Na toe taofia i le toese i Tafuna i le taeao ananafi se ali’i mai Malaeloa lea o lo o tu’uaia i lona taumafai lea e susunu le fale a lona tuafafine, ina ua mae’a ona faila e le malo moliaga fa’aopoopo fa’asaga ia te ia, ma poloaina ai loa e le ali’i fa’amasino ia Elvis P. Patea le taofia o ia i Tafuna, se’i vagana ua totogi le vaega tupe e $7,000 ua fa’atulaga e totogi ona fa’atoa mafai lea ona tatala o ia i tua.

O lo’o tuuaia Talamoa i le moliaga mamafa e tasi o le talepe fale i le tulaga lua, ma moliaga mama e lua  o le fa’aleaga o meatotino i le tulaga tolu ma le fa’atupu vevesi i nofoaga faitele.

O ia tu’uaiga na afua mai i le fa’alavelave lea na ia alu ai i le fale a lona tuafafine ma fa’aleaga uma meatotino i totonu, sasa’a i ai ma le fagu kesi i totonu o le fale, ae fa’afuase’i loa ona valaau atu i ai lona tuafafine ma toe alu ese ai loa le ua molia mai le nofoaga na tula’i mai ai le fa’alavelave.

I fa’amaumauga a le fa’amasinoga o lo o taua ai e fa’apea, pe tusa o le itula e 3:56 i le afiafi o le aso Sa na te’a nei, Iuni 29, 2014, na maua ai e le Ofisa o Leoleo i Leone se telefoni mai le tina e ana le fale na fa’aleagaina, e talosagaina ai se fesoasoani a leoleo mo ia.

Na taua e le tina i leoleo e fa’apea, na fa’ateia o ia ina ua ia lagonaina se pa o tele o lo o sau mai totonu o lona fale, ona ia tamo’e lea i ai e vaai po o le a lea pa o, ae na fa’ateia o ia ina ua taunu’u atu ma ia vaaia ai le ua molia o lo o fai mai lana sauniga o le sasa lea i lalo o fa’amalama o lona fale i le samala.

Na taua e le tina i leoleo lona e e atu i le ua molia e tu’u lana gaioiga o lo o fai, o lea o le a ia viliina leoleo, o le taimi lava na vaaia ai e le ua molia lona tuafafine ua alu atu, na savali atu ai loa ma tu’u le samala i tua o lana ta’avale faigaluega ma alu ese loa, ae iloa atu ai e le tina e ana le fale se kalone lanu moana i tua o le keli o le pikiapu.

Ina ua taunu’u leoleo i luma o le fale, sa fa’alogoina ai le malosi o le manogi kesi, ae ina ua taunu’u leoleo i totonu o le fale, sa molimauina ai le tele o vaega o le fale ua fa’aleagaina, e pei o le faitoto’a pito i luma ua malepe, o fa’amalama o le fale ua taei uma, e fa’apea fo’i i le ogaumu ua leaga fo’i.

Sa molimauina fo’i le lepa o le kesi (gas) i luga o le foloa o le fale, o luga o nofoa ma moega, fa’apea ai ma lavalava ua paepae solo.

Ina ua maitauina e leoleo lea vaaiga i totonu o le fale, sa talosagaina ai loa se fesoasoani mai le Vaega Fuimu mo le fufuluina ese o le kesi o lo o to’a i totonu o le fale.

Ina ua fesiligia e leoleo le ua molia, sa ia ioeina ai lona fa’aleagaina o meatotino i totonu o le fale a lona tuafafine, e ala i lona fa’aaoga o le samala e sasa ai fa’amalama ma le faitoto’a o le fale.

Sa ia fa’ailoa fo’i i leoleo le vaega o lona fale o lo o teu ai le samala ma le kalone na ave ai le kesi lea na ia fa’aaoga i le taimi o le fa’alavelave.

Na aga’i atu leoleo i le fale a le ua molia ma aumai ai le samala ma le kalone na utu ai le kesi, ma ua taofia nei e avea ma molimau o lenei mataupu.

O le aso Tofi o le vaiaso fou lea ua fa’atulaga e faia ai le ulua’i iloiloga o lenei mataupu, i le mae’a ai lea ona faila e le malo o moliaga fa’aopoopo fa’asaga ia Talamoa ananafi.

Ua poloaina fo’i o ia e le fa’amasinoga ina ia aua ne’i ona toe taumafai e fa’afeso’ota’i lona tuafafine, pe toe taumafai fo’i e alu i le fanua po o lona fale, aua ne’i ona toe solia se tulafono ma ia tausi le filemu i totonu o le aiga.