Ads by Google Ads by Google

TOLAU API O LE ASO FAAFETAI

O lenei Aso Fa’afetai, ua manatu Ta’ita’i ma latou fesoasoani o le Uarota a Tafuna 1st, e tatau ona faia le latou Tolauapi e fa’afiafia fa’atasi uma ai le Uarota e silia ma le 250 totino o i ai, i matua fa’atasi ma fanau.

O le polokalama na amata fa’ataoto mai ma fa’atulaga nofoaga e fa’atino ai i le aso Lulu, ae fa’ato’a a’e le tolauapiga i le aso Tofi, e patino i le aso Fa’afetai ma amatalia i se aso o ta’aloga  volipolo ma pasiketipolo a le fanau talavou, o faitauga tusi, ma a’oga o fa’amalositino eseese mo e matutua ma e mo’omia ona fa’aititia pauna, ma le latou ‘aiga tele fiafia fa’atasi i le aoauli.

Na toe fa’aauau latou ta’aloga, e filifili lava le tagata po’o le a le ituaiga o ta’aloga e fia tauva ai, ma ua iloga le matagofie o lea aso, ina ua oo i le afiafi toe tolaapi i le malae o lo’o i autafa o le lotoa, ma ua fa’amoli atoa lea malae ina ia mafai ona talanoa ma pepese fiafia ai le ‘au pa’ia atoa i Tafuna 1st.

Sa latou tatalo mo le filemu ia mautu pea i o tatou tagata i Samoa na lua. Sa tatalo fo’i mo le manuia o aiga ta’itasi i le atunu’u atoa ae maise le latou fo’i ekalesia. Sa tatalo fo’i mo tupulaga talavou ia tumau i le amio pa’ia ma le agaga fa’a-kerisiano.

O le aso ananafi, sa fa’aauau ai ta’aloga mai le taeao, ae saunia lava mea’ai mo le aiga latou, ma tapena ai mo le afiafi o ta’aloga e fa’amae’a ai le liki o ta’aloga o fa’atautaia. E moni lava e fa’afiafialoto i ta’aloga, ae o lo’o saili lava se siamupini i ta’aloga ta’itasi o fa’atautaia. O lo’o i ai fo’i le komiti o ta’aloga, e nafa ma lea itu, ina ia saunia lelei ni fa’amanuiaga mo taumafaiga eseese.

Ona toe alafa’i mai fo’i lea fa’aauau ta’aloga ma isi fa’amalositino ae fa’ato’a fa’ai’u lava le latou lea fa’atasiga i le To’ona’i tele i le aso Sa e faia lea i le lotoa a le Ekalesia i Ottoville lava.  Afai o oe o se talavou e le o mautu sou manatu i se mea e te fia ‘auai e fa’afiafiaina ai oe i lenei vaitau o le ola fa’afetai, saili ane i lea fo’i Ekalesia, e talia fiafia oe e le latou au talavou ma o latou totino uma o i ai i nei aso uma o le fa’ai’uga o le vaiaso.

O se fa’amatalaga mai a Bishop Afualo sa ia fa’apea ai, “O lenei tausaga ua ese lona fa’atautaiga, ua filifili e fa’apea ona faia le mafutaga a le Uarota atoa, ina ia fa’amaopoopo atili agaga fa’afetai i totonu o aiga ona aotelega mai lea i totonu o le Uarota Tafuna 1st. Fa’afetai ua ese le matagofie o lenei tausaga o ona polokalama fa’atautaia i ta’aloga eseese, ae maise o le faigalotu fa’atasi i afiafi ma toe pepese ma maimoa ata mo le aiga atoa ona fa’ato’a ta’ape ai lea!”