Ads by Google Ads by Google

TOGIOLA: AUA LE FAIA SAINI AE FA’AALI LOU TAOFI I LAU PALOTA

O lea foi ua toe tula’i mai faiga le manuia o loo faia e nisi o le atunuu i saini a paga o loo tauva i le palota tele o loo loma nei, o le faaleaga lea o saini o loo faatutu i vaega eseese o le atunuu, e pei ona i ai le saini a Faoa/Taufete’e o loo i Atu’u lea sa faaleagaina e nisi i le taeao ananafi.

Ae na taua e se sui mai le Ofisa autu a Faoa/Taufete’e i le Samoa News, e le o mamafa tele ia i latou le faaleagaina o le saini, na pau le itu o loo atugalu i ai i latou, ia mautinoa o loo saogalemu le aiga e ana ia le fanua lea sa faatu ai i luga le saini.

Na taua e le sui o le Ofisa a Faoa/Taufete’e, o le saini na faatoa faatu i le afiafi o le aso Tofi, peitai e malama ane le taeao ua faaleaga e tagata, ae le iloa poo ai sa latou faaleagaina.

“Na mafua ona faatu le matou saini i le fanua o le aiga lea, ona o le latou talosaga mai e avatu se saini a Faoa/Taufete’e e faatu i le latou fanua, sa i ai foi sui o le aiga i le taimi na faapipi’i ai e tama le saini,” o le saunoaga lea a le sui o le Ofisa.

“E leai se taua o le saini, e leai foi se mea e maua mai ai, pau le mafuaaga e faatu ai i luga le saini o le faalauiloaina lea o sui tauva mo le palota, talosia o loo saogalemu si aiga sa talosaga mai mo le saini ina ia faatu i le latou fanua,” o le saunoaga lea a le sui o le Ofisa.

E le’i malama lelei le taeao ananafi, ae logo mai e se molimau le Samoa News e uiga i le faafitauli ua tulai mai i le saini o loo faatu i le ituala e faafesaga’i tonu ma le nofoaga tuai sa i ai le kamupani i’a a le COS Samoa Packing ua tapunia.

Sa maitauina e le Samoa News le sasae e se tagata o le saini ae sasa’a i ai se apa vali, ae o lalo ifo o le saini o loo taatia ai se atigi apa vali.

Na vaaia le aga’i atu o nisi o le atunuu i a latou taavale i le taeao ananafi, ma matamata ai i le tulaga ua oo i ai le saini, ma o nisi sa na o le lulu o latou ulu e le mau gagana ma savavali ese ae o isi sa fai mai, “o tagata sa faia le mea lea e matua leai lava ni faiai, ailoga fo’i na mafuta i matua,” o le sa’i lea a le isi tama matua a’o vaavaai atu i le tulaga faaletonu o le saini.

O se tina sa i ai i le taimi ina ua taunuu atu le Samoa News, sa ia faailoa lona vaaia o ni alii pe a ma le toatolu sa inupia ai i le fale faatali pasi lea e tu tonu ai lava le saini i tua, i le po o le aso Tofi na te’a nei.

Fai mai le tina le, o alii sa inupia ai i luma o le fale faatali pasi o tupulaga lava mai Atuu, peitai na taua e se alii ave pasi, e usu atu i le vaveao i le te’a o le 5:00 e momoli tagata faigaluega a le kamupani i’a, o loo nofonofo atu ni alii se to’alua i le fale faatali pasi ma la fagupia.

E le’i manuia taumafaiga a le Samoa News mo le tau sailiina mai lea o se finagalo o le alii faipule a Atuu, afioga Tuumolimoli Saena Moliga e uiga i lenei mataupu. Sa fiu e vili lana telefoni sa tuu mai e lona aiga e le’i taliina.

E le o se taimi muamua lea ua tulai mai ai se faafitauli e faaleaga ai ni mea o loo faatutu i Atu’u.

I se taimi e le’i mamao atu na faaleaga ai foi e nisi le pou o le faailoilo mo taimi o faalavelave faalenatura, ae o lea foi ua oo le lima te te o tagata i saini a sui tauva.

I le masina na te’a nei, na tuuina atu ai e le kovana sili ia Togiola Tulafono sana fautuaga i le mamalu o le atunuu, ina ia taofi le amio lea ua amata ona aliali mai o le faaleaga fua lea o saini a sui tauva e aunoa ma se mafuaaga.

“Tuu sui tauva e fai a latou folasaga ma faaali o latou finagalo, o uiga na e atagia atu ai le malo Temokarasi, ae aua le tiga ai fua le loto o le isi tagata pe afai e fai se faamatalaga a le isi sui tauva, aua o le faigamalo lena sa tatou malilie uma i ai, aua le faia fua le laupapa ae faaali lou finagalo i lau palota,” o le saunoaga lea a Togiola.

Saunoa Togiola, afai e faia e Samoa ituaiga amioga nei, ona ta’u atu lea i le lalolagi e le’i taitai lava matua le mafaufau o Samoa i tulaga faavaomalo.

“E le te’ite’i tutupu mea nei, e mafua ona tutupu ona ua vaivai le vaavaaiga a matua i fanau, ua faatamala pulega a nuu, ekalesia ma aiga i le mata’ituina lea o tupulaga ma fanau poo fea o loo i ai i le afiafi ma le po atoa,” o le saunoaga lea a le alii kovana.

Na taua e le sui o le Ofisa autu a Faoa/Taufete’e, o le taimi muamua lea ua faailoa atu ai sa latou saini ua faaleaga e ni tagata, e ui sa faaleaga muamua a latou mitiafu ina ua susunu se container i Pago Pago ma faaleagaina ai i le masina na te’a nei.