Tu’uaia tama’ita’i sa galululue Kamupani Inisiua fa’aaoga fa’agaoi tupe
E to’alua ni tama’ita’i sa galulue i le Kamupani Inisiua a Florance Saulo and Associates ua tu’uaia e le malo, i lo la fa’aaoga fa’agaoi lea o ni tupe sa tu’uina atu i lalo o le la vaavaaiga.
O i laua e to’alua e aofia ai Pricilla Tolei’u ma Herema Taupau, lea ua tu’uaia uma i le moliaga mamafa e tasi o le fa’aaoga faagaoi o tupe sa i lalo o le la vaavaaiga, ma o se solitulafono e mafai ona fa’asala ai se tasi i le toese mo le umi e le sili atu i le 7 tausaga, pe fa’asala foi i le salatupe e le sili atu i le $5,000, po’o le fa’asala foi i fa’asalaga uma ia e lua.
O se tusi na tuuina atu e le Peresetene o le Kamupani Inisiua ia Vui Florence Saulo, i le aso 7 Setema 2011 i le Ofisa o Leoleo e talosagaina ai se suesuega faasaga i lenei mataupu, na afua ai loa ona faagasolo le suesuega faasaga ia i laua e toalua ua tuuaia.
O le alii leoleo suesue ia Det. Vaina Vaofanua sa feagai ma le suesueina o lenei mataupu.
Na taua i faamaumauga a le faamasinoga, na maua e se tagata faigaluega a le kamupani inisiua ina ua ia siakiina faila o loo i ai uma lisi o taavale o loo Inisiua i le 2010, o loo i ai isi lisi e ta’i lua kopi o loo i ai i le faila.
Ona o lea tulaga, na fesiligia ai loa e le tagata faigaluega lea ia Taupau i le mafuaaga ua ta’ilua ai kopi o isi lisi, peitai na taua e Taupau, e i ai taimi e masani ai ona le i ai o ia i le ofisa talu mai le masina o Mati 2010, o le mafuaaga lena sa ia faia ai loa kopi mo lisi o ta’avale o loo inisiua i le latou kamupani, ma e i le va o le 20 i le 30 lisi sa ia faia kopi ta’ilua.
Na fesiligia e le tagata faigaluega ia Taupau pe sa iloa e Toelei’u gaioiga uma sa ia faia, ae na tali Taupau, soo se tupe lava e maua mai i tagata o loo inisiua a latou taavale la te vaeluaina tutusa lava ma Toelei’u.
O le tali foi lea a Toelei’u ina ua fesiligia o ia e le tagata faigaluega e uiga i lenei mataupu. Sa ia taua ai lona faia o kopi ta’ilua mo lisi o taavale e i le va o le 20 i le 30 talu mai le masina o Mati 2010, ma o tupe uma e maua mai i tagata o loo inisiua a latou taavale, la te vaelua tutusa ai ma Taupau
Na faaauau pea suesuega a le sui o le kamupani i a latou faila ma maua ai, e tusa ma le 58 feagaiga mo inisiua ua tuuina atu e aunoa ma ni faamaumauga o ni tupe ua totogi atu i le kamupani.
O nisi o feagaiga sa sainia ae lei uma ona totogi mai le vaega tupe i totonu, ae o le isi vaega e mulimuli mai poo le tupe atoa foi mo le feagaiga, e faaaoga e i laua.
Ina ua fesiligia e leoleo ia Toelei’u e uiga i lenei mataupu sa ia taua ai e faapea, o nisi o taimi ao galue i le kamupani inisiua, na te talia ai talosaga a nisi o tagata ina ia totogi na o se vaega o le tupe ae totogi mulimuli mai i se isi taimi le paleni o loo totoe.
O nisi la taimi e piki mai ai e Toelei’u le paleni o tupe nei mai tagata i soo se mea latou te fetauai ai e pei o luga o le auala ma isi nofoaga e ese mai i le ofisa, ona ia faaaogaina lea o le tupe e aunoa ma le totogiina atu i le kamupani, la te vaeluaina foi ma Taupau soo se tupe e maua mai.
Na taua e i laua ua molia, o nisi o taimi la te maua mai ai ni tupe faameaalofa mai tagata ona o galuega sa la faia mo i latou, ona la vaeluaina lea o ia tupe mo i laua lava.
Sa la faailoa foi i leoleo, e i le va o le $500 i le $700 le tupe sa maua e le tagata e to’atasi o i laua, peitai i faamaumauga a le kamupani Inisiua, o loo taua ai le lata atu i le $12,000 le tupe e le o maua i ana faamaumauga.
E ta’i $15,000 ua faatulaga e le faamasinoga e totogi ona fa’atoa mafai lea ona tatala i laua i tua mai le toese, ma ua fa’amoemoe o le taeao nei e tatau ona tutula’i ai i laua i luma o le Fa’amasinoga Fa’aitumalo mo le taimi muamua.