E lua vaiaso lea ua tuuina atu e le Kovana Sili i le Task Force sa ia tofia, e galulue ai mo le tuuina atu o se tali i ni auala e foia ai le faafitauli o lo o tula’i mai i le toese i Tafuna i le taimi nei, i le to’atele naua o pagota o lo o taofia ai.

O le fonotaga a le alii kovana ia Lolo Moliga ma sui o le Matagaluega o le Puipuiga o le Saogalemu Lautele i le aso Faraile na te’a nei, atoa ai ma sui o le Ofisa o le Loia Sili, na tofia ai loa se Task Force latou te vaavaaia auala e foia ai le faafitauli.

O le gaioiga e tofia le Task Force, o le ulua’i la’asaga lea ua faia e le alii kovana, talu ona mae’a lana asiasiga i le toese i le vaiaso na te’a nei, lea sa ia maitauina ai le tele o faafitauli o lo o fetaia’i ma le falepuipui.

O nisi o ia faafitauli e pei ona ia taua i le Samoa News i le mae’a ai o lana asiasiga, e le gata e le o lelei fale o lo o nonofo ma tausi ai pagota, ae ua toatele naua pagota i totonu o potu ae le lava sela e tatau ona nonofo ai i latou.

O le tele o sela e pei ona taua e le pule tuai o le falepuipui ia Cpt. Lumana’i Maifea, e tatau ona to’afa pagota e taofia ai, peitai o le taimi nei ua ova atu ma le to’afa.

Na taua e le Faufautua faapitoa a le alii kovana ia Iulogologo Pereira i le Samoa News e faapea, e lua vaiaso lea o le a galulue ai le Task Force, mo le tuu faatasia o sa latou ripoti e tuuina atu i le alii kovana, e faailoa atu ai auala e foia ai faafitauli o lo o fetaia’i ma le toese.

“E le gata i lea, o le a faailoa foi e le Task Force i le latou ripoti auala o lo o mafua ai ona toatele pagota o lo o taofia i le toese i le taimi nei,” o le saunoaga lea a Iulogologo.

O sui o le Task Force e aofia ai le Komesina o Leoleo ia William E. Haleck, o le loia sili lagolago ia Eleasalo Ale, o le loia fautua a le alii kovana ia Steven Watson, o le Loia Fautua ia Douglas Fiaui atoa ai ma le pule o le falepuipui, le susuga a Fo’ifua Fo’ifua Jr, lea e le’i leva ona maea le tofiaina o ia e le alii kovana e avea ma pule le tumau mo le toese i le taimi nei.

Na faamanino e le susuga Cpt. Maifea i le alii kovana e faapea, o se tasi o mafuaaga ua ala ai ona toatele naua pagota o lo o taofia i le toese, ona o lo o taofia atu ai ma tagata o lo o i ai a latou mataupu i le Ofisa o Femalagaaiga, o le isi lea faafitauli tele o lo o tauave e le toese i le taimi nei, o le tausi ma fafaga tagata o lo o taofia ona o tulaga faaletonu i a latou pepa nofomau.

O isi fo’i tagata o lo o tumu i le toese e pei ona saunoa Maifea, o tagata e aafia i le gasegase o le mafaufau, o lo o taofia i le toese mo ni taimi umi, ma o lo o gafa leoleo o le toese i le feavea’iina o i latou i le falema’i mo a latou talavai, e ui o lo o manino le tulafono, o le tiute lea o le Matagaluega o le Soifua Maloloina, o le fausia lea o se fale e tausi ma nonofo ai i latou nei.

E fia faailoa atu e le Samoa News, o lo o faagasolo pea feutanaiga a le malo mo le fausiaina o le falema’i e togafiti ai i latou e aafia i le gasegase o le mafaufau.

Na taua e Lolo i le Samoa News e faapea, e leai se mea o le a taofia umi ai fua se tagata i le toese pe afai e leai se solitulafono o lo o tuuaia ai.

Mai le to’a 215 o le aofa’i o pagota sa faamauina i le aso Lulu na te’a nei lea na asia ai e le alii kovana le toese, o le to’a 86 o i latou nei o tagata e le’i maea ona lau a latou faamasinoga, ma o lo o taofia i latou ina ua le mafai ona latou totogi vaega tupe sa faatulaga e tatala ai i latou i tua.