Ads by Google Ads by Google

Tu’uaia leoleo toese fa’ao’olima i se ali’i pagota

O le vaiaso na te’a nei na tula’i ai i luma o le Fa’amasinoga Fa’aitumalo se ali’i leoleo e galue i le toese i Tafuna, ona o tu’uaiga i lona fa’ao’olima lea i se ali’i pagota sa sola i tua mai le toese i le tausaga ua te’a.

 

O moliaga mama e lua ua molia ai e le malo le susuga ia Sianava Nu’usila o le fa’ao’olima i le tulaga tolu ma le fa’atupu vevesi i nofoaga faitele.

 

O le mataupu lenei na tofu atu i le Ofisa o Leoleo mo lona su’esu’euina, ina ua sola i tua mai le toese i Tafuna le ali’i pagota o Joe Togitogi i le aso 27 Novema, 2013, ma tu’uaia ai loa le fa’ao’olima o le ali’i leoleo ua molia ia te ia, ma tofia ai loa le leoleo ia Fetaui Tofiga na te su’esu’eina lenei mataupu.

 

E tusa ai ma fa’amaumauga a le fa’amasinoga o lo o taua ai e fa’apea, e to’alima leoleo na aga’i atu i le nofoaga o lo o i ai se faleoloa i Kokoland i le aso e pei ona taua, ina ua taua o lo o i ai iina le ali’i pagota ia Togitogi.

 

Na taunuu leoleo ma latou lokaina lima o le ali’i pagota ma fa’a nofo lea o ia i lalo, ae fetaui loa ma le taunuu atu o le ali’i leoleo o Nu’usilia, ma aga’i sa’o atu loa i le vaega o lo o nofo mai ai Togitogi ma ona lima o lo o loka i cuff, ona ia kikiina lea o foliga o le ali’i pagota e pei ona taua i fa’amaumauga a le fa’amasinoga.

 

Na auina atu Togitogi i totonu o le ta’avale a leoleo, lea fo’i sa i ai fa’atasi ma leoleo e to’atolu e aofia ai ma Nu’usila, ma momoli atu ai loa le ali’i pagota i le Ofisa o Leoleo i Tafuna mo isi su’esu’ega, ma sa nonofo le ali’i pagota ma Nu’usila i le nofoa pito i tua o le ta’avale leoleo.

 

Na taua e Togitogi e fa’apea, a’o aga’i atu le ta’avale i Tafuna, na taumafai Nu’usila e titina lona ua, po ona foliga toe tu’i ma lona gutu, ma avea ai loa ia gaioiga ma itu na ita ai Togitogi ma amata ai loa ona ia pisapisao i totonu o le ta’avale ma palauvale i le ali’i leoleo ua molia.

 

Na logo e leoleo le Ta’ita’i Uati i gaioiga a Togitogi o lo o fai, ma fa’atonuina e le Ta’ita’i Uati ina ia momoli sa’o loa Togitogi i le toese i Tafuna e taofia ai.

 

Ina ua taunuu le ta’avale i le toese ma ave i fafo Togitogi, sa fa’aauau pea ona laulau vavale Togitogi ia Nu’usila ma ia folafola i ai, o le a ia fa’ailoa i le fa’amasinoga ana gaioiga uma sa fai ia te ia i Kokoland.

 

Na taumafai le ua molia e aga’i atu i le ali’i pagota peita’i sa taofi mai o ia e isi leoleo, ona alaga lea o Nu’usila i leoleo e tatala ese cuff o lo o loka ai lima o Togitogi ae se’i la fufusu.

 

Sa maitauina e leoleo i le taimi na taunu’u atu ai Togitogi i le toese, le i ai o ni maosia i ona foliga ma lona tauau, sa fa’apea fo’i ona toto lona isu (tulou).