I le feiloaiga fa’apitoa a le Senate ma le Sui Faipule mai Uosigitone i le taeao ananafi, na fa’amanino aloaia ai loa e le tofa a Aumua Amata lona tulaga o loo tu ai e fa’atatau i le mataupu e uiga i totogi amata, aemaise ai o lana silasila mamao i se gaioiga e tatau ona faia e Amerika Samoa e mafai ai ona foia lenei fa’afitauli i le lumana’i.

O le iloiloga ma le tofa a Aumau na fa’atautaia lea e le afioga i le ali’i Senatoa ia Galea’i M. Tu’ufuli, o le ta’ita’ifono o le Komiti o le Fa’agaioiga o le Malo, lea fo’i na komiti aoao i ai le maota.

Ina ua fesiliga e le Senate ia Aumua i sona finagalo e fa’atatau i le mataupu i totogi amata, na saunoa ai le Tama’ita’i Faipule e fa’apea, na te lagolagoina le tatau ona si’i totogi o tagata, ae i se isi fo’i itu, e ao fo’i ona silasila toto’a ta’ita’i o le atunu’u i a’aiaga o le tamaoaiga o le malo e ono tula’i mai ai i lenei mataupu.

Mo se fa’ata’ita’iga o itu e ao ona silasila toto’a i ai le malo e pei ona saunoa Aumua, e na o le tasi le auala o loo fa’alagolago malosi i ai le tamaoaiga o le malo, e na o kamupani i’a, ma e mana’omia fo’i e latou le tu’u atu o le lagolago a le malo i a latou taumafaiga.

Saunoa atili Aumua e fa’apea, e tatau ona fa’ateletelegese pea se fa’aiuga a Amerika Samoa i lenei mataupu, aua o loo tele isi mataupu e tatau ona silasila toto’a muamua i ai, e pei o le tulaga i tupe a le malo lea e le o mautu mai i le taimi nei, aemaise ai fo’i o fa’afitauli i va’a fagota ma le utiuti o le i’a o loo maua mai mo kamupani i’a.

“I lo’u talitonuga, e sili atu le i ai o le siaki laititi nai lo le leai o se totogi e maua,” o le isi lea saunoaga a Aumua.

Ina ua fesiligia e le afioga a Laolagi Fonoti Saval Vaeao ia Aumua i sona finagalo e fa’atatau i le talosaga ina ia fa’aagafua le fa’aiuga e fa’amalosia loa le fa’aopoopo o le isi $0.50 mo le totogi amata i le aso 30 Setema 2015, ae na saunoa Aumua, na te lagolagoina le tatau lea ona toe tolopo atu i tua le aso e fa’amamalu ai le siitaga.

Ae ina ua fesiligia e Tuaolo M. Fruean le tama’ita’i faipule, pe a fa’apefea ae le taliaina e le konekeresi le talosaga a Amerika Samoa, pe fa’aauau pea ona fa’ataunu’u le fa’aopoopo o le isi .50sene, na tali Aumua, afai e le talia le talosaga, lona uiga e fa’aauau pea le si’itaga o totogi amata.

A o taumatemate e ta’ita’i o le atunu’u ma le malo, pe talia e le Konekeresi le talosaga a Amerika Samoa pe leai, na fa’ailoa ai e Aumua i afioga i Senatoa e fa’apea, o loo la galulue soosoo tauau pea ma le Fofoga Fetalai o le Maota o Sui a le Konekeresi e fa’atatau i lenei mataupu, ina ia mautinoa e maua mai se tali lelei mo le tapuaiga a le atunu’u.

Na fa’ailoa e atili e Aumua e fa’apea, e i ai lona talitonuga e talia e le Konekeresi le talosaga a Amerika Samoa, ona o sui o le Konekeresi, e le gata e tu’u avanoa ae loto alolofa fo’i toe malamalama i le tulaga pagatia o loo fetaia’i ma Amerika Samoa.

Na fesili Tuaolo ia Aumua pe na te lagolagoina le manatu, ina ia toe taoto mai le iloiloina o totogi amata a Amerika Samoa, e fai lava e Amerika Samoa, e pei o le faiga sa sau ai i tausaga ua mavae, nai lo le taoto atu i le malo tele latou te faia, ae le o malamalama i latou i le tulaga pagatia o loo i ai Amerika Samoa, na saunoa Aumua, na te lagolagoina le tulaga lea.

Na faailoa atili e Aumua i le Senate e fa’apea, o le agaga moni lena o loo ia te ia, e tatau ona toe fa’afo’i mai i Amerika Samoa le iloiloina o totogi amata, aua e malamalama lelei Amerika Samoa i le malosi o le totogi amata e gafatia e lona tamaoaiga.