O le afiafi o le aso To’ona’i, Setema 5, 2015 na tu’ua ai le malo e le Fa’atina o le atunu’u, Lefagaoali’i Satele -Sunia, lea sa fautuaina lona ta’ita’i mo le 7 tausaga, o le la’ua auaunaga va’ava’alua ma le afioga le Kovana Sili Tauese Pita F. Sunia, mai le 1997-2003.

O lona tofi fautua, sa ia fa’ailoa i na taimi, “E le o se tofi e faigofie, e matua e tulivae i le Atua ona o le faigata o lea fo’i folauga i ala o faiva fa’atama a le Malo. E mo’omia lava le onosa’i i taimi uma, ma le fa’amuamua o fautuaga mai tagata, ae maise o le manatu i se mea e lelei ai le atunu’u atoa, ae na’o sina vaega.”

O se manatu lea ina ua lutaluta le tai o le folauga, i mataupu sa luga ma lalo ai faiva, a’o loma le palotaga lona lua a le la’ua nofoa’iga i le tausaga e 2000, ma sa fesiligia ai sona taofi e tusa o le la’ua tofi o ta’ita’i o le Malo.

Lea ua afemoe le tautua a le Fa’atina, ae sa va’aia pea, e le motusia lona naunau i lana auaunaga i le Atua e ala i lana Ekalesia sa tautua ai, Leone EFKAS i Siona Le Mauga Pa’ia. Na ofo o ia e fa’aauau lana auaunaga o le Tiakono mo lana ekalesia. Fai mai se tasi o ona alo, “O le mea muamua i le olaga o si matou tina, o lana auaunaga i le Atua e ala i lana Ekalesia ma ona tofi e fa’atino ai, soso’o loa ma le va’ai a Faga i ona aiga uma lava, ae maise i lona aiga i le Motu o Salafai.”

Mai lona soifua o se tasi na tupuga mai le mafutaga mafana a le afioga le Alo o Salamasina Satele Mosegi ma Mata’ia Avaiu Mauigoa - Satele i Vailoatai. Na a’oa’oina o ia i a’oga tulaga muamua i  Amerika Samoa ae na fa’au’u mai le Waipahu High School i Hawaii.

O lana galuega muamua i Amerika Samoa sa galue i le Matagaluega o Feso’ota’iga, peita’i e le’i umi ae ulufale loa i le A’oga Fa’atausima’i ma faigaluega ai o le Tausima’i Pasi i le falema’i.

Na fa’aipoipo o ia i le tofa Tauese Fuaileleo Pita Sunia i le tausaga 1969 ma na taliu mai i fanua ina ua mae’a a’oa’oga a le tama o le aiga i le tausaga e 1981 ma toe alaala i Leone. E to’avalu lana fanau, e silia ma le 20 o fanau a lana fanau, ae le faitulia ai le fanau sa ia tausia ma le fa’amaoni, o le to’atele o nei tama’ita’i ua fa’aigoaina latou fanau i lona igoa, e afua mai le motu tele i Salafai.

Ina ua taliu mai i la’ua na fa’atulaga loa o ia e va’aia le fanau, ma avea ma se tina tausi aiga.

I ana galuega fa’atino i lana auaunaga ma le afioga Kovana Tauese Sunia, sa ia fa’atautaia ai le polokalama faitau tusi a  le fanau: “Read to Me Samoa” ma isi ona vaega e lua “Character Count & Americorp - Fausia se Laumana’i Mautu.” Na ia fa’atula’ia fo’i le ‘Governor Sunia Memorial’ lea o lo’o ia tausia fa’apelepele i lona maota.

I lana tautua i lona aiga lautele, ua ia tau’avea ai mamalu fa’a-Sa’otama’ita’i o Aiga: “Lomialagi” mai lona aiga i Vaie’e, “Sina” mai lona aiga i Sato’alepai ma “Leilua” mai lona aiga Sa Satele i Vailoa. O lana auaunaga fo’i i ona aiga uma nei, e le fesiligia, aua e lotolotoi lava i so’o se mea e fai, ma e a’apa mamao fo’i ae a sona sao i ona aiga e ala i so’o se fa’alavelave.

“O se tina e osiosi i nai ona aiga, i so’o sona itu lava, e agaga o ia e fia fai aiga lelei, ma ua malaga lava o taumafai i lona lea faiva,” o se tala lea a se tasi o ona alo, Liaivasa Andrew Sunia.

“Ua misia o ia i le mafutaga ma le fanau, ae silisili ua misia fo’i o ia i le mafutaga a tina o lana ekalesia sa uia ai sana taulaga i lona Atua,” o se toe fa’apipi’i mai lea a Liaivasa e tusa o lona tina. Ua afemoe lana malaga i le 69 o tausaga o lona soifua.

Ua faailoa mai e faapea o sauniga mo lona aiga o Setema 20, 2015 i Vailoatai EFKAS ae o ona toe sauniga ia Setema 25 -26, 2015 i Siona le Mauga Pa’ia, Leone.