E talitonu se tasi o tina, o le malosi o faaosoosoga a le fili poo le tiapolo foi lea ua mafua ai ona aafia nisi o fanau teine laiti i ma’itaga le fuafuaina, e ala i le faaosoosoina lea e le tiapolo o i latou o loo faia nei uiga mataga ina ia osofa’ia fanau laiti, aemaise lava i taimi e usu atu ai i latou i le faleaoga ae le’i taitai malamalama lelei le taeao.

O lea faasea mai se tasi o tina na faaleoina lea i luga o le polokalame a le alii kovana i le faaiuga o le vaiaso na te’a nei.

Na taua e le tina lea, o se tasi o faafitauli o loo ia maitauina, o le alu atu lea o le pasi aoga e piki mai fanau aoga ae le’i taitai ona malamalama le taeao, ona alu atu lea o le pasi ma tuu fanau i le faleaoga ae toe fo’i mai le ave pasi, ma maua ai loa le avanoa e osofaia ai fanau i le tiapolo, ma mafua ai loa ona tutupu faafitauli o loo aafia ai lo latou saogalemu.

Fai mai le tina lea, soo se taimi lava e alu atu ai le pasi aoga ae lei taitai ona malamalama, e le tuuina mai i ai lana fanau teine o mai ai, ae faatalitali lava sei malamalama lelei le taeao, ona faatoa momoli lea o i latou i pasi tua e saogalemu ai i latou.

“Ou te iloa ua to’atele fanau aoga ua lamatia lo latou saogalemu i tulaga e pei o le faiaiga faamalosi i ai o isi tagata, ona o le vave momoli o i latou i le faleaoga ae le’i malamalama le taeao, ma o nisi nei o tulaga e tatau ona silasila i ai le malo pe afai ae toe a’e aoga a le fanau i le kuata fou,” o le finagalo lea o le tina sa tuu atu i le alii kovana.

Sa ia taua foi, e le o popole le ave pasi i le saogalemu o fanau, pau lona manaoga ia faatino lana galuega o le momoli o fanau i le faleaoga tusa lava pe lei malamalama lelei e tuu ai lava ae toe liliu le pasi e piki mai isi fanau aoga.

Ae i le saunoaga a le kovana sili ia Togiola Tulafono na ia taua ai e faapea, e le tatau oina tuuaia fua le ave pasi, o le tiapolo poo le vave momoli foi o fanau i le faleaoga o le mafuaaga o faafitauli, aua e i ai lona talitonuga, poo a lava faafitauli ma faaosoosoga e oo i le tamaitai aoga, ae afai lava o se tamaitai ua maua’a lona faamoemoe ma lona talitonuga i aoaoga sa aoaoina ai o ia i totonu o lona aiga, tusa lava poo a faaosoosoga a le tiapolo e le mafai ona tosina i ai lona mafaufau.

“O le teineititi aoga lava ia ua maea ona tapena lelei lona olaga ma ua mautu le faavae sa faataoto e ona matua ma lona aiga, e le mafai ona toe manumalo i ai le tiapolo ma ana faaosoosoga,” o le saunoaga lea a le alii kovana.

Saunoa Togiola, o le 99% o le faasaoina mai o le saogalemu o fanau mai faafitauli, e afua mai i totonu o le aiga.

“E le mafai ona tatou tuuaia le tiapolo, poo le ave pasi, poo le taimi foi e le’i malamalama lelei le taeao, e le o le faiaoga, e le o se isi lava sei vagana ai lava matua ma totonu o le aiga, o iina e afua mai ai tulaga manuia ma le faaletonu o soo se fanau,” o le isi lea saunoaga a le alii kovana.

O le faafitauli o loo feagai pea ma le malo aemaise ai o le Ofisa o Aoga i tausaga aoga uma, o le le lava o pasi aoga faatasi ai ma le faatupulaia pea i luga o le aofai o fanau aoga.

Saunoa Togiola, o le taimi nei ua oo atu i le 14,000 le aofai o fanau aoga ua i ai ae na o le 30 pasi o loo tautuaina, afai la e faatusatusa i le toa 30 o le pasese a le pasi aoga i le malaga e tasi, o lona uiga e tatau ona 10 pe sili atu malaga a le pasi aoga i le taeao ina ia mafai ai ona momoli uma fanau aoga i faleaoga.

Na faailoa foi e Togiola i luga o lana polokalame e faapea, i tausaga uma lava na te taumafai ai lava e faasaosao se tupe ina ia faatau mai ai ni pasi aoga tai lua ina ia fesoasoani i le la’uina o fanau aoga.

O le faasea mai nisi o matua, ua tumu naua pasese a pasi aoga i taeao ma aoauli, ma ua tulai mai ai foi se popolega ia te i latou i le saogalemu o fanau pe a oo ina tulai mai se faafitauli i le pasi aoga.

Na taua e le isi tama le momomo o lona loto ina ua ia vaaia si ona atalii o loo tu atu i le ogatotonu o le pasi aoga i le taimi na usu ai i le aoga, ona ua tumu uma le pasi i tamaitai aoga.

Fai mai lana molimau i le alii kovana ma ona loimata, “afai nei e mu le pasi pe lavea faafuase’i, ailoga e mafai ona faasao mai le ola o si o’u atalii lea o loo tu i le ogatotonu o le pasi aoga.”