Ads by Google Ads by Google

Tuai ave tua tino maliu i le tau fa’ataliga o tupe Inisiua

O se tasi o mafua’aga e ala ai ona tuai le ave’esea o nisi o tino maliu mai i le fale maliu i Fagaalu, ona o le fiu e fa’atali o tupe e maua mai i kamupani inisiua mo i latou ua maliliu.

O lea manatu na fa’aalia e se tasi o tama i luga o le polokalama a le alii kovana.

Na taua e le tama lea e fa’apea, o se fa’afitauli na tulai mai i le maliu o se tasi o ona tua’a, na mafua ai ona tuai ona ave’esea mai lona tino maliu mai le falemai i Faga’alu, ina ua alu atu ma le pepa mai le kamupani Inisiua e fai ai sana nonogatupe i le faletupe, a’o fa’atalitali ai le taimi e maua mai ai le tupe mai le kamupani Inisiua, ae fa’ailoa ane e le pule o le faletupe ia te ia, latou te le taliaina ni pepa mai ni kamupani Inisiua e fa’amaonia ai lana nonogatupe.

“Fai mai le pule o le faletupe ia te a’u (e le’i ta’uina le igoa o le faletupe), o pepa mai le kamupani Inisiua e gata lava i le kamupani Inisiua, e leai se aia a le faletupe i ai, e le mafai foi ona fa’amaonia ai la’u nonogatupe,” o le tomumu lea a si nei tama i luga o le polokalama a le kovana.

O le molimau foi lea a se tasi o alii sa fesiligia e le Samoa News i le vaiaso nei e uiga lava i lenei mataupu.

Na taua e le alii lea, sa tulai foi ia te ia ma lona aiga le fa’afitauli lea, ina ua le talia e le faletupe le pepa mai le kamupani Inisiua e fa’amaonia ai le aofa’i o le tupe lea o lo ‘o fa’amoemoe e maua mo le tagata ua maliu.

“O le mea na tupu, na i’u ina tigaina ai a’u ma lo’u aiga e totogi vaiaso e 4 na taofia ai le tino maliu o lo’u tuaa i le falema’i,” o le fa’amatalaga lea a le alii lea i le Samoa News.

Na ave se fa’atalosaga a le tootoo i le alii kovana, mo se auala e mafai ai ona fesoasoani le malo i le fa’afaigofieina o nonogatupe i le faletupe, ina ia aua ai ne’i toe tulai mai le fa’afitauli lea.

Na ta’ua e le alii kovana e fa’apea, na mafua le fa’afitauli lenei ona o ni isi sa tu’uina atu i ai e le faletupe la latou fa’atuatuga i tausaga ua tuana’i, e talia ai le fa’aaogaina o aiaiga mai se kamupani Inisiua (policy) e fa’amaonia ai a latou nonoga tupe, e fa’atalitali ai le taimi e maua mai ai tupe mai le kamupani Inisiua mo le tagata ua maliu, ina ia mafai ai ona toe totogi le nonogatupe.

“O le faafitauli ua tulai mai, ua uma ona talia nonogatupea le isi au alii, ona fiu ai loa lea  o le faletupe e faatalitali le toe totogiina atu o le nonoga tupe, ma ua oo atu lava i le tai 5 i le 6 tausaga o taumafai lava le faletupe e tulituli le au alii muamua ia,” o le saunoaga lea a le alii kovana.

Na fa’amaonia foi e Togiola e fa’apea, ua le toe talia e faletupe i totonu o le atunu’u le fa’aaogaina o aiaiga mai kamupani Inisiua ona o mea sa tutupu i aso ua mavae, peitai o lona fa’anaunauga o lo o i ai, talosia ia i se auala e mafai ai ona toe talanoa pulega o faletupe ma le malo, ina ia maua ai se isi fesoasoani mo le atunuu.

“O lo’u lava lea faanaunauga, talosia ae i ai se auala e mafai ai ona matou malilie faatasi ma faletupe ina ia foia ai le faafitauli lea, aua o le isi lea faafitauli ua tulai mai, ua avea le le taliaina o nonogatupe i faletupe ma itu ua ta’i masina ai o faatalitali nai aiga mo nisi fesoasoani e aumai ai i tua o latou tama poo tina ua maliliu, ma ua tau oso atu ai ma lo’u alofa ina ua tula’i mai lea faafitauli, ae ua mafua lava ona o le au alii ia na muamua,” o le saunoaga lea a le alii kovana.