Na taua e le afioga i le ali’i kovana ia Lolo Matalasi Moliga i le fonotaga a le kapeneta i le aso ananafi e fa’apea, o fa’afitauli tau tupe o lo o fetaia’i pea ma le malo i le tele o taimi e aofia ai ma le taimi lenei, e le mafua mai i le malo feterale po o ni isi lava tagata, “ae mafua mai lava ina ua le fa’atinoina tiute ma galuega fa’atino a afioga i fa’atonusili o ofisa ma matagaluega eseese a le malo”.

“O le taimi lava e le faia ai lau fatuaiga tausi, o le taimi fo’i e le galulue ai au tagata faigaluega e fa’atino a latou tiute masani, ona afua mai ai loa lea o fa’afitauli tau tupe fa’asaga i le malo”, o se vaega lea o le saunoaga a le ali’i kovana.

Saunoa Lolo i se feiloaiga ma le Samoa News i le vaiaso nei e faapea, ua mafua ona vaivai le sau i totonu o tupe ao ma tupe maua a le malo, e le gata ua le maua mai tupe o lafoga sa fuafua e maua i le kuata muamua ma le kuata lua, ae ua tuai fo’i ona maua mai tupe mai le feterale lea e tatau ona toe fa’atumu ai tupe lotoifale sa fa’aaoga i auaunaga a le malo.

Na fa’ailoa e Lolo i le kapeneta e faapea, o ni isi o mafua’aga tupito o lo o mafua ai ona vaivai le itu tau tupe a le malo, lea na amata molimauina mai i le fa’aiuga o le kuata muamua o le tausaga fa’aletupe lenei, e le gata “e le o faia galuega fa’ata’ita’i a fa’atonusili, ae o tulaga fa’apolokiki o lo o tula’i mai i le laumua i Uosigitone, lea fo’i ua mafua ai ona tuai le maua mai o tupe e toe fa’atumu ai tupe lotoifale a le malo ua fa’aaoga mo tautua sa tatau ona fa’atupe e le feterale.

O ofisa uma lava a le malo o lo o maua mai tupe mai le feterale e toe fa’atumu ai tupe lotoifale o lo o fa’aaoga i a latou tautua, ua fautuaina e le ali’i kovana fa’atonu o ofisa ia, ina ia vave ona fa’atumu pepa ma lafo i fafo ina ia vave maua mai tupe e tatau ona toe fa’atumu mai mo le malo.

“A ova loa ma le $200,000 tupe e tatau ona toe fa’atumu mai e le feterale, vave fa’atumu loa pepa ma lafo i fafo ina ia vave fa’atumu mai lena vaega tupe, ae aua le fa’atali seiloga e ova ma le ta’i miliona le aofa’i o tupe e fa’atumu mai ona fa’atoa talosaga lea i le feterale e toe fa’atumu mai, o iina le isi mafua’aga lea e ala ai ona tula’i mai le fa’aletonu”, o le isi lea fautuaga a le ali’i kovana.

“E tatau ona e tago e una’i lau aufaigaluega e fai a latou galuega, vave ona fa’atupu pepa ma lafo i fafo, ae aua le fiafia e fa’aaoga tupe lotoifale e totogi ai auaunaga nei, ae leai se galuega e faia ina ia toe vave fa’atumu mai ai tupe a le malo”, o le fautuaga lea a le ali’i kovana sa tu’u sa’o atu i le kapeneta.

O se tasi o fa’afitauli tuga o lo o fetaia’i ma le konekeresi i le taimi nei e pei ona saunoa Lolo, o faiga faapolokiki i le va o ta’ita’i, ma ua avea lea fa’afitauli ma itu ua a’afia atu ai teritori e aofia ai ma Amerika Samoa.

Sa ia fa’aoloolomaau i lana kapeneta, ina ia galulue fa’atasi e saili auala e foia ai le toe tula’i mai o nei fa’afitauli.