Aua e te ofo pe a e toe asiasi ane i le Maketi i Samoa ua fa’atau atu ai le Araisa ma le Aniani lea e masani ona fa’atau mai fafo! Ua matua toeitiiti lava a mae’a galuega fa’ata’ita’i a le Ofisa o Fa’ato’aga i lea fo’i tulaga, ia mautinoa lava, ua gafatia e Samoa ona fagaina lona atunu’u i taimi leaga.

Manatua, o le alaisa e umi ona teu, fa’atutumu ai falesaito o le nu’u o Aikupito, ina ia fagaina le nu’u i taimi o le oge. Lea ua fuli nei Samoa e fa’ata’ita’i i na faiga lelei, talosia, ae mafai ona fa’asoa mai i’inei. O le tomai ma le sosia lea sa tatau ona fa’asoa mai i vaitami o fonotaga a malo na lua, sa tatau fo’i ona fofoga ai se pese a le tatou malo e talosaga ai i Samoa e fa’asoa mai.

O se mea lelei lea, tatau ona masi’i i tatou i le Sisigafu’a a Samoa ia Iuni, ae talosaga atu i ai, e la’u mai Saina lea e mafai ona faia nei fa’ato’aga se’i fa’ata’ita’i mai ia i tatou, ae ua lava nei saina fai togakapisi lea ua i ai nei. O le mea e fai atu ai, ona o le vave ona pala o Kapisi a le ‘au matapuiti.

O lo’o ua faia nei fetufa’iga i le va o le Malo o Samoa ma Saina, ina ia mautu se fa’ata’ita’iga lelei mo le totoina o le aniani ma le araisa i Samoa, ma ua toetoe la selesele le ulua’i seleselega o le araisa lea e totoina fa’apitoa mai le eleele matutu i le fa’ato’aga i Nu’u, po’o le eleele ua fa’aaogaina e le Matagaluega o Fa’ato’aga a Samoa e totoina fa’ata’ita’i ai fa’ato’aga fa’ato’a fa’ata’ita’ia ai i le mamalu o le au faifa’ato’aga a Samoa ina ia fa’alautele ona sapaia.

E tusa ai ma se fa’amatalaga mai le taiulu o le matagaluega o fa’ato’aga, Fonoiava Seali’itu Sesega, ua ia fiafia ai e fa’ailoa mai, toeititi ona fa’ato’a fa’atau mai lea o le seleselega o le Araisa ua totoina i Samoa lava mai le fa’ato’aga i Nu’u. E tofo i ai le atunu’u pe tusa ma so latou mana’o, ona fa’ato’a fa’atauina atu lea i fafo.

Ua fa’ailoa e Fonoiava, “O le tatou araisa e eseese ma le araisa o lo’o ua tatou masani ai i faleoloa ma e aumaia mai fafo. O le araisa lea e aumaia i faleoloa, e totoina i le eleele vailaloa po’o eleele vaito’a. O le tatou araisa o lo ua totoina lea i ele’ele e fa’aleai se suavai e pa’u i ai.”

E tusa ma le ono masina talu ai na totoina ai le fa’ato’aga araisa ma aniani, o se isi poloketi aoga ua fofoa mai i mafutaga ma lea fo’i malo o Saina.
Ua fa’ailoa mai, “E matua tetele lava le seleselega lenei, ma ua tatau ona tatou tatalia manuia o le Atua mai fo’i galuega fa’atino mo se lumana’i manuia o Samoa e ala i nei ituaiga o fa’a’ele’eleaga.”

O le fa’atauina atu o nei fa’a’ele’eleaga o le a fa’ailo ai i le Matagaluega o Fa’ato’aga, po’o talafeagai ma le fofoga taumafa o le atunu’u, ae o se mea lelei le Araisa nai lo le talo, ona e tau leai ni fa’ama’i e a’afia ai ma e umi lava ona teuina lona fatu, e autausaga fa’ato’a pala lea.

O le tau amataina o lenei ituaiga o poloketi na fa’ataoto e le Matagaluega o Fa’ato’aga mo ni nai tausaga ua tuana’i, ae fa’afetai ua mafai ona fa’atautaia i lenei vaitaimi, e taumafai ai le malo, e tapena le atunu’u mo vaitau e le taugalemu ai, i tulaga o suiga ogaoga o le tau e pei ona tatou ola ai nei, ua mautinoa lava o le a u’umi taimi e la ai le atunu’u ae tau le toulu se timu ma afaina ai le fofoga taumafa o le atunu’u e ala i meatoto.

O se tasi o fili ua iloga mai e afaina ai fa’ato’aga Araisa i le malo o Samoa, o le manulele lea o le ‘maina’[mynah] lea fo’i e ta’atele ia i tatou i’inei, ua fa’ailoa mai ua matua piki e i latou le fatualaisa ae le’i matua ma ua avea ma latou mea’ai i aso uma le o ane i Nu’u mo le latou seleselega ae o lo’o tatali tagata o le atunu’u. Ua fa’ailoa mai, e le Matagaluega o Fa’ato’aga, ua mafai fo’i ona fa’aititiia lea lava fa’afitauli, ona o ala ua sailia e i latou le aufaigaluega.

O le aniani latou, o se mea fa’amanogi mea’ai a aiga uma o le atunu’u ma le lalolagi, e le taumatea le taulia o lea oloa. Ua ia fa’ailoa mai fo’i, o le tele o le tupe alu i fafo a le Malo e fa’atau mai ai nei ituaiga o oloa, o le a sefe atoa, pe afai o le a totoina e tatou lava faifa’ato’aga tatou aniani, ma toe fa’atau atu i malu tua’oi. Ua fa’ailoa mai e tusa ma le piliona tala i le tausaga, e fa’aalu e le malo mo le totogi o aniani lava latou i le tausaga e tasi.

“O se i si lea sefe tele a le malo, pe afai o le a mafai ona totoina e i tatou lava tatou aniani, ma ua amata totogo a’e aniani sa totoina, ma o le taimi lava e mautinoa au, ua lelei fo’i lea itu o le fa’ato’aga, ma ua tatau ona a’oa’oina ai le atunu’u i ona faiva alofilima po’o le ‘au faifa’ato’aga, ona fa’ato’a tatala atu fo’i lea i tua o lea manuia e taumafai mai i ai le au fai fa’aele’eleaga.”

saunia: Leua Aiono Frost