I se fonotaga sa faia e le pulega a le Iuni Lakapi a Amerika Samoa (ASRU) ma le Komiti Faafoe o le Sisigafu’a o lenei tausaga, ua faamaonia mai ai le tuu aloaia atu e le Komiti le faatautaiga o le taamilosaga ta’ito’a 7 i le ASRU.

I se feiloaiga a le Samoa News ma le Peresetene o le ASRU i le aso ananafi, afioga i le Anava o Taua ia Te’o J. Fuavai, sa ia faamaonia mai ai lea tulaga, atoa ai ma le faatulagaina o le asod 14 & 15 o Aperila e faataunuuina ai lenei faamoemoe.

“I se matou fonotaga sa faia ma le Komiti o Tapenaga o le Sisigafu’a lea o loo taitaifono ai le Lutena Kovana ia Faoa A. Sunia, faapea ai ma le Ofisa o le Mataupu tau Samnoa, sa faamaonia ai le tuu aloaia mai o le faatautaia o le taamilosaga taitoa 7 i le ASRU,” o le saunoaga lea a Te’o e tau faamanino ai i le atunuu se ripoti na faasalalau i le Samoa News i le vaiaso na tea nei, e uiga i le tuu atu lea o le faatautaiga o le taamilosaga taitoa 7 o le fua i le Kalapu Lakapi a Malisi.

“E le’i i ai se faaiuga faapea e tuu atu le faatautaiga o le taamilosaga lea e faatautaia e le Malisi, e lei taua foi le igoa o le Malisi i le taimi o le matou fonotaga sa faia ma sui o le komiti o le fu’a,” o le saunoaga lea a Te’o.

Na matua teena e le alii peresetene o le ASRU le i ai o se fuafuaga e tuuina atu ai le taamilosaga o le fu’a e faatautaia e le Kalapu a Malisi.

“Ana faapea e i ai se suiga faapena, ua leva ona faailoa mai e le komiti faafoe o le fu’a ia te ai, poo le afioga foi i le alii Kovana aua o ia o le Taitaifono o le Iuni Lakapi a le atunuu,” o le saunoaga lea a Te’o.

I se ata sa lomia i le pito i luma o le To’asavaili i le aso Toona’i na te’a nei, aso 21 Ianuari, o loo faailoa mai ai sui o le Asosi o Tama Tuai a Malisi faatasi ai ma le pule o le Kamupani o le Tautua Mo Oe (TMO), o loo latou uuina se siaki e $40,000 mai le TMO mo le faamoemoe, e lagolagoina ai le taamilosaga taitoa 7 o le fu’a.

Ae na taua e le Perestene o le Asosi a Tama Tuai a Malisi, afioga Toleafoa Isitolo Wulf i le Samoa News e faapea, e le o i ai se faanaunauga a le kalapu latou te fao faamalosi le matafaioi a le ASRU mo le faatautaia o taaloga lakapi, peitai o le latou taumafaiga o loo taumafai atu i ai, o le faia lea o tapenaga e fesoasoani ai i le faatinoina o lenei  faamoemoe.

“Na pau la matou gaioiga lea e fai, o le faia lea o tapenaga e fesoasoani ai i le faatautaiga o lenei faamoemoe, e pei o le sailiina lea o tupe e faatupe ma faaleleia ai le taamilosaga o le fu’a,”o le saunoaga lea a Toleafoa.

“Ou te faaaloalo tele i le taitaifono o le ASRU ia Togiola Tulafono, faapea ai ma le peresetene ia Te’o, ae o le  agaga autu o le Malisi, ia fesoasoani e faalautele le atinaeina o le taaloga lakapi, ina ia faigofie ai ona vaai mai le IRB ma latou talitonuina ai, e mafai e Amerika Samoa ona atinae le taaloga lakapi ma faaleleia atili,” o le isi lea saunoaga a Toleafoa

O le foai a le TMO e $40,000, na saunoa ai Toleafoa e faapea, na mafua ona faanatinati le tuuina mai o lea foai, ona o le vaiaso na te’a nei na malaga atu ai le pulesili o le kamupani i fafo, ma latou faaaogaina ai loa le vaiaso na te’a nei tauaao ai le foai, ina ia fai ma faataitaiga i isi kamupani ina ia fesoasoani mai i le taumafaiga o lenei faamoemoe.

Saunoa Toleafoa, e lei i ai sa latou feiloaiga ma le komiti o le fu’a poo le ASRU foi e uiga i lenei faamoemoe, peitai ua i ai la latou fuafuaga a mautu loa a latou tapenaga, ona latou savalia loa lea o le ASRU i se aso o le vaiaso nei e uiga i lenei mataupu, afai lava e teena e le ASRU la latou taumafaiga, o le tali lava lena.

O se tasi o fuafuaga a Malisi mo lenei faamoeoe e aofia ai le auina maia lea o au lakapi mai Niu Sila, Ausetalia, Fiti, Tonga ma Samoa e tausinio i lenei faamoemoe, ina ia mafai ai foi ona faatosina mai i le atunuu tagata tafafao mai fafo.

Talu ona amata mai lenei faamoemoe i le lua tausaga talu ai, o le kalapu lakapi mai le afioaga o Vailele lea ua soso’o tausaga e lua o ia umia le Ipu o le siamupini.