Tolopo le aso o le Tuuga Fautasi

O le Tuuga Fautasi lea na faatulaga e le malo e faataunuuina i le aso Toona’i o le vaiaso nei, ua tolopo faatoa faataunuu i le aso Lulu, Novema 27, 2013, ona o nisi o faaletonu le maalofia, e pei ona faamaonia mai e le Faatonusili o le Matagaluega o Fefaatauaiga ma Alamanuia i le Samoa News, susuga Keniseli Lafaele.

 

O le tuuga fautasi e pei ona fuafuaina, o se polokalame lea e taualuga i ai polokalame faagasolo a le malo mo le tolu masina, lea na amata mai i le masina o Setema seia oo mai i le masina nei o Novema.

 

O le masina o Setema e pei ona taua e Lafaele i sana imeli i le Samoa News ananafi, sa faamanatu ai i le teritori le vaiaso o le ‘Coastal Week’, sosoo ai loa ma le vaiaso e faataua ai ‘auvai’ ia Oketopa, ae faai’u i le masina lenei o Novema, lea e faataua ai le aufai faatoaga.

 

I le finagalo la o le alii kovana ia Lolo Moliga e pei ona saunoa Lafaele, ua manatu ai e taualuga polokalame o le PALS (People Air Land and Sea) sa faamanatu mai i le tolu masina lenei, i se tuuga fautasi.

 

Na faamalulu le susuga Lafaele i kapeteni ma auvaa uma ua leva ona tapena mo lenei faamoemoe, ona o le faafuase’i o le faaaliga e faailoa ai le toe tolopo o lenei faamoemoe, peitai i lona talitonuga, o le a avea le lelei o faailoga ua tapena e talafeagai ma le umi o le taimi o faatali au vaa mo le faataunuuina o lenei faamoemoe.

 

O ananafi na faatulaga e faia ai se fonotaga a le Komiti o lo o tuufaatasia lenei faamoemoe ma sui o auvaa taitasi, mo le faalauiloaina o nisi o vaega sa moomia le faaleleia a’o lumana’i ai le tuuga, peitai sa faafuase’i ona faailoa mai e se sui o le komiti i le Samoa News, ua toe tolopo atu e le Ofisa o le kovana le faataunuuina o lea faamoemoe.

 

O le polokalame faataoto a le komiti o lo o tuufaatasia le faamoemoe, o le tuuga e amata atu i Pago Pago i le vaega lea e masani ona tini mai ai tuuga fautasi masina, ona aga’i atu lea i le Pole muamua lea o le a faatu i gatai o Aua, ona mimilo mai lea iina o fautasi ae toe faaauau atu i le Pole lua i gatai o Lauli’i, ma toe mimilo mai ai loa le tuuga ma toe fo’i mai i Pago Pago i le vaega na amata atu ai, o iina foi lea ua faamoemoe e toe tini ai le tuuga.

 

O le vaiaso nei na amata vaaia ai nisi o fautasi i le atunuu ua amata a latou koleniga masani i luga o le sami, e pei o le Fuao mai Vatia lea na sola ma le siamupini o tuuga fautasi o le sisiga fu’a o le 2013.

 

E pei ona silafia e le atunuu, o le auala lea na faatautaia ai le tuuga fautasi o le sisiga fu’a o le tausaga nei, e amata atu le tuuga i Pago Pago i le vaega e tini mai ai va’a, ona alu lea i gatai o Laulii ma liliu mai ai, ma toe faaauau atu i Pago Pago i le vaega na amata mai ai le tuuga, o le auala tonu fo’i lena ua manatu le komiti e faatinoina ai le tuuga o lo o fuafua mo se taimi o le masina nei.

 

O le polokalame mo le faatauaina o puipuiga o le sami, laueleele atoa ai ma tagata o lo o tuufaatasia lea e matagaluega a le malo e aofia ai le AS-EPA, Matagaluega e Puipuia le Gataifale ma le Vaomatua, Matagaluega o Faatoaga, atoa ai ma le Matagaluega o Fefaatauaiga ma Alamanuia.

Comment Here