Ads by Google Ads by Google

Tu’uaia le “aunty” i le sasa fa’amo’amo’a o lona ‘niece’ i le uaea moli

E 35 tausaga o se tina mai Nuuuli ua tuuaia e le malo i se faalavelave na manu’a tigaina ai lona ‘niece’ e 10 tausaga sa nofo ia te ia, ina ua ia sasa faamo’amo’a o ia i se uaea moli.

 

O le taeao ananafi na tula’i ai Masina Toleafoa i luma o le Faamasinoga Faaitumalo mo le taimi muamua, ma ia teena ai moliaga mama e lua o le faatupu vevesi i totonu o le aiga atoa ai ma le faaoolima i le tulaga tolu, ae ua i ai le faamoemoe o le malo o le faaiuga o le vaiaso nei latou te failaina ai moliaga faaopoopo faasaga i lenei mataupu.

 

O le mataupu lenei na tofu atu i le Ofisa o Leoleo i Tafuna i le taeao o le Aso Lua, Me 21 2013, ina ua vaaia e le afafine o le alii na faafesootaia le Ofisa o Leoleo, le tagi fano mai o le teineititi na aafia i luga o le auala, i le tau sailiga o se telefoni e vili ai lona tina ona o le mea ua tupu ia te ia.

 

Na fesili le afafine o le molimau i le teineititi na aafia i le mea ua tupu, ae faailoa i ai e le teineititi na aafia manu’a i lona tino, na aofia ai unaoa i lona papatua, ogalima, ogavae ma faasolo atu ai i lona nofoaga, na mafua mai ina ua sasa o ia e lona aunty i le uaea moli.

 

Na taunuu leoleo i le fale ma latou maua atu ai le teineititi na aafia ma latou auina atu loa o ia i le Ofisa i Tafuna mo suesuega.

 

Na taua e le teineititi i leoleo e faapea, o le po o le Aso Sa na te’a nei na faatonu ai o ia e lona aunty e su’e le ofu tino o lona uncle ma alu e auli, ma sa ia usita’i i ai, ae na avea le tuai o lana gaioi ma itu na ita ai lona aunty ma ia faaaoga ai le uaea moli e sasa ai lona tino.

 

Na faamatala foi e le teineititi i leoleo e faapea, o le aso Tofi o le vaiaso na te’a nei na fasi muamua ai o ia e lona aunty i le uaea moli, ona toe fasi fo’i lea i le po o le aso Sa.

 

Ina ua fesiligia e leoleo le ua molia e tusa ai o lenei mataupu, sa ia ioeina ai lona faaaogaina o le uaea moli e sasa ai lona niece, ma e faatele fo’i ona ia sasaina o ia i le uaea moli.

 

O le teineititi e sau mai Pago Pago, ae na nofo aoga i lona aunty i le tausaga na te’a nei, ma ua iai nei o ia i lalo o le vaavaaiga a le Ofisa o Tautua ma Auaunaga Lautele i le Shelter i Tafuna, se’i faatalitali ai taualumaga o lenei mataupu.

 

E $300 lea ua faatulaga e le faamasinoga e totogi, ona faatoa mafai lea ona tatala le ua molia i tua e faatalitali ai le aso e faila ai e le malo moliaga faaopoopo faasaga ia te ia.

 

Afai ae mafai ona tatala le ua molia i tua mai le toese, ua poloaina e le faamasinoga o ia ina ia aua ne’i ona toe taumafai e faafesootai le teineititi na aafia i soo se auala, poo ni isi fo’i o lona aiga, ua faasa foi ona ia toe soli se tulafono a le malo, a ia tuuina atu ana pepa malaga e taofia e le malo se’i mae’a lana mataupu ona toe tuuina atu lea ia te ia.