E $100,000 le tupe lea ua fa’atulaga e le fa’amasinoga e totogi, ona fa’atoa mafai lea ona tatala mai tua se ali’i ua tu’uaia i lona fa’amalosia fa’alua o se tama’ita’i la te aiga i le 24 & 26 o Tesema 2011, ma i’u ina ma’itaga ai lea tama’ita’i.

O le a le mafai e le Samoa News ona fa’ailoa le igoa o le ali’i ua molia nei, ona o puipuiga ina ne’i faigofie ona iloa atu ai ma le tama’ita’i o lo o a’afia i lenei mataupu.

E tusa ai o fa’amaumauga a le fa’amasinoga, o le ali’i ua molia nei e tausoga (cousin) ma le tama’ita’i o lo o a’afia i lenei mataupu.

E lua tausaga talu ona tupu le fa’alavelave ae fa’atoa tofia loa le tama’ita’i leoleo o F. Talosaga i le aso 18 Tesema 2013, na te su’esu’eina lenei mataupu e pei ona taua i fa’amaumauga a le fa’amasinoga.

E tusa ai fo’i ma fa’amaumauga a le fa’amasinoga, o le fa’alavelave na tula’i mai i totonu o le fale o le tama’ita’i na a’afia.

Na taua e le tama’ita’i na a’afia i leoleo e fa’apea, i le po o le aso 24 Tesema 2011 ao la momoe ma lana pepe e 3 tausaga le matua, na fa’ateia o ia ina ua ulufale fa’amalosi atu le ali’i ua molia i totonu o le fale sa loka ma alu atu ai i totonu o le la potu ma lana tama.

Na te’i le tama’ita’i na a’afia ina ua ala a’e i luga o lo o taoto atu le ua molia i ona tafatafa i luga o le moega. Sa ia fa’alogoina fo’i le manogi pia mai le tino o le ali’i ua molia.

Na taumafai le na a’afia e nofo i luga peita’i na toe una’i e le ua molia o ia i lalo ma fa’ataoto i luga o le moega, ona ia tago lea ua fa’alala le  naifi i lona fa’ai, ma amata ai loa ona ia faia ni gaioiga e fa’amalie ai ona lagona tu’i nanau o lo o i ai.

Na taua e le tama’ita’i na a’afia i leoleo e fa’apea, sa ia taumafai malosi e una’i ese le ua molia peita’i e le i mafai, ma i’u ai lava ina fa’amalosi e le ua molia o ia la te faiaiga, ae na vave ona toe alu ese o ia mai totonu o le potu i le taimi na tagi ai lana pepe ua ala i luga.

I le po o le aso 25 Tesema 2011 e aga’i atu i le vaveao, na taua ai e le tama’ita’i na a’afia le toe alu atu fa’amalosi o le ua molia i totonu o le la potu ma lana tama ma toe faiaiga fa’amalosi ia te ia.

Na taua e le tama’ita’i na a’afia e fa’apea, na te’i ina ua ia fa’alogoina le faitotoa o le fale ua matala, sosoo ai ma le alu atu o le ua molia ua talepe le loka o le potu ae ulufale atu i le moega o lo o moe ai ma tago atu ia te ia, peita’i sa tago atu i ai ona lima ma taumafai e una’i ese le ua molia, ae sa le mafai lava.

Ina ua le mafai e le tama’ita’i ona una’i ese le ua molia, na tago atu ai loa le ua molia ua aveese le ie afu sa afu ai, tatala ese ona lavalava ae fa’amalie loa ona lagona tu’inanau e ala i lona fa’amalosi lea ona faiaiga i le tama’ita’i na a’afia.

O le aso 7 Setema 2012 na fanau ai e le tama’ita’i na a’afia lana pepe tama, e mafua mai i le fa’alavelave lea na fa’amalosi ai o ia e lona tausoga la te faiaiga.

Na teena e le ua molia moliaga mamafa e fa o lo o tu’uaia ai o ia e le malo, ina ua tula’i i luma o le fa’amasinoga maulauga, ma ua fa’atulaga le isi ana iloiloga e faia i le fa’aiuga o le masina nei.

O moliaga o lo o tu’uaia ai le ua molia e aofia ai le faiaiga fa’amalosi ma se tamaitai; faia o amioga mataga fa’afeusuaiga; tagofia o itutinosa o se tamaitai; atoa ai ma le talepe fale i le tulaga muamua.