Ads by Google Ads by Google

Totogi o Teine Faletalimalo $800. Po e Tasi

Ua i ai nei le to’a 12 o Leoleo Nana a Amerika ua su’esu’ea au'ili'ili e le FBI ona o le fa’amatalaga ua fa’amaonia mai Colombia, sa fa’afiafiaina i latou e tama’ita’i i o latou potu i le faletalimalo i le totogi e ta’i $800 ae uma ane lea tautua, ua ita le isi tama’ita’i, ua tu’u atu e le leoleo nana a Amerika na’o le $30 ia te ia.

O se tala mai lea a le Nusipepa a le New York Times, “O se tama’ita’i sa ia fa’ailoa mai lona tagata o se tasi e fa’afeaoa le ali’i leoleo nana Amerika ua ia le totogia maia le tau sa ma’ua malilie fa’atasi i ai, e $800. Ua fa’amamafa mai lea fa’amatalaga, e le o ia o se talitane, o ia o se tasi e fa’afeaoa le ali’i leoleo nana.”

O le mea e fa’a’ata’ata lava, ae to’atolu ali’i leoleo nana ua fa’amavae mai a latou galuega, e afua mai i lenei fa’asea ua fa’ailoa mai i le nusipepa a Niu Ioka ma ua fa’ailoa mai, e tauau e matua to’atele atu isi e a’afia ai fo’i a latou galuega i lea lava mea e tasi, ina ua su’esu’e atili atu i ai.

I le ulua’i su’esu’ega ua iloa ai e 20 tama’ita’i talavou na avea i le Faletalimalo o Cartagena i Colombia, le nofoaga lea sa nonofo ai le vaega o leoleo nana a’o malaga atu le afioga le Peresetene o Amerika mo fonotaga i lea atunu’u.

E 'ese mai le to’atolu o leoleo nana ua fa’amavae ae to’atasi le supavaisa ua fa’amalolo tumau mai le galuega, tasi le isi leoleo nana ua fa’alitaea, ma isi leoleo nana fou ua fautuina ina ia faia tusi fa’amavae mai o latou tiute, e tusa ai ma se lipoti mai le fa’atonu o le matagaluega lea i le aso Lua na te’a nei.

O lea po uiga 'ese le fa’afiafiaga sa auai atu ai nei ali’i leoleo nana e to’a 11 a Amerika, na mae’a fa’afo’ia mai lava i latou e muamua mai le Peresetene i Amerika ona o lenei fa’aletonu. E 'ese mai lea vaega ua a’afia fo’i le isi to’a 12 o sui o le militeri, ma ua iloga mai, e i ai fo’i so latou sao i lea lava po ma mea na tutupu ai i le faletalimalo Caribe.

O le tala ua fa’amatalaina nei e le tama’ita’i fa’afeao lea, ua atili ai ona malamalama le to’atele i mea e masani ona faia e alo o Amerika o lo ’o i ai i le Militeri. Ua fa’ailoa mai, e masani ona fa’atau e ali’i fitafita Amerika fagu vodka ma latou inua ma tama’ita’i latou te feiloa’i ma fa’amasani i le kalapu. Ou te iloa, e le o ni tama’i inuga nei e faia, e matua feinu lava se’ia matua leiloa se mea, ma momoe ane o le a ao le mea.

Ina ua fesiligia le tama’ita’i lea sa fa’asea ua le atoa lona totogi pe na ia silafia o leoleo nei o lo ’o leoina le peresetene lea o lo ’o i ai fo’i i lo latou atunu’u? Ae tali o ia, e matua ia leiloa lava, o le vaega lea o lo ’o leoleoina le Peresetene o Amerika.

Ua ia fa’amatala lava, o se la’ua feagaiga e totogia o ia i le $800 i le aso e tasi, peita’i, ua o’o i le taeao ua alu atu avatu na’o le $30 ma ua afua ai nei le fa’aletonu tele ma ua a’afia mai ai ma le vaega o leoleo e tau fa’afo’ia ai le mata'upu.

Ina ua fesiligia le tama’ita’i lea i lona tau ua taugata tele mo le po e tasi, po ’o a fo’i ana galuega o lo ’o fa’atino mo lea tau? Sa ia fa’ailoa mai e fa’apea, “E pei lava o telefoni, e 'ese'ese le tau o le iphone mai le htc , e pau lava o lo’u totogi e maualuga.

I le taimi nei ua tauau e sola 'ese le tama’ita’i lea mai Niu Ioka ona ua iloga mai e ia, ua faifaitetele le mata'upu sa ia fa’atupuina ma ua a’afia le to’atele o leoleo nana ma ali’i o le militeri i nei su’esu’ega ma sa'iliga a le vaega a le FBI ma le CIA.

O se saunoaga a le tama’ita’i senatoa o Susan Collins, o ia lea e matua fa’ailoa uma i ai le tele o sa'ili'iliga ma su’esu’ega uma o lea tama’ita’i mai Colombia ma ua ia fa’ailoa ai, o le matua tele lava o mea na tutupu i le faletalimalo o Cartagena, a’o le’i to’ai taunu’u atu i ai le Peresetene o Amerika i lana malaga lea.

E muamua lava o nei ali’i leoleo nana i so ’o se atunu’u e fuafua e malaga atu i ai le afioga le Peresetene, ma o i’ina i le faletalimalo fo’i sa tapena mo le taligamalo i le peresetene na fa’ataunu’u ai e leoleo nana nei lea fa’afiafiaga o tama’ita’i e ta’i $800 i le po lo latou totogi.

 Ua fa’ailoa mai e le ali’i faipule, Peter King, “Masalo e le’i iloa e leoleo nana nei, o nei tama’ita’i o ni tama’ita’i talitane.” Ua fa’ailoa mai e ni isi o sui sinia a le Malo o Amerika, ua mae’a taua’aoina lipoti e i latou e fa’ailoa ai, e silia ma le 20 tama’ita’i talitane nei sa fa’afiafia i lea faletalimalo a’o le’i o’o ane i ai le malaga a le peresetene o Amerika.

O lo ’o fa’aaogaina fo’i masini e fa’ailo ai po ’o e tala pepelo po’o e tautala i le sa’o i lenei su’esu’ega ma o lo ’o fa’aauau pea lava sa'iliga nei i ali’i leoleo nana a le Malo tele ma ua fa’asolo lava ina fa’ateleina tagata o i ai a’afiaga.

“O le mea moni lava, i so ’o se tasi e galue i le puipuiga o le saogalemu lautele o Amerika ma lona ta’ita’i, e ao ina mautu i o latou olaga, le 'au'aunaga ia sao ma uli, aua lava ne’i faia ma ni fa’aletonu fa’apenei, aua e ono lamatia lava le ola o Amerika i ona ta’ita’i ae maise le atunu’u atoa ona o nei ituaiga o faiga, ae maise pe a faia ae ua onana ma ua le mailoa tala sa faia.” O se tala mai lea i le ofisa autu o Leoleo Nana a Amerika le ali’i pule lagolago o Paul Morrissey.

Ua fa’ailoa mai, o lo ’o ua i ai le isi vaega e to’avalu o leoleo nana ua fa’aopoopo atu i le su’esu’ega toto’a o lo ’o fa’atautaia nei.  E to’atolu isi leoleo nana ua fa’apea lava ona tula’i' ese mai o latou tofiga fa’aleoleo nana, peita’i, ua tu’ua i latou i le lisi o leoleo o lo ’o fa’amalolo ae se’i faia le su’esu’ega ia mae’a e fa’ailoa ai pe nofo sala pe leai.

O le isi to’alua o ta’ita’i supavaisa lea ua tula’i 'ese mai lea 'au'aunaga fa’aleoleo nana ua fa’ailoa mai e silia ma le ta’i 20 tausaga a la’ua tautua i lea itu o le matagaluega o leoleo. Ua fa’ailoa mai ua matua ofo lava Mark Sullivan i le lipoti ua taua’aoina nei e tusa ai o le amioga sa faia e ana leoleo nana i Colombia.

O se fa’amatalaga mai le vaega a le Maligi Koa lea e aofia ai ni isi e to’alua mai la latou vaega i lea su’esu’ega, ua fa’aalia ai, o ali’i maligi nei e a’afia i le fa’aletonu lea, o ni isi o a latou sui e taulimaina maile sosogi mo fuala’au fa’asaina, peita’i, sa tu’uina ane i la’ua nei e fesoasoani i le vaega o leoleo nana a le Malo tele i le taimi lea o le taligamalo i le peresetene.

Ua fa’ailoa mai e le fale pa’epa’e, o lo ’o tumau pea lava lo latou fa’atuatuaga i le malosi o le leoleoga ma le puipuimalu mai a le Vaega o Leoleo Nana a Amerika i le 'aumalaga ae maise o le tausia o le saogalemu o Amerika atoa, tusa lava pe fa’amaonia nei tu’ua’iga ua alia’i mai i ana leoleo nana.

saunia: Leua Aiono Frost