O suiga e tolu ua faalauiloa e le afioga i le kovana sili ia Lolo Matalasi Moliga ua ia faia i le Ofisa o Femalagaaiga a le malo, e aofia ai ma le suia o le Pule o lea Ofisa ae sui tulaga i ai Dennis Fuimaono Lutu, e mafua lea ona o le manatu ia faaleleia le tautua a lea Ofisa i le atunuu.

O isi suiga e aofia ai le aveese mai o Kolumane Fuimaono ae sui tulaga atu i ai le tofa ia Limutau F. Limutau lea sa avea muamua ma faipule i le maota o sui, ma le alii o Kalama Sekio lea ua sui tulaga atu i ai Fualaau Unutoa.

O ia suiga na mafai ona faamaonia mai i se poloaiga faalauaitele na sainia e le alii kovana i le aso 16 Ianuari, peitai e lei taua mai ai igoa o sui e toatolu o le Ofisa o Femalagaaiga o le a aveesea, peitai ina ua fesiligia le sooupu a le kovana, sa ia faamaonia mai ai suafa o i latou nei e toatlu.

Ina ua fesiligia le tofa Iulogologo Pereira i le mafuaaga o nei suiga, sa ia taua ai e faapea, talu ai le tele o faafitauli o lo o tulai mai i le Ofisa o Femalagaaiga o lo o taumafai e faaleleia, o le mafuaaga lea ua faia ai e le alii kovana suiga e pei ona faalauiloa mai.

Na taua e Iulogologo e faapea, o lo o tumau pea ona galulue i latou nei i le Ofisa o Femalagaaiga, e faatali ai se isi faaiuga mai le afioga i le Loia Sili ia Afoa Moega Lutu.

Ina ua fesiligia le afioga Ufuti i le taeao o le aso Faraile na tea nei e faatatau i le poloaiga faalauaitele a le alii kovana, sa ia taua ai na te le’i mauaina se kopi o le poloaiga, ae ina ua toe fesiligia o ia i le aoauli o le aso lava lea, sa ia faamaonia mai ai lona maua o le kopi o le poloaiga a le kovana, ma o lo o faatali i se faaiuga aloaia mai le Loia Sili e faatatau i lona galue ai i le Ofisa.

Saunoa Ufuti, e ui i suiga ua faia, sa ia fautuaina lona Ofisa ina ia faaauau pea galuega lelei ma ia faamaoni i le tautuaina o le atunuu.

O le maea ai o se fonotaga faapitoa a le alii kovana ma le loia sili, sa ia tuuina mai ai loa lana poloaiga e faatulaga ai suiga e pei ona taua.

Na taua e le tofa Lolo le maualuga o lona talitonuga, o le pule fou o le Ofisa o Femalagaaiga ua tofia nei, o le a mafai ona ia taitaiina le ofisa ina ia faaleleia atili tulaga o lana tautua mo le atunuu.

Na taua foi e Lolo e faapea, i lalo o le tulafono o lo o tuu atu ai le malosi i le Loia Sili na te tofia ai se tasi e avea ma pule o le Ofisa o Femalagaaiga, ae talu ai o mataupu nei o mataupu ma’ale’ale ae o lo o aafia ai foi faiga faapolokiki, ua ia manatu ai e faapea, o tofiga ua faia ua ia talitonuina o le a mafai ona foia ai faasea ma fesili e tele mai le atunuu e faatatau i le faamaoni o le tautua a lea Ofisa.

Saunoa Lolo, o faiga faavae fou o le a faia i lenei ofisa o le a mafai ai ona faatula’i e taofia ai amioga le sao ma faiga faaalatua mai le faaauauina pea lea ona faia i le lumana’i.

Sa ia taua foi e faapea, o le manulauti a le faigamalo fou ua i ai nei, ia fai le mea amiotonu ma le faamaoni.

Ua ia faalauiloa foi lona sauni e tuuina mai sana tofiga mo sui o le komiti faafoe a le Ofisa o Femalagaaiga, lea o le a aofia ai ni isi o le atunuu lautele, tagata faipisinisi atoa ai ma i latou uma e i ai agavaa i le faia o faaiuga moni ma le sa’o.

I lalo o le tulafono, e toalima totino o le Komiti Faafoe o le Ofisa o Femalagaaiga e tatau ona tofia, ma o i latou foi o ni Nesionale o le Iunaite Setete o Amerika. E tofia i latou e le kovana ae faamaonia e le Fono Faitulafono, ma e tatau ona tai 5 tausaga le umi e galulue ai i latou nei.

faaliliu Ausage Fausia