Ads by Google Ads by Google

Tolopo faaiuga Komiti Senate i le Tulafono taofi ai sauaga faasaga i fanau

Na avea le saunoaga a le Loia Sili ia Afoa Suesue M. Lutu na tuuina atu i luma o le Komiti o Tulafono a le Senate i le taeao ananafi, e faatatau i le leai o sona silafia i le tulafono lea ua i luma nei o le Fono Faitulafono e faamanino atili ai puipuiga i le sauaina o fanau  laiti, ma itu na faia ai se faaiuga a le Komiti e sili pe a toe tolopo le iloiloga se’i maua se finagalo o le Loia Sili.

 

E taunuu atu Afoa i le iloiloga ananafi ua toatele sui o le komiti ua maea ona latou fesiligia le loia fautua a le Fono ia Nathaniel Savali, e tusa ai o le agaga tonu o lenei tulafono taufaaofi ua i luma o le maota.

 

Ina ua fesiligia e le komiti ia Afoa i sona finagalo, na saunoa o ia e faapea, e le mafai ona tuuina atu sana molimau i luma o le komiti e tusa ai o le tulafono, leaga e le’i faitau muamua o ia i le pili.

 

Ina ua faailoa i ai e le taitai komiti ia Soliai T. Fuimaono o le pili lenei sa galulue ai loia a le fono atoa ai ma loia mai le ofisa o le loia sili, na toe tali Afoa e faapea, e foliga mai o le pili lenei na afua mai i le nofoaiga ua mavae atu, o le mafuaaga fo’i lena na te le iloa ai le agaga o lenei tulafono taufaaofi.

 

Ae na taua e Savali i luma o le komiti e faapea, masalo e lua tausaga o latou galulue ma le Ofisa o le Loia Sili i le toe faia o ni suiga i le tulafono ua leva ona i ai, e puipuia ai fanau mai le aafia i sauaga i totonu o aiga, i le maea lea ona tuuina mai o se faaiuga a le faamasinoga maualuga ma latou taua ai, o lo o i ai se feteenaiga i le gagana o le tulafono o lo o i ai ma le Faavae o le malo.

 

E le gata la o loia na galulue i le tau toe faatulagaina o le gagana ma ni suiga i le tulafono o lo o i ai, ae sa mafai fo’i ona tuu atu i ai ma ni manatu mai ni isi o fa’amasino e pei ona taua e Savali i luma o le komiti, ma tula’i mai ai loa le tulafono e pei ona taoto nei i luma o le fono.

 

I le tino o le tulafono ua i luma nei o le Fono, o lo o vaevae mai ai le eseesega o le sasaina o fanau ma le faia o sauaga fa’asaga i fanau.

 

O lo o faapea fo’i ona manino mai ai tulaga o le fa’atamala o matua e faataunuu a latou tiute i le tausiga o le fanau, ma i’u ina tula’i mai ai ni fa’alavelave e aafia ai le soifua mo fanau.

 

Mo se faataitaiga e pei ona faamanino e le alii loia ia Savali, e i ai matua e tuulafoa’i na o fanau i le fale ae o i le Bingo, o ni isi fo’i matua e tuu fanau i totonu o le taavale ae o e i totonu o faleoloa e fai faatau, ma o ni isi nei o gaioiga o lo o manino i le vaega fou o le tulafono lea ua talanoaina i le taimi nei, e mafai ona nofosala ai matua pe afai e faamaonia sa latou faatamala.

 

O ni isi o faalavelave sa tutupu i totonu o aiga na matua aafia ai fanau e pei ona taua e le alii loia, o le saisai lea o fanau ma loka i totonu o le potu o se fale, pe faia fo’i i ai ni isi ituaiga sauaga matuia.

 

E ui sa to’atele ni isi o totino o le komiti na o latou lagolagoina le tatau lea ona faapasia loa lenei tulafono, peitai mo le alii senatoa ia Nuanuaolefeagaiga S. Nua, sa ia fautuaina le komiti ina ia faateletelegese le pasiaina o lenei tulafono, ae aami ni isi molimau mo le tuuina mai o ni latou finagalo e faamanino atili ai lenei tulafono.

 

Saunoa Nuanuaolefeagaiga e faapea, afai ae pasia le tulafono lenei, o le a tula’i mai ai se feteenaigal tele i le va o le tulafono ma tu ma agaifanua a Samoa, e pei o le sasa lea o fanau ina ia faatonu ma a’oa’i.

 

Fai mai le alii senatoa mai Manu’a, e le gata o le a avea le tulafono lenei ma itu e lalafi ai fanau mai le sasa a matua, ae o le a leua ane lava ma loka matua ona o le tulafono, e ui o lo o taumafai matua Samoa e sasa ma faatonu a latou fanau i auala e tatau ona ola ai.

 

Mo se faataitaiga e pei ona saunoa le alii senatoa, afai e sasa e matua se tasi o le fanau ae maosia le lima po o le vae, o le taimi lava e taunuu ai lea tamaititi i le faleaoga e vili ai loa e le aoga leoleo ma loka ai fua lea o matua ona o le tulafono lenei, ae le iloa o lo o taumafai matua e aoao fanau ina ia usita’i.

 

Na taua foi e le alii senatoa e faapea, e foliga mai o le agaga o le tulafono ia saili ai ni tupe mo le malo ae le o taumafai moni e puipui le saogalemu o fanau.

 

Ua faia le faaiuga a le komiti o le a taoto le talanoaina o lenei tulafono, sei maea ona faitau i ai le loia sili ma tuuina atu sona finagalo ona faatoa alo atu loa lea o le komiti mo sana faaiuga.