Ads by Google Ads by Google

Tolopo siitaga a le LBJ mo le isi 20 aso

Fesiligia faipule tino maliu taofia ina ua le mafai ona totogi pili falema’i

Ua malilie le pulega a le Falema’i o le LBJ e toe tolopo a latou siitaga sa fuafuaina mo le Aso Faraile na te’a nei mo le isi 20 aso.

I se pepa o fa’amatalaga na tu’uina mai e le  pulega a le falemai i le Aso Faraile na te’a nei, na fa’amaonia mai ai e le Taitaifono o le Komiti Faafoe o le LBJ ia Moananu Va, sa ia fa’amaonia mai ai le toe  tolopoina lea o siitaga a le falema’i.

Saunoa Moananu e fa’apea, ina ua mae’a sa latou feiloaiga ma le alii kovana fa’apea ai ta’ita’i o le fono i le vaiaso na tea nei, na malilie ai le komiti faafoe ina ia toe fa’ateletelegese a latou si’itaga mo le isi 20 aso.

O le fa’alua ai lea ona tolopo e le falemai a latou si’itaga, lea na fa’amoemoe e fa’amamalu i le aso 24 Tesema na te’a nei, peitai na toe tolopo mai mo le aso 14 Ianuari, o le Aso Faraile o le vaiaso na tea nei.

E talitonu ni isi o faipule, afai ae si’i pili a le falemai, e le o se ata va’aia lea o se fesoasoani mo i latou i le itu tau tupe, ae o le a atili ai ona mamafa le fa’afitauli tau tupe, ona o le to’atele o le atunu’u o le a le mafai ona agai atu i le falemai ona o le taugata o pili o le a i ai.

O se tasi o mataupu na fesiligia e faipule i lea iloiloga, o tino maliliu o tagata o loo taofia pea i le fale maliu i Fagaalu, ona o le le totogiina lea o pili a le falemai.

O lea mataupu na fesiligia e le afioga i le alii faipule ia Lemapu Talo Suiaunoa, i le maea ai lea ona ia tauaaoina o ni faasea mai nisi o le atunuu e uiga i lea mataupu, lea na faamaonia mai e le teutupe a le falemai o Viola Babcock.

Na taua e Babcock e faapea, afai o se tagata maliu ua le mafai ona totogi e lona aiga le pili a le falemai, o le a taofi lona tino sei vagana ua maea ni feutanaiga ma le aiga mo le totogiina o le pili, ae mo tagata mai fafo, e taumafai le falemai e faia ni feutanaiga ma le sponsor mo le totogiina o le pili.

O lea mataupu na fesiligia e Lemapu ona o se tino maliu o loo i ai pea i le fale maliu talu mai le masina o Oketopa 2010, ina ua le mafai e le aiga ona totogi le pili, peitai na faatoa mafai ona faia feutanaiga ma le aiga ina ua agai atu i le masina o Tesema na tea nei mo le faatalatalanoaina o lea mataupu.

Na fautuaina e le alii faipule le pulega a le falemai ina ia silasila totoa i mataupu faapenei, aemaise lava i a latou tulafono e taofia ai tino maliu pe a le mafai ona totogi le pili, ina ia mafai ona o latou faia ni feutanaiga faakerisiano.

Na tatala lava galuega a le Fono Faitulafono i le vaiaso na tea nei, i le ave lea o le faamuamua a taitai o le fono i le sailia lea o auala e maua ai se fesoasoani tau tupe, ina ia fesoasoani ai i le tulaga pagatia o loo aafia ai le falemai, faatasi ai ma fautuaga sa tuuina atu i ai ina ia faateletelegese a latou siitaga o loo fuafua i ai.

O nisi o gaioiga a le Fono e aofia ai pili tupe e tolu ia ua maea ona faaulu e le Senate i le vaiaso na tea nei, e fesoasoani ai i le tulaga pagatia ua i ai le falemai i le itu tau tupe.

O se tasi o ia pili tupe e aofia ai le $3 miliona lea ua fuafua e faatupe mai i le Teugatupe o Taui mo Tagata Faigaluega, lea na fuafua e faitau tolu i le aso Faraile na tea nei, peitai na toe aveese i tua mai le kalena a le maota maualuga.

Na faamalamalama e le sui peresetene o le maota ia Tulifua Tini Lam Yuen se fuafuaga e toe tuuina atu ai lea tulafono e faitau tolu i le taeao nei.

E lei faailoa e Tulifua i luma o le maota le mafuaaga ua ala ai ona toe aveese le pili mai le kalena a le Senate, peitai na saunoa le taitaifono o le komiti o le LBJ/Soifua Maloloina a le Senate ia Galea’i Tuufuli e faapea, e foliga mai e le o manatu mamafa le Senate i le tulaga pagatia o loo i ai le falemai, e ala i le faatuatuai lea ona faia o sana faaiuga i le tulafono taufaaofi lea ua pasia.

Ua i ai le faamoemoe o le aso Lulu o le vaiaso nei o le a toe faaauau ai le iloiloga a le komiti a le maota o sui ma le pulega a le falemai, mo le talanoaina o le mataupu e uiga i le faafitauli tau tupe o loo feagai ma le falemai i le taimi nei.

E lei faatulagaina se aso e faia ai se iloiloga a le falemai ma le maota maualuga.