Tu’uaia Mase tusitala mafuaaga o feeseesega Pulega Falema’i

Ua tu’uaia e le Ta’ita’ifono o le Komiti Fa’afoe a le falema’i o le LBJ ia Mase Akapo tusitusiga a tusitala, o le mafuaaga lea o feeseeseaiga o lo o tula’i mai i le va o le Pulega a le falema’i.

 

“O feeseeseaiga i le va o le Pulega a le falema’i, e mafua mai i tusitusiga a nusipepa o lo o taumafai e saili ni faamatalaga e maua ai a latou ‘news’, ae ua avea ma itu ua eseese ai ma manatu o le pulega a le falema’i, ae o lo o matou galulue pea i ni auala e foia ai ia tulaga,” o le saunoaga lea a Mase e tali atu ai i se fesili mai le Sui Peresetene o le Senate ia Nuanuaolefeagaiga Saoluaga Nua, i le mafuaaga ua tula’i mai ai feeseeseaiga i le va o le pulega a le falema’i.

 

Na faamatala e Nuanuaolefeagaiga faafitauli o lo o tutupu mai i le falema’i, “o faafitauli tuai, ma e leai se isi o le atunuu o fia faalogo atu i ai, aemaise lava pe a o o i le taimi e alia’e mai ai feeseeseaiga i le va o le Komiti Faafoe ma le pulega a le falema’i.”

 

“Aisea e le galulue faatasi ai le Komiti Faafoe, o le Pulesili o le falema’i faapea ai ma le Foma’i Sili, ae ua outou feeseesea’i a’o faafofoga le atunuu,?” o le fesili lea a Nuanuaolefeagaiga.

 

Saunoa le alii senatoa e faapea, e le o toe manaomia e le atunuu ni feeseeseaiga mai le pulega a le falema’i, ae ua manaomia auala e foia ai faafitauli i le le lava o foma’i, faapea ai ma le ave o le faamuamua i le tausiaina lelei o le soifua maloloina o tagata.

 

Ina ua fesiligia e le alii senatoa ia Mase e faailoa atu le faatulagaina o le falema’i, po o ai e aumai ai faatonuga mo soo se faaiuga e fia faia, na tali Mase, o le Komiti Faafoe lava e faauluulu i ai faaiuga fai a le falema’i, e ui o le Pulesili (CEO), o ia lena o le pule o le falema’i.

 

Saunoa fo’i Mase e faapea, e ui o le Komiti Faafoe e tofia le CEO, CFO ma le CMO, ae o i latou uma nei e galulue faatasi mo le manuia o faaiuga fai a le falema’i.

 

O ni isi o mataupu o lo o liki atu i tua i le au faasalalau e pei ona taua e Mase, e mafua mai ina ua le tutu faatasi totino o le komiti e lagolago se faaiuga ua tausi i ai le komiti, ma o lo o latou taumafai e faatulaga se ta’iala ina ia aua ne’i toe soona maua mai i totino o le komiti faafoe ni faamatalaga e faatatau i ni faaiuga a le komiti, se’i vagana o se faaiuga e tauala mai i le taitaifono o le komiti faafoe poo ona sui tofia fo’i.

 

Na talosaga Mase i afioga i Senatoa ina ia aua ne’i faavaea ni a latou faaiuga i ni tusitusiga mai nusipepa po o faasalalauga i leitio, ae ao pea ona latou fesootai mo le faamaninoina o mataupu o lo o fia malamalama i ai le maota.

 

Sa ia taua fo’i e faapea, e ui e eseese lava lagona o totino o le komiti i auala e faaleo ai manatu pe a talanoaina i a latou fonotaga, ae i lona talitonuga faa ta’ita’ifono, soo se taimi lava e malilie ai le komiti faafoe i se mataupu, lona uiga o le faaiuga lena a le komiti faafoe ae le o se manatu o se totino se toatasi o le komiti.

 

Saunoa Nuanuaolefeagaiga e faapea, soo se taimi e tula’i mai ai feeseeseaiga faapenei, e atagia mai ai ua le mafai e le komiti faafoe ona faatonutonu le Pulesili a le falema’i, o le CFO po o le Foma’i sili fo’i, ae afai e galulue faatasi i latou nei mo le manuia o le falema’i, e le tatau la ona tula’i mai ni feeseeseaiga i lo latou va.

 

E fia faailoa e le Samoa News, o ni isi o mataupu o lo o aofia i nisi o ana tusitusiga faatatau i faaiuga ma mataupu o lo o talanoaina e le Komiti Faafoe a le falema’i, e maua mai i ni isi o totino o le komiti faafoe a le falema’i, fa’apea tusitusiga a le CEO a le falema’i agai i le Komiti Faafoe, ma se tasi o foma’i, ae le o ni faamatalaga e faatupu e tusitala ina ia maua ai ni a latou ripoti e faasalalau.

 

Na fautuaina e ni isi o senatoa e pei o Soliai Tuipine Fuimaono, Laolagi Fonoti Savali Vaeao ma Saole Mila le pulega a le falema’i, e le o le feeseesea’i e manuia ai le atunuu i le latou auaunaga, ae o le galulue faatasi e maua ai manuia.

 

“Soia ia tou te feeseesea’i soo ua tiga taliga o le atunuu e faalogologo atu i na mea, ae ave la outou faamuamua i le tausiaina o le soifua maloloina o tagata,” o le fautuaga faaiu lea a Soliai.

Comment Here