Na faailoa e le alii kovana i luga o lana polokalama i le faaiuga o le vaiaso na tea nei e faapea, ana pasia e le Senate pili tupe sa tuuina atu e le malo latou te pasia, e leai ni siitaga i pili a le falema’i e faia, e le faalogoina foi le oi o tagata i le taugata o pili a le falemai.

E ui e le o se taimi muamua lenei ua saunoa ai le afioga i le matua ia Togiola Tulafono i lenei mataupu, ae ina ua ia toe saunoa ai i luga o lana polokalama na te’a nei, e silia ma le faatasi ona ia taua le fuaiupu lea, “ana pasia e le Senate pili tupe sa tuuina atu e leai ni siitaga a le falemai e faia.”

O lea mataupu na tomua i ai mataupu na valaau atu i ai le atunuu i le kovana, ina au faaalia e se tootoo lona faanoanoaga i le tulaga ua i ai siitaga i pili a le falemai lea ua faalauiloa, ona e taugata atu pili o tagata mai fafo nai lo tagata Amerika Samoa ma i latou ua avea ma tagata nofomau.

Na taua e le tootoo e faapea, afai o lea ua saunoa le Ao o le malo o Samoa, “O Samoa e le o se malo o le uso ma le aiga,” aisea la ua ese ai pili e totogi e tagata mai fafo ese pili e totogi e tagata Amerika Samoa, ae o lea ua fai mai o Samoa o le aiga e tasi.

Fai mai le tootoo, o siitaga i pili a le falemai lea ua faalauiloa mai, e matua le gafatia lava e lona aiga pe a fuafua i lana siaki o loo maua mai i lana galuega, ma, afai o le tulaga lea o le a i ai pili a le falemai, e sili ai ona alu i Apia e talavai ai e taugofie.

Na faamanino e Togiola i le tootoo le mafuaaga e ala ai ona eseese tupe e totogi e tagata mai fafo ma tagatanuu o Amerika Samoa i le falemai, ona o tulaga i tulafono a le malo, e pei foi ona i ai tulafono a isi atunuu e pei o Samoa faapea ai setete eseese a le malo tele.

Mo se faataitaiga e pei ona saunoa le alii kovana, o fanau aoga a Amerika Samoa o loo malaga atu i setete i fafo e aooga ai, e maualuga atu pili o loo latou totogiina nai lo fanau aoga o setete ia, e ui o Amerika Samoa o le isi teritori o le malo tele, peitai e le avea lea ma itu e suia ai tulafono a setete ma isi foi atunuu o le lalolagi.

Ae i le tulaga o siitaga a le falemai na taua ai e le alii kovana e faapea, “ua mafua ona tulai mai le faafitauli lea i pili a le falemai, ona ua teena e nisi o Senatoa pili tupe sa ou tuuina atu i ai.”

Na taumafai Togiola e faamanino i le atunuu e faapea, e musu e faalaua’itele lana tala i le Fono Faitulafono, leaga e le o le Fono atoa lea o loo tete’e i ana pili tupe, sei vagana ai nisi o Senatoa alii ma tamaitai, aua e to’afa isi Senatoa sa latou palota ioe i ana pili tupe.

O le fuafuaga a le alii kovana na mafua ai ona ia faauluina pili tupe nei, ona o le manatu e faaee lafoga i le atunuu, ina ia faasafua ai i le atunuu atoa le totogiina o tupe e fesoasoani ai i le falemai, ae afai e alu lava le tagata e totogi lana talavai, o le a sili atu ona mamafa ma faigata mo le atunuu e pei ona vaaia i le taimi nei.

Saunoa Togiola, ua fiu foi e faamalamalama i le Senate le aano o pili tupe sa ia tuuina atu e fesoasoani ai mo le falema’i, peitai e foliga mai e le fia malamalama i latou, ma ua atagia mai ai i lona loto, e foliga mai e mafua ona le fia malamalama ona o loo fia tete’e i latou i le kovana.

Na faamalulu Togiola i le atunuu ona o siitaga a le falemai e pei ona fuafuaina, peitai i lona talitonuga, e leai se isi alofaaga e aga’i i ai le falemai pe afai ua le pasia e le Senate pili tupe, nai lo le sii loa o totogi o ana tautua.

O le masina fou lea ua faamoemoe le falemai e amata faamamalu ai ana siitaga ia ua faalauiloa mai, peitai na saunoa Togiola, e ui o lea ua fuafua le falemai e sii ana pili, ae o loo tumau pea lona faanaunauga, talosia ae toe sui finagalo o Senatoa o loo tetee pe a toe tauaofia le Fono i le masina fou.