Ads by Google Ads by Google

Tufaina Fa’ailoga Ausia Sui Vasega Fa’ai’uaso ASCC

O le ulua’i fa’atasiga a le Fanau Fa’au’u e to’a 128 a le Kolisi Tu’ufa’atasi mo lenei afa tausaga na faia lea i le falea’iga a le Famous Restaurant i Tafuna, ina ia taumafai fo’i Fa’auluuluga o Kosi ‘Ese’ese o tau’avea i le Kolisi e saili i latou ua silisili a latou taumafaiga e taua’ao i ai latou fa’ailoga ma tusi pasi e fa’amauina ai a latou taumafaiga i lenei tausaga a’oga.

I le amataga o le fa’amoemoe sa tula’i ai le susuga Toeafoa Apisaloma e avea ma fofoga o le fa’atasiga i lea afiafi, ma ia tofia ai se tasi o sui o le laulauatofi a le Sosaiete a le Fanau A’oga i le Kolisi, Donna Maifala, e na te ta’ita’ia le latou afiafi fesilasilafa’i i se tatalo.

Ina ua mae’a sa ia fa’ao’o le avanoa i le Peresetene o le Matai Alumni Association - po’o le Sosaiete a Tama ma teine tuai a le Kolisi mo latou fa’ailoga togia mo le fanau fa’au’u.

O le ulua’i fa’ailoga na taua’aoina atu o le fa’ailoga mo Mataupu Fa’asaeanisi ma e taua’aoina lea ua togisilia i lea mataupu. Na maua lea e le susuga Joy Ta’ala.

O le fa’ailoga o le Gagana Peretania po’o le Igilisi na maua lea e Teuilafestival Lemisio.

O le fa’ailoga o le Gagana Samoa na mauaina lea e le susuga e Toetu Peau, ae o le fa’ailoga i le Mathematics po’o le numera na mauaina lea e Belinda Lam Yuen.

Na soso’o lea ma le tutula’i o le fa’auluuluga o le Kosi o Mataupu ma Tomai Fa’a-Pisinisi Dr Faofua Va’apu’u Fa’atoafe, ma sa ia fa’afetaia le fanau mo se tausaga o lu’iga ma ua avea ma tausaga o fa’amanuiaga i le fanau sa tau’avea mataupu fa’apisinisi. “Ua iloga mai, o se tasi o le tatou vasega ua ia mauaina fo’i togi maualuluga, ma e to’atele ai fo’i le vasega o fanau o maualuluga togi i lenei tausaga i le tatou vaega. O fua nei e mafai ona matou fuaina i ai le aoga o se matou galuega o fai, po’o mafai fo’i ona tatou galulue fa’atasi i le tulaga tau a’oa’oga.”

O nisi na latou maua fa’ailoga fa’apitoa sa ia tolaulauina ai le to’a 8 o i latou:

Ruby Afamasaga, Fa’atumu Enele, Lully Hunkin, Vaega Letufuga, Michael Afutu, Tapuva Siva, Saipele Tofiga ma Leva’ula Fa’alogo.

E i ai le fa’ailoga fa’apitoa na saunia fo’i e lea vaega ina taua’aoina lea i se tama po’o se teine a’oga e sili ona fa’atuatuaina, ofo mai lana fesoasoani i taimi uma, maumaua’i i a’oa’oga fa’apisinisi, ma ua lelei fo’i ona togi i mataupu uma fa’apisinisi, o lea sui na lautogia ai Ruby Afamasaga ma taua’aoina fo’i lana fa’ailgoa tupe ma lona tusi pasi fa’apitoa lea. O tusi pasi fa’apitoa fo’i na taua’aoina atoa i le to’afitu muamua fa’atasi ma latou teutusi o meaalofa tupe mo i latou uma.

Na soso’o lea ma le tutula’i o le vaega o lo’o va’aia fa’apitoa Tamaiti ua ausia togi maualuluga i Mataupu o lo’o latou tau’avea i le a’oga po’o le “Phi Pheta Kappa.”

Ua fa’ailoa mai e to’a 23 sui totino o le latou lea sosaiete ma o le a taua’aoina lava latou tusi pasi o le auai i le sosaiete lea i le tausaga o lo latou fa’au’uga. Perita’i e tolu fa’ailoga fa’apitoa na latou fia taua’aoina i fanau ua tulaga ese mai fo’i latou taumafaiga e ala i a’oa’oga ma mataupu sa tau’avea, le fa’amaoni ma le amio lelei, ae maise ai le mau fa’atuatuaina i so’o se taimi.

O Sophia A’asa  na lautogia mai le vaega o a’oa’oga o mataupu fa’apisinisi, Roseanne Felise mai le Liberal Arts ma Kristine Vailolo lea e tau’avea mataupu tau su’etusi ma tausitusi.

O le avanoa na soso’o ai o le vaega lea a le Fine Arts, ma sa tutula’i ai le susuga Kuki Tuiasosopo. Na saunia fo’i e lea vaega o a’oa’oga le latou fa’ailoga fa’apitoa e tasi e taua’aoina atu ma sa agava’a ai le tama’ita’i o Sophia A’asa.

O le vaega o a’oa’oga i Mataupu fa’a-Tekonolosi [TTD] na tutula’i ai se tasi o ali’i faia’oga i lea vaega, ma ia taua’aoina se fa’ailoga fa’apitoa i le susuga Misitana Fosi. O ia lea o lo’o tau’avea a’oa’oga fa’apitoa i le Auto Mechanic, ma o se taimi muamua lea i le 20 tausaga ua te’a, ua fa’ato’a maua ai e se tasi mai lea itu o a’oa’oga fa’apitoa ona maua lea fa’ailoga.

O fa’ailoga na soso’o ai o fa’ailoga ia sa saunia e le Student Government Association.

Tofusia ai le Komiti Fa’afoe o lea Sosaiete ma le fa’ailoga na saunia e le latou ta’ita’i o Maxine Tuiolemotu ma lana vaega atoa i le lato Ofisa. Na taua’aoina nei fa’ailoga o nai teutusi fa’amanuia, o tusi pasi ma Plaque: Sui Peresetene Donna Maifala, Teuilafestival Lemisio, Miracle Sene le Failautusi, Tofi Coffin, Teuila Tuilagi, Ioane Amituana’i, Sala Ta’ase, Jennifer Revaluka, Victoria Fano ma Noelene Afalava. Peita’i o fa’ailoga fa’apitoa e lua na saunia sa taua’aoina lea ia Teuilafestival Lemisio ma Donna Maifala.

Ina ua mae’a ona tolaulauina nei fa’ailoga uma e tele, sa fa’atasia uma i latou na auai i lea sauniga e tufatufaina ai fa’ailoga o le vasega fa’au’u a le Kolisi Me 18, 2012 i le ‘aiga fiafia na saunia atoa e le pulega o le Kolisi Tu’ufa’atasi o Amerika Samoa.