O le ali’i mai Tafuna lea o lo o tuuaia i lona gaoia o se telefoni o le ituaiga o le ‘Nexus 5 LG touchscreen’ mai totonu o le kamupani a le BlueSky Communications, ua ia teena le moliaga mamafa o le gaoi lea ua molia ai o ia e le malo, ina ua tula’i i luma o le fa’amasinoga maualuga i le aso Lulu.

I le teena ai e Vilitoni Tuia poo Sonny o le moliaga e tasi o lo o tuuaia ai o ia e le malo, ua faatulaga ai loa lana ulua’i iloiloga e faia lea i le aso 27 Mati, 2014, ma o lo o taofia pea o ia i le toese i Tafuna.

O le moliaga ua tuuaia ai Tuia, na alia’e mai ina ua faafesootai e se tagata faigaluega a le BlueSky se tagi i le Ofisa o Leoleo, faasaga i se tagata sa ia gaoia se telefoni sa faalauiloa i totonu o le latou ofisa i le Laufou Shopping Center i le aso 13 Tesema 2013.

O se ata sa pu’eina i le masini pu’eata a le kamupani lea na tuuina atu i leoleo o lo o vaaia ai se alii o ia gaoia le telefoni mai totonu o le ofisa o le Blue Sky ma o lea telefoni e $499 lona tau.

O le ali’i leoleo ia A.J Tagoa’i na ulua’i suesueina lenei mataupu, ae ina ua fiu e tau saili po o fea e maua i ai le ua molia, na tuuina atu ai loa le mataupu i le Vaega o Leoleo Suesue latou te faaauauina le suesueina o le mataupu.

I le ata sa pu’eina na tuuina atu i leoleo, sa vaaia ai le alii na ia gaoia le telefoni, o savali atu ma saofa’i i tafatafa o se tama’ita’i o lo o nofo i le nofoa e faatalitali ai tagata mo le valaauina o a latou mataupu, i totonu o le ofisa o le BlueSky.

Sa vaaia fo’i le talanoa atu o le ua molia i ni tamaitai se to’alua sa nonofo ai i le nofoa faatalitali, e aofia ai ma se tamaitai e faigaluega i le BlueSky.

Na fesiligia e leoleo tamaitai sa vaaia i totonu o le ata sa pu’eina o talanoa i le ua molia, ma la faailoa ai i leoleo, la te iloaina le ua molia, o lona igoa o ‘Sony’, e le o ia fo’i o se tagata faigaluega a le BlueSky.

Na taua e se tama’ita’i sa i ai i totonu o le ofisa i le aso lea lona vaaia o le ua molia o ia gaoia le telefoni sa i luga o le ‘counter’, ona savali lea i fafo o le ofisa ma ave le telefoni.

Fai mai le molimau, ina ua ia fesili i le ua molia pe aisea ua ia aveina ai le telefoni, ae na tali le ua molia, o ia e faigaluega i le BlueSky, o lana galuega o le faia lea o gaioiga e faalauiloa ai oloa a le kamupani i luga o le auala (Roadshow).

Na taua e le molimau lona masalosalo i gaioiga a le ua molia sa faia, ina ua ia tuua le ofisa ma le telefoni e aunoa ma lona talanoa i se tagata faigaluega o lo o i totonu o le ofisa, ma mafua ai loa ona ia faailoa i tagata faigaluega a le BlueSky le mea ua tupu.

Na umi se taimi o taumafai leoleo e saili le ua molia e uiga i lenei mataupu, ae i le aso 30 Ianuari 2014, na mafai ai loa ona maua se fesootaiga a leoleo ma Tuia ma fesiligia ai loa o ia e uiga i le telefoni o lo o masalomia sa ia gaoia.

Na taua e Tuia i leoleo e faapea, e sa’o sa i ai o ia i totonu o le Ofisa o le BlueSky i le taimi ma le aso e pei ona taua, ae na te le i gaoia se telefoni, ae ina ua faailoa atu i ai e leoleo ata sa pu’eina, na taua ai loa e le ua molia e faapea, na te manatua sa i ai i le ofisa i le aso e pei ona taua ae na te le o manatua sa ia gaoia se telefoni.

I le aotelega o suesuega sa faia e uiga i lenei mataupu, o lo o masalomia ai fo’i Tuia i le fa’alavelave lea na tula’i mai i se faleoloa i Iliili, lea fo’i na gaoia ai e se tagata se telefoni mai totonu o le faleoloa.

E $10,000 le vaega tupe lea ua faatulaga e le faamasinoga e totogi ona faatoa mafai lea ona tatala le ua molia i tua o le toese.