O le polokalame mo le fa’amanatuina o le 116 tausaga talu ona avea Amerika Samoa ma se tasi o vaega o le aiga o le Iunaite Setete o Amerika i lenei tausaga, o lo o aofia ai ma le tofiaina o le Sui Failautusi o le Ofisa o le Initeria ia Esther Kia’aina e saunoa i le saunoaga autu o le sisiga fu’a, pe a mae’a le saunoaga fa’apitoa mai le ali’i kovana o le atunu’u, le tofa Lolo Matalasi Moliga.

O le fonotaga mulimuli a le Kapeneta i le vaiaso nei a o lumana’i ai le tatala aloaiaina o polokalame o le sisiga fu’a o lenei tausaga i le aso Gafua o le vaiaso fou, na fa’amaonia ai e le Taitaifono o le Komiti o Tapenaga o le Fu’a, le afioga i le Lutena Kovana ia Lemanu Peleti Mauga tulaga uma o le polokalame lea ua mae’a ona fa’amautu.

O ni isi o malo fa’aaloalogia ua fa’amaonia le auai mai i le fa’amanatuina o le aso fiafia o Amerika Samoa, e aofia ai Ao Mamalu o le malo o Samoa, afioga Tui Atua Tupua Tamasese Efi, o le Kovana o le teritori o Northern Mariana ia Ralph Deleon Guerrero Torres, fa’apea ai fo’i ma le Palemia o Samoa, susuga Tuilaepa Sa’ilele Malielegaoi, fa’apea ai ma le mamalu eseese o ta’ita’i o le Tafatolu o le Faigamalo a Tutuila ma Manu’a.

E pei ona saunoa Lemanu i le fonotaga a le Kapeneta e fa’apea, o le auai mai o le Sui Failautusi o le Ofisa o le Initeria i le sisiga fu’a o lenei tausaga, o se avanoa lea ua tu’u atu e le faigamalo i le Ofisa o le Initeria e pei ona faia i ni tausaga se tele ua mavae, e maua ai le avanoa e saunoa ai se sui o le malo feterale i le sisiina a’e o le tagavai o le malo tele i lau fanua o Amerika Samoa.

E pei ona masani ai i tausaga uma pe a fa’amanatu le sisiga fu’a a le atunu’u, e tatala polokalame uma i le sauniga lotu e faia i le Aso Sa, Aperila 17, 2016 i le Fale Laumei i Utulei, i lalo o le ta’ita’iga a le susuga Rev. Siaosi Mageo, lea fo’i o le a molimauina e sui o le aufaigaluega paia a le Atua i fata faitaulaga eseese i le atunu’u, fa’apea ai ta’ita’i o le malo.

O le itula e 6:00 i le taeao o le aso Gafua, Aperila 18 ua fa’amoemoe e amata gasolo ai au savali mo le fa’amaopoopoina o a latou tulaga i le malae o le Veterans Stadium i Tafuna, sosoo ai loa ma le aga’i atu o malo fa’aaloalogia, ao le i amataina sauniga o le fu’a i le itula e 8:00, i lalo o le ta’ita’iga a le susuga Pr. Uili Solofa, o le ta’ita’i o le Ekalesia Aso Fitu i Amerika Samoa.

O le tofa a Masaniai Pili Masaniai o le a ia faitauina le poloaiga fa’alaua’itele a le kovana mo le fa’amanatuina o le sisiga fu’a o lenei tausaga i le gagana Samoa, ae o le tama’ita’i o Justine Gago na te faitauina le gagana fa’aperetania.

O le sisiina o le fu’a a le Iunaite Setete o Amerika, o le a sisiina lea e Siitia Mase ma Manino Alailefaleula, ae o le sisiina o le tagai a Amerika Samoa, o le a sisiina lea e Uputaua Faleali’i ma Kirikiti Aulaumea Jr, o sui uma ia o le Aoga Maualuga a Kanana Fou, ao taiina e le Faili pu a le USMC Marching Band vi’i o ia tagavai e lua.

O le mae’a ai o saunoaga fa’apitoa o le aso, ona fa’agasolo ai loa lea o savali fa’aaloalo, ma amata ai loa fa’afiafiaga o le aoauli e le au fa’afiafia a le aoga maualuga a Fa’asao Marist, mo le fa’alauiloaina lea o a latou fa’afiafiaga lea ua fa’amoemoe e auina atu i Guam, e fai ai ma sui o Amerika Samoa i le Fa’aaliga lona 12 o Tu ma Aganu’u a le Pasefika i le masina fou o Me.

O le fa’asologa o pese ma siva fa’aleaganu’u e mulimuli mai ai, o le a muamua mai ai le pese ma le siva a Manu’a, sosoo ai le Falelima i Sasa’e, Samoa, ae taualuga e le Falelima i Sisifo, ma fa’ai’u ai loa polokalame o le fu’a o lenei tausaga i le tufatufaina o fa’ailoga iloga.

E pei ona faia i sisiga fu’a uma talu ona tula’i mai le faigamalo a Lolo ma Lemanu, o le a maua fo’i pepa taumafa maua fua ta’i $5 mo le mamalu uma o le atunu’u e autova’a atu i le malae ta’alo i Tafuna i le aso o le fu’a.