O le alii lea ua tuuaia i lona faaoolima i se ta’ita’i leoleo, ao taumafai le alii leoleo e faafilemu ana gaioiga faatupu vevesi sa faia i totonu o le ofisa o leoleo, ua molia nei e le malo i moliaga e aofia ai lona faapa faasolitulafono o se fana, faaoolima i se leoleo, faaleaga meatotino ma le tete’e atu i leoleo a’o taumafai e pu’e faapagota o ia.

O le alii o Lafaele Tauiliili e pei ona taua i faamaumauga a le faamasinoga, na ave i le Ofisa o Leoleo i Leone i le vaiaso na te’a nei, mo le faatalatalanoaina o le mataupu e pei ona tuuaia ai o ia i lona ta’i o se fana i se tamaititi, ina ua maea ona ia faapa le isi pulu fana e tasi aga’i i le ea.

O le alii leoleo ia Sgt. Abel Penitusi na aga’i atu i Vailoa e tusa ai ma le valaau sa tuuina atu i le ofisa o leoleo, ma ia maua atu ai ni ali’i se to’alua o lo o inupia i totonu o se fale talimalo, ma o le isi o i laua nei o le alii ua molia, le susuga ia Tauiliili, ma talosagaina ai loa e le alii leoleo ia Tauiliili la te o i le ofisa i Leone mo le faatalatalanoaina o se mataupu o lo o manaomia ai o ia.

Ina ua fesiligia e le alii leoleo ia Tauiliili e tusa ai o le fana sa ia faapa a’o faia sauniga o se faaipoipoga i totonu o le latou nuu, sa teena e le ua molia lona faia o lea gaioiga, sa ia teena foi le i ai o se fana ia te ia, sei vagana ai lana faga ofe sa faapa.

Ina ua teena e Tauiliili le i ai o se fana ia te ia, na toe aga’i atu ai loa leoleo i lona aiga ma fesili i lona toalua e faatatau i le fana, ona tago loa lea o le fafine ua ave le fana i leoleo, le ituaiga o le ‘12 gauge’, ona faaauau ai lava lea o le galuega a leoleo mo le tau sailia o nisi molimau sa i ai i le taimi na tulai mai ai le faalavelave.

Na taua e isi molimau e toalua i leoleo e faapea, sa faalala atu fo’i e Tauiliili le fana ia te i laua ma fai atu, na te fasiotia se tagata i se taimi o le aso lea. Sa tuu atu foi e molimau atigi ututau e lua i leoleo, o atigi ututau ia e lua na toulu ese mai i le fana a le ua molia ina ua maea ona ia faapa faalua le fana sa uu i lona lima.

Ina ua maea ona fesiligia e leoleo molimau e tusa ai o le faalavelave sa tula’i mai, sa toe aga’i atu loa leoleo i le ofisa i Leone, sei toe fesiligia le ua molia e tusa ai o le fana ma atigi ututau ua latou maua, peitai na faateia leoleo ina ua latalata atu i le latou ofisa i Leone, ae o latou vaaia loa le screen wire o le pito i luma o le ofisa ua masae.

Na vave gaioiga a leoleo ina ua latou vaaia le screen wire ua sasae, ma latou taufetuli loa aga’i i totonu o le ofisa, ma vaaia ai le ua molia ua ia sua le isi alii leoleo i lona ulu, o le alii leoleo lea ia Cpt. Lima Togia, ona taufetuli atu loa lea o leoleo ua taumafai e taofi le ua molia ae loka ona lima.

Ma taua e Cpt Togia i leoleo e faapea, o le faalavelave na tula’i mai ina ua savali atu e siaki le ua molia o lo o i totonu o le potu fono a le latou ofisa, ae faafuase’i ai ona ia vaaia le ua molia o lo o taumafai e sasae le screen wire o le ofisa ae taumafai e oso i fafo.

Na taua e Cpt. Togia lona fautuaina o le ua molia e taofi lana gaioiga o lo o faia, peitai sa atili ai ona le malolo le ua molia, ma aapa atu i nofoa sa i totonu o le ofisa ua tauai ai o ia, sosoo ai ma le oso atu sua o ia i lona ulu, o lea na ia tu’iina ai loa ina ia tete’e atu ai i ana gaioiga o lo o faia ma la taavavale ai i luga o le fola o le fale, ae fetaui ma le taunuu atu o leoleo ma ofo atu loa le fesoasoani mo ia.

E $100,000 lea ua faatulaga e totogi ona faatoa mafai lea ona tatala le ua molia i tua, e faatali ai taualumaga o lana mataupu lea ua faagasolo i le taimi nei.