E $30,000 le vaega tupe lea ua fa’atulaga e totogi ona fa’atoa tatala lea o se ali’i o lo o taofia i le toese i Tafuna, ona o tu’uaiga i lona faia lea o uiga mataga i le tama e le tama’ita’i sa fai ma ana paaga e 16 tausaga le matua.

O lenei mataupu na tofu atu i le Ofisa o Leoleo i Tafuna, ina ua faila e le tina o le teineititi o lo o a’afia sana tagi i le ofisa o leoleo, ma tofia ai loa le tama’ita’i leoleo su’esu’e ia Det. G. Seanoa na te su’esu’eina lenei mataupu.

E pei ona taua i fa’amaumauga a le fa’amasinoga, o le ali’i o Mamona Unasa, sa nofo i le aiga o le teineitiiti na a’afia, ona o le la mafutaga ma le tina o le tama’ita’i.

A o fa’agasolo aso o le mafutaga a le ua molia ma le aiga o lana uo, sa i ai ni fa’alavelave se lua na taua e le tina i leoleo na tutupu na a’afia ai le ua molia ma lana tama, lea na tula’i mai i le masina o Tesema 2015 ma Fepuari o le tausaga nei.

Na taua e le teineititi na a’afia i leoleo e fa’apea, o le fa’alavelave lea na tula’i mai i le masina o Tesema 2015, na tula’i mai ina ua moe lona tina i luma o le potu malolo, ona o le manatu e fesoasoani i lona tausoga sa latou momoe i lea po sa ma’i tigaina, ma alu ai loa o ia ua moe i le potu a lona tina, lea fo’i o lo o moe ai le ua molia.

Na fa’ateia o ia i se taimi o le po ina ua tago tago atu le ua molia i lona itu tinosa, peita’i sa ia taumafai e ave ese le lima o le ua molia mai lona faia o uiga mataga ia te ia.

O le fa’alavelave lona lua na tula’i mai i le masina o Fepuari na te’a nei, ina ua toe tagofia fo’i e le ua molia ona itutinosa.

Ina ua fesiligia e leoleo ia Unasa e uiga i lenei mataupu, sa ia ioeina ai le fa’alavelave na tula’i mai i le masina o Fepuari na te’a nei, ae sa ia teena le fa’alavelave o lo o tu’uaia na tula’i mai i le masina o Tesema na te’a nei.

Na taua e le ua molia i leoleo e fa’apea, sa i ai lona manatu o lona uo lea o lo o la momoe i totonu o le potu, o le mafua’aaga lena o lona tago atu i ai, peita’i na fa’ateia o ia ina ua tago atu ae ona fa’alogoina le alu ese o le tagata ma ia iloa ai loa, o le tama teine lea a ana uo.

O moliaga mamafa e fa o lo o tu’uaia ai le ua molia e aofia ai le faia o uiga fa’asotoma, faia o gaioiga fa’afeusuaiga, atoa ai ma moliaga e lua o le tagofia o itutinosa o se tama’ita’i e talavou i lalo o le tulafono.

O lo o taofia pea Unasa i le toese i Tafuna ina ua le mafai ona ia totogiina le $30,000 sa fa’atulaga e tatala ai o ia i tua.