O le aso Tofi o le vaiaso fou i le itula e 5:00 i le afiafi i le Ofisa Palota i Tafuna ua fa’atulaga e faia ai le filifiliga a tagata palota uma o le motu o Swains, mo le sailia o se latou sui e nofoia le nofoa o le itumalo mo le isi lua tausaga o lo o soso’o nei.

O ananafi na fa’atulaga e le Komesina o Palota ia Tuaolo Manaia Fruean e fa’ataunu’u aloaia ai lea filifiliga, ae talu ai o ni isi o mafua’aga tatau e pei ona saunoa le ali’i faipule o lo o i ai nei ia Su’a Alexander Eli Jennings, o le mafua’aga lea ua toe tolopo ai lea feiloaiga.

“O le isi mafua’aga o le toe tolopo o le fonotaga a tagata Swains sa fuafua e fa’ataunu’u i le aoauli nei, ona e to’atele isi tagata palota o le itumalo e le o avanoa i le vaiaso nei, ma mafua ai loa ona faia le fa’aiuga e toe tolopo mo le vaiaso fou”, o le saunoaga lea a Su’a i le Samoa News.

Ae o le toe tolopo ai o lea fonotaga e pei ona taua e Su’a, o se itu lelei lea mo tagata palota uma o Swains, ina ia mafai ona latou maua le avanoa e auai i le fonotaga ma fa’aali o latou finagalo i le filifiliina o se latou sui mo le Fono Faitulafono a le atunu’u.

“E taua tele le avanoa lea ua mafua ai ona toe tolopo le feiloaiga sa fuafua e faia i le taeao a taeao (taeao nei), ma ou te talitonu o le a taua manatu e fa’aalia e tagata palota o Swain e fesoasoani i se sui o le a tasi i ai le filiga i le vaiaso fou”, o le isi lea saunoaga a Su’a.

O le tausaga e 2005 na amata filifilia mai ai e tagata matutua o Swains le susuga Su’a e avea ma o latou sui i le Fono Faitulafono seia o o mai lava i le taimi nei.

E pei ona silafia, o le sui o Swains e le palota i totonu o le maota o sui, ae mafai ona fa’aleo sona finagalo i le taimi o felafolafoaiga a komiti po o taimi fo’i o iloiloga, aua o ia o lo o avea ma taitaifono o le Komiti o le Puipuiga o le Saogalemu Lautele a le maota o sui, atoa ai ma isi komiti o lo o avea ai o ia ma totino.

Na taua e Su’a i se fa’atalatalanoaga ma le Samoa News i le lua vaiaso talu ai e fa’apea, o ni isi o mataupu o lo o ia finau pea ina ia fa’aulu i luma o le Fono Faitulafono mo Swains, o le fa’aulu lea o se suiga i le Fa’avae ina ia mafai ai ona i ai se sui o Swains i le maota maualuga, atoa ai ma lona finauina pea lea o le mataupu e fa’atatau i le tu’u atu lea o le aia e mafai ai ona palota le sui o Swains i totonu o le maota o sui, aua o le taimi nei, e le o mafai ona palota le sui o Swains.