Tu’umalo se tasi o afioga i Senatoa
O le aso 3 o Aokuso, 2013 na te’a nei na tuua ai le malo e le afioga i le ali’i Senatoa ia Letuligasenoa Soli, i lona aiga i Orange County i Kalefonia i le 80 tausaga o lona soifua.
O lea tala faavauvau ua lagona ai e le aiga o le afioga i le ali’i Senatoa i Iliili le faanoanoa ma le misia o ia, ona e le gata o ia sa avea ma Sa’o o a lona aiga ae o ia sa fai ma vaaiga i le nuu ma le itumalo.
“O se tala faanoanoa lenei tala ina ua maua le tala i le maliu o si o’u tuagane, ma ua misia ai o ia i le matou mafutaga, o ia o se tama e alofa ma naunau i lona aiga, nuu ma le ekalesia,” o le saunoaga lea a le tuafafine o le ali’i Senatoa, le faletua ia Pamata Letuligasenoa Malae i se faatalatalanoaga ma le Samoa News i le taeao ananafi.
Na taua e Pamata e faapea, o Letuligasenoa na malaga i Kalefonia e asi lana fanau ma alu i lana talavai, ma le tuutuuga e tatau ona toe fo’i mai a’o le’i toe tauaofia le fono mo lana tauaofiaga lona lua e pei ona tatalaina i le aso 8 Iulai, 2013, ae ina ua siliga le taunuu mai o le ali’i senatoa i le aso e pei ona fuafuaina, o iina na iloa ai loa e lona aiga i Iliili, ua tigaina le gasegase o le ali’i Senatoa.
Na taua e Pamata i le Samoa News e faapea, ina ua faailoa e le falema’i i le fanau a Letuligasenoa ua tigaina tele le gasegase o le latou tamå, na mana’o ai loa le ali’i Senatoa e ave o ia i lona aiga se’i o latou mafutaga ma si ana fanau, ma e tuumalo o ia o lo o mafuta ma si ana fanau.
O le afioga a Letuligasenoa ua maliu lona faletua ae o lo o soifua mai pea i le taimi nai ona alo e to’a ono, to’a sefululua fanau a lana fanau, ae to’a 4 fanau o fanau a lana fanau.
O le afioga fo’i ia Letuligasenoa na aoaoina i le aoga a Malisi ma galue ai o se faiaoga i le aoga a Feleti School mo sina taimi, ona ia tuua lea o lona aiga ma le atunuu ae tautua i le vaega a le Navy.
Ina ua malolo litaea o ia mai le Navy, na toe taliu mai i le atunuu na galue i le Fono Faitulafono, mulimuli ane loa filifilia o ia e lona itumalo i le masina o Tesema 2012 na te tauaveina le tofi Senatoa mo le itumalo i le maota maualuga a le Fono mo le isi fa tausaga.
Sa avea o ia ma Ta’ita’ifono o le Komiti o Femalagaaiga/Pulega o Uafu ma Taulaga a le senate.
“O le a matua misia o ia e lona aiga, o ia o se tama e loto alofa ma agamalu, o se tasi fo’i sa fai ma vaaiga mo i matou uma o ona tuafafine ma uso, faapea ai lana fanau ma le aiga atoa,” o le molimau lea a Pamata e faatatau i lona tuagane.
O le a toe fofogaina atu se polokalame mo le taimi e taunuu mai ai i le atunuu le Sa o le afioga i le ali’i senatoa mai Kalefonia, le nofoaga o lo o i ai uma lana fanau ma le toatele o lona aiga.
O se tasi lenei o tala faanoanoa i totonu o le Fono Faitulafono aemaise ai le maota maualuga o le Senate, ona o le to’atolu ai lea o afioga i Senatoa o le nofoaiga lenei lona 33 a le Fono ua maliliu ae latou nofoia tofi o a latou itumalo.
O le afioga ia Faagata Mano Faagata na tuumalo i le masina o Iuni, sosoo ai le afioga i le ali’i senatoa ia Sua Vaiuli Matautia i le masina na te’a nei, ae o le afioga ia Letuligasenoa i le vaiaso na te’a nei.
faaliliu Ausage Fausia