E ui i le pisi sa i ai le malo i lana sa’iliga ta’ita’i, ae le’i fa’avaivai ai matua, ae maise ai loto o Fanau Aoga a le atunu’u i lo latou fia fa’ao’o pea o latou polokalama fa’ataoto e masani ai ona fa’atino i “Aso Fa’afetai” ta’itasi.

Lea ua tula’i mai le vasega o faia’oga ma pulega o a’oga uma i le teritori, e fa’atautaia latou “Aso Fa’asamoa i nisi, o polokalama a NHS ma JROTC i nisi, o Tamo’ega tauva mo le Turkey i nisi, o polokalama o le Safety i nisi a’oga, ae o isi ua faia ai le latou polokalama masani o le avatu i fua o fa’ato’aga mo a latou fa’aaliga o mea’ai eseese, ma ua mafai ona tufaina mo so’o se tasi e fia tausami ai pe a mae’a fa’aaliga a le fanau.

Po’o le a lava le sauniuniga ua fa’atino i totonu o a’oga, e fa’afetaia le agaga ua afua ona faia ai, aua e tatau lava ona tatou maua le agaga fa’afetai mo mea ua tatou maua i lea aso ma lea aso. O le ola fo’i ma le malosi, fa’afetai lena e si’i i le Atua.

Mai le itu i sasa’e, ua fa’ailoa mai o lo’o malolo le a’oga i Matatula, ona o lo o i ai se fuafuaga mo se polokalama tele o le Kerisimasi e fa’amae’a i ai galuega fa’atino a le fanau, ma tufatufaina ai fa’ailoga ua ausia e latou i a’oa’oga.

Ua fa’asolo mai i Faga’itua, ua iloga mai o lo’o faia le polokalama fa’apitoa a le JROTC i a latou foa’i o mea’ai ma mea e fa’aaoga i totonu o aiga. O le a masi’i le vasega atoa lea e fa’ao’o nei mea’ai ma nisi mea e aoga i le lotoifale mo aiga ua matauina e i latou, o lo’o tele le mana’omia o i ai! Ua vala’auina le tatou nusipepa latou te fa’amauina mai lenei fo’i aga o le alofa tula’i ma le agaga foa’i o le fanau a’oga ma o latou ta’ita’i i lea polokalama.

O le maga lua o le gaoioiga i Fagaitua High, ua tapena ai fo’i le Sosaiete a le NHS togi maualuluga i mataupu, o le a latou tu’ufa’atasia ni latou foa’i e fa’aaoga e i latou o lo’o tausia fa’apitoa i le Hope House i Fatuoaiga. A mae’a tu’ufa’atasia loa lenei saoga, ona fa’ato’a masi’i lea o faia’oga ta’ita’i ma le vasega o fanau a’oga i le NHS e fa’ao’o i Fatuoaiga lea foa’i taua.

I le a’oga i Peter Tali Coleman School i Pago Pago, ua fa’ailoa mai e faia fo’i le latou Safety Fair e pei ona masani ona fa’ataunu’u i lenei fo’i vaitaimi, ma e faia ai fa’aaliga a vasega ta’itasi, e amata mai a latou toniga e o’o lava i o latou sao e fa’atino e fa’ailoa ai, e ao ina mautu le “Saogalemu o le Fanau A’oga i taimi uma a’o a’oa’oina.”

O’o mai lea i tama ma teine o le Sharksville i Utulei, le Samoana High, ua fa’ailoa mai e matua malolo lelei i latou. “Ua leai se polokalama o manatu Samoana e fa’atautaia, ina ia sologa lelei le fa’agasologa o le Palotaga o Ta’ita’i o le Malo, a mae’a malolo lelei ona o le tausiga lava o le saogalemu a’ia’i o le fanau a’oga.”

Ua fa’asolo atu aga’i i Nu’uuli, ua tula’i mai le Pusi Aivao Fe’ai ma fa’ailoa mai, “E faia le matou Aso Fa’asamoa! E le malolo le Wild Cats e tatau ona fa’atino mea lelei uma lava! Faia le masani, fa’atino tu ma agaifanua a Samoa e tiu ai i lenei vasa!” Matua ma Aiga, sapai le agaga fa’afetai o le Nuuuli Polytech High ua latou taumafai ai e fa’afo’i le fa’afetai i le Atua i lenei Aganu’u Matagofie ua tatou “sapi ai ma sa’a i ma’a o malie i le olaga nei.”

O le a’oga la’ititi a Manulele Tausala, ua le vaivai fo’i Nuuuli, ae ua faia le masani, o le tauvaga faitoto’a teuteuina, o le tauvaga laulau ua mae’a fa’atumuina i mea taumafa matagofie mai fua o fa’aeleeleaga a le atunu’u, o mea ia e fa’afetaia ai e Samoa lava latou, lo tatou Atua i lona a’ao foa’i i le tausiga fa’aletino o tatou tagata.

I le a’oga tele a Tafuna High le Laumua o le Toa, e le o malolo fo’i, ua fa’atulaga a latou ta’aloga e faia, o ta’aloga nei e masani ona faia e le atunu’u e aofia ai tosoga maea, lape ma isi mea e fa’afiafia ai le fanau, ia mautu le agaga fa’afetai ia i latou i le malosi ma le ola so’ofa’atasi ma uso i lenei olaga.

Ua fa’apena fo’i le tapenaga a le a’oga a Lupelele Elementary, ua fa’ailoa mai, ua mautu le latou fa’amoemoe e faia le latou lotu tu’ufa’atasi i le taeao, a mae’a loa ona fa’ato’a faia lea o le latou aso o Ta’aloga, ma faia ai le ‘aiga o le aoauli, ma ta’ape ai le fanau.

I le a’oga i Midkiff Elementary i Leone, ua fuafua e faia le latou Aso Fa’asamoa, ma ua matua mafuli fo’i matua ma aiga e sapaia lea fa’amoemoega lelei, ua masani ai Midkiff i lea lava polokalama i lenei fo’i vaitau. Peita’i o le a’oga Maualuga, ua fa’atulaga le latou Turkey Run masani lea e fa’apea e 10km le mamao o le tamo’ega lea, e alausu i ai le fanau i le ta o le 4:30 i le vaveao, ma afai ae mae’a ona tufaina lea o le Turkey mo i latou e manumalo.

O le mea moni ua mautu mai, e vave ona tu’ua le fanau a’oga, ma e tatau fo’i ona nofouta i ai matua i lea tulaga, ina ia vave va’aia fanau i lo latou tu’ua mai.

Ia manuia le Aso Fa’afetai i Aiga uma o Amerika Samoa, ae ia silisili ai ona tatou si’i fa’atasi le fa’afetai i le e Ao i ai mea uma, le Atua na ia foafoa lenei lalolagi mo i tatou e tatou te ola ai!

tusia: Leua Aiono Frost