Tu’uaia se ali’i taumafai susunu se pamu kesi
Ua taofia nei i le toese i Tafuna ia se alii na taumafai e susunu le pamu kesi i Utulei (Morris Scanlan) a’o ona.
O le aso ananafi na tulai ai i luma o le Faamasinoga Faaitumalo le alii o Malaeloa Folasa, ma ua toe faatulaga le isi ana iloiloga i le faaiuga o le vaiaso fou.
O lo o tuuaia Folasa i le moliaga mamafa o lona taumafai e faatupu se afi i se nofoaga faitele, atoa ai ma le moliaga mama o le faatupu vevesi i nofoaga faitele.
E tusa ai ma faamaumauga a le faamasinoga o lo o taua ai e faapea, o le po o le sao 27 Setema na vili ai e tama faigaluega a le pamu kesi a Morris Scanlan ia le ofisa o leoleo mo se fesoasoani, ina ua vaaia ni alii onana o lo o taumafai e faatupu se vevesi i lea nofoaga.
Na taua i faamaumauga e faapea, na mafua ona le fiafia le aualii lenei, ona e le usitaia e tagata faigaluega a le pamu kesi le vavao a le nuu i afiafi.
Na taunuu leoleo ma latou vaaia ai nisi o le aufaigaluega a le pamu kesi o lo o fai tuliga ma se tasi o alii nei i tua o se togavao.
Sa molimauina ai le ova tele o le ‘ona o le ua molia i le taimi na taumafai ai leoleo e fesiligia o ia.
Na faailoa e se tasi o tagata faigaluega i leoleo e faapea, na savali atu le ua molia ma tatala ese le tapuni o le pamu kesi, ona ia faaola lea o le afi penisisi o loo uu i lona lima ao ia tu i luma o le pamu. Sa alu atu o le isi alii faigaluega ma ave ese le afi penisini mai le lima o le ua molia, ae alu atu i le isi pamu kesi ma taumafai ai e faia lava le gaioiga lea e tasi.
O se ata video na mafai ona pueina i mea pueata a le kamupani na tuuina atu i leoleo, o loo maua ai gaioiga a le ua molia, i lona faamumu lea o le afi penisini ma sau i fafo le afi ao ia uuina le tapuni o le pamu kesi.
E $20,000 le tupe ua faatulaga e le faamasinoga e totogi ona faatoa mafai lea ona tatala le ua molia i tua mai le toese, ae afai e mafai ona tatala o ia i tua mai le toese, ua poloaina o ia e le faamasinoga e aua nei toe tu i le nofoaga o loo i ai le pamu kesi na aafia i Utulei.