O le autu moni o suiga e pei ona fuafuaina i le tulafono tau palota, e pei ona fa’amalamalama e le Komesina o Palota i luma o le Senate ananafi, ina ia mafai ai ona taugofie le auala e faatautaia ai palotaga a le atunuu, ma aveese ai faiga e ono fa’alavelave ai i tagata palota, i le taimi e fa’aali ai a latou aia e palota ai mo le sui ua latou filifili e agava’a i le tofi.

Saunoa le tofa Tuaolo M. Fruen i se iloiloga sa valaauina e le Komiti a le Senate i le taeao ananafi, o suiga e fa e pei ona taua i totonu o le tulafono lea ua i luma o le fono, na afua mai i se fautuaga mai le alii kovana ia Lolo Matalasi Moliaga ina ua fa’atoa tofia o ia e avea ma Komesina o Palota, i le sailia lea o se auala e fa’a faigofie ai palotaga a le atunuu.

O le to’atele o le komiti a le senate sa maua avanoa e saunoa ai i lenei mataupu, sa latou fa’aalia lagona e lagolago ai suiga i le tulafono, sei vagana ai lava le suiga lona lua lea e fa’asa ai ona toe fai ni BBQ e latalata i le fale fai palota, ma le suiga lona fa e fa’asa ai faiga fa’atosina po o vaega ia e taua o meaalofa e afua atu ona o tu ma agaifanua a Samoa.

Saunoa le afioga Mauga Tasi Asuega e fa’apea, e tatau ona matua manino lelei po o fea tonu vaega e tatau ona fa’asa ai BBQ ona toe fai i aso o le palota, ina ne’i avea ma mataupu e vevesi ai tagata o le atunuu.

Mo se fa’ataitaiga e pei ona fesili le afioga i le Maoputasi, afai e fia fai sana BBQ i lona maota i Pago Pago, ae o le maota fo’i lea o lo o avea ma fale fai palota, pe fa’amata la e a’afia o ia i lalo o le tulafono.

Saunoa Tuaolo e fa’apea, afai e manao le sui tauva e fai sana BBQ, e manaia pe afai i lona fale, ae o suiga o le tulafono lea ua manino, e fa’asa autafa o fale palota ona toe fai ai ni BBQ i le aso o le palota, ona ua avea lea ma itu ua faigata ai i tagata palota ona filifili tonu po o ai e palota i ai, ona ua tau fai faafesaga’i fale ie BBQ i tafatafa o le fale e fai ai le palota.

Saunoa Mauga e fa’apea, e taua le pili, ae o le suiga lea e aafia ai tulaga i le aganu’u, e tatau ona toe taoto atu sei fetufaa’i i ai le maota, ona o mataupu faapenei e aafia ai le aganuu, e le tatau ona vave vave i ai se faaiuga.

Ae na saunoa le afioga Soliai Tuipine Fuimaono, o se tasi ua tele tausaga o avea ma Komesina o Palotaga, e leai se mafuaaga e tau toe talanoa ai fua le maota i suiga o le tulafono, ona o suiga lava ua leva ona i ai, pau le tulaga e tatau ona fai o le pasia lea o suiga e pei ona tuuina mai i le tulafono.

Na taua e Soliai lona lagolagoina o suiga e pei ona taua i le tulafono, ona o se auala lea o le a mafai ai ona faa taugofie faiga palota i le atunuu i le lumana’i.

Sa ia taua fo’i e fa’apea, e lelei lava i le tagata e manumalo i le palota le tulaga taugata o le faatupeina o le palota, ae o le tagata pito sili ona mafatia o le tagata faiaina.

Ua manatu le komit a le Senate e faia ni suiga laiti i le pili ona faatoa faia lea o lana faaiuga o le tino atoa o le pili.