VAEGA 28

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau I lenei auaunaga vaivai.  Ae ia se’e maia i ou se’etaga malu, se’i toe soso’o atu le tatou Fagogo.

******************************

Ua savali ese le alii o Iosefa mai ia Tavita ma Tepora ina ua uma ona ia fautuaina Tepora e aua ne’i ona talitonuina se tagata ua leva na la masani, ae o le taimi lea ua na o le tutu o Tavita ma Tepora ma faataupupula atu ia te ia.

Ua talitonu Tavita, e iloa e Iosefa le tagata na fasiotia Rasela ma Tina, a le o lena, o Iosefa sa fasiotia mafine nei e toalua.

“Aisea ua e masalomia ai Iosefa?” o le fesili atu lea a Tepora ia Tavita.

“E iai lo’u masalosaloga, e mafua ona o Tupe,” o le tali lea a Tavita.

“Ae manatua foi tala a nai tina ma tama matutua ia sa faamatala e uiga i le tagata lea na latou talanoa e uiga i le kamupani teu tupe lea ua ave ai a latou tupe?  E ‘etu lona vae.  E le o leaga le vae o Iosefa.  E leai sana ‘ava ma sana tioata,” o le tala lea a Tepora.

“O na mea uma, ua na o ni teuga e faasese ai le tagata,” o le tali mai lea a Tavita.

O le taeao na soso’o ai, na matua’i fa’ate’ia lava Tavita, ina ua tago atu e faitau lana nusipepa, o lo o sau ai le faamatalaga e uiga i le faalavelave na tupu ia Rasela ma Tina.  Ae o le itu na sili ona faate’ia ai Tavita, o lo o iai ma le faamatalaga e uiga i uati ia na maua i luga o tino maliliu o nei tina, ae o lo o tusia ai le igoa o Tavita i luga o nei uati.

Ua pupuna ifo le toto vevela i totonu o Tavita ma ia tulai i luga ma faasasa’o atu loa i le ofisa nusipepa ma na faate’ia le Faatonu o le Nusipepa ina ua tatala atu e Tavita lana faitotoa.

Na pei e oso i se niu le alii o Anitele’a, le Faatonu o le nusipepa, ina ua tepa mai i luga, o lo o tu atu ai Tavita i le faitoto’a.

E na o le tasi lava le fesili a Tavita ia Anitele’a, “Na faafefea na e iloa e uiga i uati?”

Sa le i tali Anitele’a i le fesili a Tavita, ae ua ia faapea mai, “E moni mea uma sa lomia.”

“O lona uiga e moni le faamatalaga sa ou uo ma mafine uma e lua i le taimi na maliliu ai?” o le fesili lea a Tavita ma amata ona la’a atu aga’i ia Anitele’a.  Ae o le taimi lea ia Anitele’a, ua tu i luga ma autilo solo pe iai se mea e mafai ona sola aga’i iai, pe o se mea e mafai ona ia fa’aaoga o se auupega.

“Ou te iloa o lena e te silafia, e pepelo au tala ia e lomia i lau nusipepa, a ea?” o le fesili leo lemu lea a Tavita.

E le i atoa le lua o la’a a Tavita, ae lele mai i totonu o le potu ia le tamaitai o Tepora.  Na faate’ia Tavita ma Anitele’a, i le tauselasela atu a Tepora ma taofi mai le lima o Tavita ma faapea atu, “Aua, e maimau ai fua lou taimi.”

“Na faafefea na e iloa, o lea ou te i’i?” o le fesili atu lea a Tavita ia Tepora.

“Na ou faitau atu loa i tala pepelo a le alii lea o lo o lomia i lana nusipepa, o’u iloa loa ua e sau i lona ofisa,” o le tali mai lea a Tepora.

E manatua foi e le tatou au faitau, o le fale lomitusi po o le nusipepa lea, o lo o lolomi ai foi tusi a Tepora.  Ma ua faapea atu nei Tepora ia Anitele’a, “Ua matua’i o’u le faatuatuaina lau kamupani e toe lolomi ai ni a’u tusi.”

Na pei e tui e seisi le fatu o Anitele’a i se naifi ma’ai, i le tala a Tepora, aua ua silafia lelei e Anitele’a, le tele o ana tupe maua, i le tele o tusi a Tepora, ia e lomia e lana kamupani.

“Se aua e te faapena Tepora,” o le tau faaoleole atu lea a Anitele’a.

E FAIA PEA!