O le aso 18 e oo atu i le 22 Iuni o le a galulue faatasi ai le polokalame a le 4H ma le Land Grant a le Kolisi Tuufaatasi faapea ai ma le U.S Army Reserve Unit e tuu faatasi se mafutaga mo vasega o fanau o fitafita a le militeli, lea e faatupe mai e le U.S Dept of Defense.

O le uluai taimi lea ua faia ai lenei polokalame ma ua faaigoaina o le Auaunaga mo Fanau Militeli.

Na taua e Aufai Apulu Areta, talu ai o le tulaga i le alagatupe o loo faatupe ai lenei polokalame, ua manatu ai e le tatalaina i tua le polokalame, ae o le a galulue faatasi ma le vaega o le Ami Faaleoleo.

O i latou sa malaga mai mo lenei faamoemoe e aofia ai sui o Ami Faaleoleo mai Hawaii, UH Manoa ma isi mai North Carolina State University, ma ua galulue faatasi ma le Ami Faaleoleo iinei faapea ai ma sui o le JROTC.

O polokalame e 10 ua faamoemoe e aoaoina i fanau e aofia ai auala e faaaupegaina ai fanau ina ia iloa ola i soo se siosiomaga, ma i le 5 tausaga e oo atu i le 17 tausaga le matutua, ma e lata i le toa 100 fanau o loo auai i lenei polokalame, e pei ona faia i le malae taalo i Tafuna.

Sa vaevaeina i vaega taitasi le polokalame, ina ia aoao ai fanau i soo se tomai e pei o le faia o galuega alofilima, aoao auala e iloa ai faamalositino ma ia lelei le mafaufau, faiga o galuega taulima, faiga o elei ma isi galuega taulima, totoina o laau, faiga o faatoaga, faapea ai ma le aoaoina o fesootaiga faaonaponei.

Vasega 8 O le tapenaga o le fanau ia iloa ona fa’aaoga lelei Masini Komipiuta ma latou aoga sili o feso’ota’iga ma fetufa’iga i luga o nei masini e fa’avave ai le atamai o i latou i a’oa’oga i potu aoga.

Vasega 9 o le mataituina lea o le gaosiga o mea’ai Samoa ia lelei ai le feso’ota’iga o fanau a Samoa ma ituaiga meatausami lelei e maua ai le soifua maloloina, ma le vasega 10 o ituaiga o ta’aloga Samoa e aoga tele i le fa’aleleia o tomai eseese o fanau e tapena ai i latou mo se olaga faafitafita e i ai le ta’igati’a, Kirikiti, velovelo tao, ta’aloga afeleti ia lelei ai le manava ma fa’aititia ai le mamafa tele o latou tino.

O Aufai sa avea ma fofoga o le polokalama i aso ta’itasi na fa’atautaia ai, ma o ia e fa’asoloa le fesuia’iga o vasega i le fanau ia mae’a ane le aso e tasi ua so’o lelei le fanau i nei vasega ‘ese’ese. Sa i ai vasega fa’apitoa na fa’apito augafa o latou aso e faia, e aofia ai le feso’ota’i a le tamaititi Samoa ma ala e gaosia ai mea’ai samoa, na tu’u lea i le toe aso o le polokalama, fa’apena fo’i ta’aloga samoa, sa tu’u lea mo le aso Tofi.

“Ua tu’ufa’atasia uma ni tomai e feso’ota’i ai le fanau ma isi, ia feso’ota’i fo’i ma le aganu’u fa’asamoa, ia feso’ota’i ma lona si’omaga, ma ia masani fo’i i latou e tau amata olaga fa’amiliteri ma latou lu’iga, ae maise o le fa’aaoga tatau o le taimi ma le atamai e fausia ai ma tu’ufa’atasia so’o se mea aoga e fa’aaoga ai ni mea ua ia maua i lona si’omaga.” O sana fa’amatalaga lea ma le fiafia e va’ai atu i galuega ua tino a le fanau.

O loo faia i isi nofoaga o le Ami Faaleoleo i Hawaii ma Amerika lenei polokalame, ma ua faamoemoe e toe faia i le tausaga fou.