Ads by Google Ads by Google

Tu’uaia fa’aletonu atina’e Manu’a i faigamalo ua mavae atu

NUA: A matou fetagisi atu malo ae aumai na o nai tama’i mea faamalie ai matou

 

Na tuuaia e ni isi o ta’ita’i o le itumalo o Manu’atele atoa ai ma tagatanuu o lo o nonofo i le motu nofoaiga a le malo ua mavae atu, o iina na afua mai ai tulaga faaletonu i atina’e ma le tamaoaiga i totonu o Manu’a e pei ona vaaia i le taimi nei.

 

O ia faaletonu e aofia ai uafu, falema’i ma aoga, ma o iina na mafua ai loa ona tuua e le toatele o tagata Manu’a o latou aiga ma laueleele, ae malaga mai i Tutuila nei e saili manuia ai ona o le matagofie o le susu ma le meli o lo o tafe i Tutuila ae le o mafai ona oo atu i Manu’a.

 

Na taua e le afioga i le alii Senatoa ia Nuanuaolefeagaiga Saoluaga i le feiloaiga a le Faletolu i Faleasao, Ta’u ma Fitiuta ma le afioga i le kovana sili ia Lolo Matalasi Moliga i le aso Lua na te’a nei, ua tele nofoaiga o taumafai le Kovana Itumalo a Manu’a ia Misaalefua J. Hudson e talosaga ni atina’e mo le itumalo ae leai lava se fesoasoani e maua atu.

 

“Lea ua e silasila i le tele o faaletonu o lo o feagai ma Manu’a i falema’i, uafu ma aoga, tele foi o nofoaiga ua mavae atu sa taumafai atu ai lava Misa e talosaga ni atina’e mo le itumalo, ae leai lava ma se tali o maua mai, pau la matou mea o lo o fai e na o le fetagisi lava, ae emo ane ua aumai ni nai tama’i mea e faamalie ai matou,” o le saunoaga lea a le alii senatoa.

 

I le tagi talatala ai o Manu’a i tulaga faaletonu ua i ai lona atina’e i le taimi nei, na saunoa tuu sa’o atu ai le alii kovana e faapea, poo a lava taumafaiga a le malo e faatutu ni atina’e i Manu’a ae afai e le galulue faatasi malo ma Manu’a e le taitai manuia taumafaiga o lo o fuafua e fai.

 

“Aua foi tou te faalagolago e fai uma e le malo galuega mo le atina’eina o Manu’a, o la outou fatu aiga tausi o le fesoasoani i le malo, toe amata asiasiga i totonu o nuu ma itumalo, amata ona o mai tagata e le o i ai ni galuega e fai e faamama nuu, teuteu faamatagofie tafatafa o le alatele, ma toe amata asiasiga a aumaga i faatoaga, ina ia tulai mai le malo ae ua amata ona outou galulue atu,” o le lu’i lea a Lolo i tagata Manu’a.

 

Na faailoa e Lolo ia Manu’a e faapea, ua amata i le taimi nei i Tutuila ona galulue tagata faigaluega uma lava a le malo i le aso e tasi o le masina mo le faamamaina o tafatafa o le alatele ma teuteu faamatagofie aai ma nuu, e tatau foi la ia Manu’a ona latou faia lea faataitaiga lelei.

 

“Aua tou te faatalitali seiloga e o mai tagata faigaluega a le malo e fai galuega laiti nei, e le o i ai ni tupe a le malo e faatino ai galuega nei, ae o le fatu aiga tausi na a tatou uma e fai, a oo i se isi aso taofi le aoga Samoa a le Faifeau ae o mai le autalavou e faamama le aai, o le agaga moni ia toe foi itumalo ma nuu i le olaga sa soifua mai ai o le galulue e faamama nuu ma aai, aua tou te faatali seiloga e o mai le malo e teu ma faamama, ia amata atu ia te outou,” o le lu’i lea a le alii kovana.

 

FA’AFITAULI I UAFU, FALEMA’I MA AOGA I MANU’A

 

E tofu lava uafu e tolu o lo o i ai i Manu’a ma faafitauli e pei ona taua e le alii Senatoa. O le uafu i Ofu, e le mafai ona ofu le MV Sili i le uafu pe a pogisa ona e le o i ai ni moli, ae o le uafu i Faleasao ma Ta’u, afai e sou le sami, e faigata ona ofi le vaa i totonu ona o le vaiti o le auala e ui atu i totonu, ma i’u ai lava ina toe foi mai i Tutuila le vaa sei vagana ua malu ma lelei le tau.

 

O isi faafitauli e aofia ai vaiti o le vaega e feliua’i ai le vaa i totonu o le uafu, o iina lea e mafua ai ona leaga soo le vaa ona o le aafia i amu o lo o i ai.

 

O faafitauli i falema’i e na o le falema’i o lo o i ai ae leai ni foma’i faapitoa, toe le lava vailaau e togafiti ai ma’i. E le o i ai ni foma’i fa’inifo, foma’i mo tamaiti poo isi ituaiga foma’i e pei ona i ai i Tutuila nei.

 

“Soo se tagata Manu’a lava e ma’i tigaina, e tasi lava le faamoemoega atoa o lona toe ola mai o le tuu atu i aao o le Ali’i, a’o se upu e ave i le falema’i, na o mea e oti mai ai,” o le saunoaga lea a se tasi o tama matua o le itumalo ina ua fesiligia e le Samoa News.

 

I tulaga o aoaoga i Manu’a e matua valavala lava ma le televave ua i ai aoaoga i Tutuila nei e pei ona molimau ta’ita’i o le itumalo.

 

Mo se faataitaiga e pei ona saunoa le alii senatoa, e na o le tolu mataupu o lo o aoaoina i Manu’a i le taimi nei, ma isi mataupu e lua e filifili mai ai le tamaititi aoga, ae o aso ua mavae ao latou aooga i Manu’a, sa lelei ma mautu vaega uma e faatino ai aoga.

 

“E mafua mai nei faaletonu uma o kovana ma latou taupulega ua mavae atu, e leai ma se agaga e fia atina’e Manu’a, ae faafetai ua e tula’i mai e taitai le malo, matou te talitonu ua vavala mai ata o le manuia mo Manu’a ona ua e manatu e faamuamua tagata, ma o tagata o lo o nonofo i Manu’a o isi foi na tagata o le faigamalo a Amerika Samoa,” o le saunoaga lea a Nua i le alii kovana.

 

Na faafetaia e ta’ita’i o le itumalo le alii kovana, ona o le auala ua ia filifili e faatino ai lana ulua’i asiasiga mo Manu’a, e ala i lona afio atu ma avatu sui o lana kapeneta, sei o latou silasila ma molimau i tulaga faaletonu o lo o i ai Manu’a.

 

Saunoa Misaalefua e faapea, e leai se mea e mafai e le kovana ona fai pe afai e na o ia na alu atu i lana asiasiga, ona foi mai lea ma tau faamatala i faatonu sili tulaga e ao ona faaleleia.

 

“O le itu taua ua outou silasila ma vaavaai tino i faaletonu o lo o i ai le atina’e i Manu’a, ma ou te tatalo o le a vave mai se aso e amata faaleleia ai atina’e i totonu o le itumalo,” o faanaunauga ia o le afioga a Misaalefua.

 

Na taua foi e Misaalefua e faapea, o le faafitauli na feagai ma Manu’a i tausaga ua mavae, e fiu lava e talosaga atu i faigamalo sa tulai mai ae leai lava ma se ano atu o se isi e fai se mea lelei mo Manu’a.

 

Na taua e se tasi o tama matua i Ofu ia Leama Misiuaita e faapea, o le isi lea mafuaaga ua ala ai ona tuua e le toatele o tagata Manu’a o latou laueleele ma aiga ae ausulusulu atu i Tutuila, ona o le tau sailiina lea o se manuia mo fanau.

 

“Ua outou vaai atu nei i le tele o nuu i Manu’a, e na o fale o lo o tutu ua amata ona vaoa ae leai ma ni tagata o toe nonofo ai, o le ata vaaia lena o le toatele o tagata Manu’a ua lolofi atu i Tutuila e saili manuia ai, ae ana lelei atina’e i Manu’a nei e le o ese tagata ae fiafia lava i latou e nonofo ma aumau iinei,” o le saunoaga lea a Leama.

 

Ae na taua e ni isi o tina matutua o le toomaga a Ta’u e faapea, o faamanuiaga tau tupe ma le lasi o le tamaoaiga o lo o sapi ai Tutuila, e na o latou lava o lo o lagonaina le suamalie, peitai o tagata Manu’a, na amo mai lava le pologa mai le tele o tausaga ua tuana’i, o lenei lava e amo e oo mai i le taimi nei.

 

I saunoaga faaiu mai sui o le itumalo o Manu’atele a’o le’i toe tuuvaa mai le alii kovana ma lana aumalaga, na o latou tuuina atu ai ni upu faamalosi i faatonusili ina ia faamalolosi e fai le galuega ae aua le fefe.

 

“Outou faatonusili, aua tou te fefefe e fai faaiuga e manuia ai lo tatou malo, afai e fai atina’e i Tutuila, e tatau foi ona fai i Manu’a, o faaletonu o lo o i ai o mea laiti, ae mafua ona tetele ona e le o faia i ai se galuega e foia ai,” o le saunoaga lea a Nuanuaolefeagaiga.

 

Ae na saunoa le Faalupega o Fitiuta e faapea, ina ua aave atu tala e faatatau i le faigamalaga a le alii kovana, sa nonofo tatalo Manu’a pe taunuu afea, ae ina ua taunuu le malaga, ona latou manatu ai loa lea e faapea, “ua uma taimi sa faagalo mai ai Manu’a, ae ua oo i le taimi o le a manatua ai pea e kovana ma lana faigamalo.”

 

“Ua leva ona matou nonofo tatalo poo afea e tofo ai Manu’a i manuia o lo o sapi ai Tutuila, ae faafetai ua vavala mai ata o Ta’uleleia, o manuia nei sa moomoo i ai tuaa ua lagomau mai Tiasa ina ia tofo i ai Manu’a ma ona tagata, lea ua matou sauni e taliasapaia faatuaeleele, Lolo, manuia lau nofoaiga,” o upu faaiu ia a le alii senatoa e fai ai ma sui o le itumalo i toe minute o le asiasiga a le alii kovana, ao lei toe taliu mai i le vaalele i le aso Lulu na te’a nei