Aso Tofi na te’a nei na tula’i ai i luma o le Fa’amasinoga Fa’aitumalo le afioga i le Alo Salamasina ia Satele Galu Satele, ma ni isi o matai se to’alua mai le afio’aga o Vailoa, ona o se fa’alavelave o lo o tu’uaia ai i latou, i le fa’aleagaina o meatotino a se isi tagata.O lo o ta’ua i fa’amaumauga a le fa’amasinoga, le fa’amatala e Satele i le leoleo sa su’esu’eina lenei mataupu e fa’apea, o ia sa fa’atonuina isi ali’i e to’alua o lo o tu’uaia fo’i i lenei mata’upu, ia fa’aleaga se tu’ugamau a le aiga o le tagata o lo o a’afia i lenei mata’upu. Na ta’ua e le ali’i o lo o a’afia i lenei mata’upu, i leoleo, sa le’i fiafia le kovana fa’aitumalo, i le maualuga o le fale sa ia fuafua e fau mo le tu’ugamau o lona tua’a.Na ta’ua fo’i e lenei ali’i, sa fa’ailoa atu e Satele ia te ia, o ia sa fa’atonuina tama e o atu e fa’aleaga le fale o le tu’ugamau.O ali’i e to’alua o lo o tu’ua’ia fa’atasi ma Satele i lenei mataupu e aofia ai le ali’i pulenu’u o Muliaga Muliaga Jr ma Popese Tupea.O Satele o lo o tu’uaia i le moliaga mama o lona fa’atonuina lea o nisi e soli le tulafono, ae o Muliaga ma Tupea o lo o tu’uaia i moliaga mama ta’ilua o le fa’aleaga meatotino i le tulaga lua ma le tu fua i le fanua o se isi tagata, e aunoa ma se fa’atanaga.Na te’ena uma e i latou nei tu’uaiga a le malo ina ua tutula’i i luma o le Fa’amasinoga Fa’aitumalo i le Aso Tofi na te’a nei, ma ua fa’atulaga ai loa le isi a latou iloiloga e faia i le aso 17 Novema.A’o tatala ai i tua i latou nei, ua poloaina e le fa’amasinoga i latou ina ia aua ne’i o latou toe taumafai e fa’afeso’ota’i le ali’i o lo o a’afia i lenei mataupu i so’o se auala, pe toe tutu ai i le fanua o lenei ali’i, ae ia tausi le filemu i taimi uma.O le ali’i loia ia Tala Uiagalelei o lo o tula’i mo Satele, ae o le ali’i loia fautua ia Mike White o lo o tula’i mo Muliaga ma Tupea.