Ads by Google Ads by Google

Tu’umalo le afioga Senatoa Mailo Atonio

O le tuua ai o le malo e le afioga Mailo Atonio i lona maota i Fagatogo, i le itula e 9:00 i le po o le aso Lulu na tea nei, ua faamatalaina ai e nisi o taitai o le atunuu le avea o lona tuumalo o se auala ua misia ai e le malo, atunuu, itumalo, aiga ma ekalesia se tasi o poutu malosi i tulaga o le aganuu ma aoaoga.

Na maua le avanoa e fesiligia ai e le Samoa News se tasi o alo tamaitai o le afioga Mailo, o ia lea o Virginia Mailo-Filiga e tusa ai o le soifuaga galue ma le auaunaga na mafai ona ofo atu e le afioga Mailo mo lona aiga, itumalo, malo, atunuu ma lana Ekalesia.

Na taua e Mailo-Filiga, e ui i le pele i lona tuaa o lana auaunaga mo le malo, peitai sa laualuga i lona manatu lana tautua i le galuega a le Atua, e ala i lona galue ai i totonu o lana Ekalesia Katoliko i le afioaga o Fagatogo.

Na amata le soifuaga aoaoina o Mailo i le aoga a Poyer, sosoo atu ai ma Malisi, ma faaauau atu ai lava i le Kolisi o Sagato Iosefo (St. Joseph College) i Apia, ina ua maea, sa faaauau ana aoaoga i le Aoga o le Kolisi a Malisi i Kalaiesetete i Niu Sila.

Na sosoo ai ma le ulufale atu i le Iunivesite o Portland i se vaitaimi o le 1960 ma faauu mai ai faailoga o le Bachelor Degree in Liberal Arts ma le Masters in Education.

Sa galue o ia i le Matagaluega o Aoga a le malo, ma avea ai ma faiaoga mo le Aoga Maualuga a Samoana, a’o lei filifilia ai o ia e ave ma Puleaoga o le Aoga Maualuga a Leone mo ni tausaga.

Sa avea o ia ma Taitaifono o le Komiti Faafoe o Sikolasipi a le Ofisa o Aoga, i le taiimi lea sa na o le to’atasi lava le sui o lea komiti, ua na o ia lava, ma o ia foi sa filifilia fanau aoga e agavaa mo avanoa sikolasipi, ma o le to’atele o i latou ia na maua avanoa sikolasipi o loo umia nisi o tulaga maualuluga i totonu o le malo o Amerika Samoa.

Sa tautua foi o ia i le Faamasinoga Maualuga, mulimuli ane filifillia o ia e avea ma Faamasino Lagolago.

O le tausaga e 1942 na faasuafaina ai o ia i le suafa Mailo ma avea ai o le Sa’o o lona aiga.

O le tausaga e 2004 na filifilia ai o ia e fai ma sui o le itumalo o le Maoputasi #6 i le Maota Maualuga mo le tofi Senatoa, ma faaauau atu ai seia oo atu i le tausaga e 2008.

Ao tautua ai i totonu o le Senate, sa avea o ia o se tasi o tamalii na pulunaunau i le puipui maluina lea o measina ma le aganuu a Samoa, ao avea ai o ia ma taitaifono o le Komiti o  Mataupu Tau Samoa a le Senate, ma o se tasi o pili sa ia faaulufaleina i luma o le maota maualuga e lagolagoina ai lona faananau i le puipuiina lea o measina a le atunuu, o le faatulagaina lea o agavaa e mafai ai ona filifilia se tasi e avea ma Sa’o o lona aiga i totonu o le li’o o aiga Samoa.

Sa ia tusia foi le tusi o le Palefuiono vol #2, o le toe faaauauina mai lea o le tusi o le Palefuiono vol #1 sa tusia e lona tuaa o Mailo Saina Pio.

E ese mai i ona tiute faalemalo, sa tautua foi o ia i lana Ekalesia e pele i lona loto, le Ekalesia Katoliko, e pei ona avea ai o ia ma Taitaifono o le Puleaga a Samoa Pago Pago, o se tasi foi o totino o le Komiti o Aoga a le Ekalesia Katoliko.

O ia o se tamalii faipisinisi, o se tama alofa, o se faiaoga ao ia foi o se matai Samoa e puipui malu i measina a lona aiga, itumalo ma le atunuu.

O le a misia e le toatele le afioga Mailo i le tele o faataitaiga lelei sa ia faatulai mo lona aiga, itumalo, atunuu ma le ekalesia.

O loo soifua mai pea i le taimi nei lona faletua, le tina o Faava Matalena Mailo ma ona alo e to’a 7, o fanau a lana fanau a silia i le toa 20 faapea ai ma le to’atasi o se fanau, o fanau a se tasi o ona alo.

O le aso Faraile, 10 Fepuari ua faamoemoe e aumai ai tua mai le falemai i Fagaalu le Sa o le afioga Mailo, ma lagomau ai loa i lona oliolisaga tumau i lona aiga i Fagatogo lava, i le taeao o le aso Toonai, 11 Fepuari.

Ia faamaise le Agaga Paia o le Atua i aiga faavauvau ona o le valaau paia a le Atua i lana auauna.