Ads by Google Ads by Google

Tu’uaia ni alii se to’alua fa’ao’olima i leoleo

E to’alua ni alii talavou na i luma o le faamasinoga i le aso ananafi, ona o tuuaiga i lo la faia o ni gaioiga e le tusa ai ma ala o le tulafono, e aofia ai lo la faaoolima i ni alii leoleo, a’o taumafai leoleo e taofia faapagota i laua.

O le alii o Dean Niu o lo o tuuaia i lona gaoia o se pusa pia mai totonu o se faleoloa, ma lona faaoolima i le alii faatauoloa ma se alii leoleo. 

O Fa’atauva’a Mariota o lo o tuuaia i lona faaoolima i ni alii leoleo, a’o taumafai leoleo e fa’afilemu o ia, ona ua ova lona ‘ona ma le pisapisao.

O le Aso Gafua

DEAN NIU

I faamaumauga a le faamasinoga o lo o taua ai e faapea, na aga’i atu Niu ma se tasi o alii e faatau ni la pia i se faleoloa i le itu i Sisifo, peitai sa teena e le alii faatauoloa ona ua te’a le 10 i le po.  E tusa ai ma le tulafono, e fa’asa ona toe fa’atau e faleoloa, ni ava malolosi po o pia, pe a te’a le 10 i le po.

Sa faatauanau pea e Niu ma lana uo le faatauoloa e faatau ni a la pia, ae na tete’e pea le faatauoloa ma i’u ai ina tu’ua e le to’alua lea ia le faleoloa.  Peita’i, e le’i umi se taimi, ae va’aia e le fa’atauoloa i le tv o le masini pu’eata o le faleoloa, ia Niu i totonu o le faleoloa, o lo o taumafai e si’i atu se pusa pia i seisi ali’i.

Na ta’ua i fa’amaumauga a le fa’amasinoga, na tamo’e atu le fa’atau oloa e taofi mai le to’alua lea, na ia va’aia ai, o loo matala le faitoto’a pito i tua o le faleoloa.  Na tamo’e mai Niu i le fa’atauoloa ma tu’i le fa’atauoloa.

Na agai atu leoleo e saili Niu, ma latou maua atu ai o ia i se fale faatali pasi o lo o nofonofo ai ma sana fagupia, ae ina ua taumafai leoleo e pu’e faapagota o ia, na tafiti solo le alii ma i’u ina tau ai lona tulilima i le mata o le alii leoleo.

O lo o tuuaia Niu i le faatupu vevesi i nofoaga faitele ma le faaoolima, ma ua mae’a ona toe tatala o ia i tua, e fa’atali ai le toe fa’aauauina o lana mataupu, i le Aso Gafua o le vaiaso fou.

FA’ATAUVA’A MARIOTA

O Mariota na taofia mai e leoleo i le po o le Aso Lulu na te’a nei, ina ua onana ma ni tamaitai laiti se to’alua ma latou faalavelave ai i le taaloga Bingo a se tasi o aulotu sa faia.

Na faailoa e molimau i leoleo, sa o latou vaaia Mariota ma ni tamaitai talavou se toalua o  faia sa latou inugapia, fufusu ma laulauvavale i se nofoaga e latalata ane i le fale o lo o faia ai le Bingo a le latou aulotu.

Na taunuu leoleo ma o latou molimauina ai Mariota o loo fai lana amio o le lafo o upu mataga ma laulauvavale solo i le auala.

Na taumafai leoleo e pu’e faapagota Mariota peitai na ia faia folafolaga faamata’u i leoleo, faaigoa leoleo i upu mataga atoa ai ma le faaaoga o ona vae e ta kiki ai lima o alii leoleo ina ua mae’a ona loka ona lima.

Sa ia kikiina foi le faitoto’a pito i tua o le taavale leoleo na loka ai o ia ma mafua ai ona leaga le tioata.

I faamaumauga a le faamasinoga na taua ai, na amata laulauvavale atu lava Mariota i le taimi na taunuu ai leoleo, faasolo atu ai ina ua ave o ia i totonu o le taavale, ma faaiu atu ai i le ofisa o leoleo i Tafuna.

O tamaitai talavou e toalua ia na inupia faatasi ma Mariota, ua tolopo a laua mataupu e faia i le aso 27 Iuni, ma ua tuuina atu i laua i lalo o le vaavaaiga a la matua.  Ae o lo o taofia pea Mariota i le toese, sei vagana ua ia totogia le $150 ua faatulaga e le faamasinoga.