Ads by Google Ads by Google

Tofia Save suesueina faiga fa’aalatua o lo o tula’i mai totonu malo

Ua tofia nei e le afioga i le kovana sili ia Lolo Matalasi Moliga le afioga a Save Liuato Tuitele, e faauluulu i ai le Ofisa fou lea ua faavaeina i totonu o le Ofisa o le kovana sili, mo le suesueina o faiga faaalatua ma faiga tau faasese o lo o tula’i mai i totonu o le malo

 

O le mataupu lenei na fesiligia ai le alii kovana ina ua salalau tala ma fesiligia ai e ni isi le autu moni ua ala ai ona tofia le afioga a Save e galue i lenei ofisa, ae o lea o lo o i ai le Matagaluega o Leoleo o le latou fatuaiga tausi lea, atoa ai ma le Matagaluega o le OTICIDE o lo o mafai ona galulue vaavaalua ma le Vaega a le Feterale i le suesueina o faiga faasolitulafono e ono aafia ai tagatanuu atoa ai ma le faaaogaina o tupe mai le feterale.

 

Na faamanino e Lolo e faapea, e i ai mataupu o lo o tulai mai i totonu o le faigamalo e manaomia le faia i ai o ni suesuega, ina ia mafai ai ona vave maua sona silafia i nei mataupu a’o le’i tuuina atu i le Ofisa o le Loia Sili ma le Ofisa o Leoleo mo isi suesuega.

 

“O le galuega a le Ofisa a Save o le gafa lea ma le suesueina o mataupu faaletonu o lo o tulai mai i le malo e pei o faiga faaalatua atoa ai ma le soona faaaoga le tatau o meatotino a le malo, ma o le latou galuega o le faia lea o suesuega ma faailoa mai ia te a’u a latou ripoti,” o le saunoaga lea a Lolo.

 

O le agaga autu o le alii kovana, ia vave tuuina atu faamatalaga e faatatau i mataupu faapenei i lona ofisa, ae le’i faia lana faaiuga i le isi laasaga e tatau ona faia pe afai e faamaonia o lo o tulai mai mataupu nei i totonu o le malo.

 

Sa ia faamatalaina foi e faapea, o le a avea le afioga a Save ma ona sui vaaia i soo se taimi i le taulimaina o mataupu faapenei.

 

O le a mataitu e le ofisa a Save tulaga uma i gaioiga e faia i totonu o matagaluega a le malo, e aofia ai tagata e ulufale atu i totonu ma i latou e agai atu i fafo i le faatinoina o galuega.

 

“Afai ae maua ane i suesuega a le Ofisa lea o lo o i ai ni faiga le talafeagai o lo o faia i totonu o le malo, ona ou tuuina atu loa lea o le ripoti o le Ofisa o le Loia Sili e galulue faatasi ai ma le Ofisa o Leoleo, aua o i latou ia o lo o i ai le malosi e suesueina ai mataupu faapenei ma molia i luma o le tulafono,” o le saunoaga lea a le alii kovana.

 

Sa ia taua foi e faapea, “O le agaga autu o lenei taumafaiga, ia puipuia le malo mai le aafia i faiga tau faasese faaalatua atoa ai ma le soona faaaoga o ana meatotino.”

 

E $100,000 le tupe na taua e Lolo sa ia talosagaina i le Paketi Faaopoopo lea ua pasia e le Fono Faitulafono e faatupe ai le Ofisa lenei.

 

O le masina na te’a nei na pasia ai e le Fono Faitulafono le paketi faaopoopo e $5 miliona mai le Ofisa o le Kovana, mo le faamoemoe e faatupe ai ni isi o manaoga e pei o le faatutumuina o tupe na faaalu i totogi faaiu a le nofoaiga ua mavae atu, totogi ai tupe ua poloai e le faamasinoga le malo e totogi, ma faatino ai isi manaoga mo le nofoaiga fou.

 

Na pau le galuega a le Ofisa o Save o le suesueina lea o mataupu e tutupu i totonu o le malo, ae le o i ai se malosi latou te molia ai se tasi i le faamasinoga e pei ona saunoa le alii kovana.

 

O ni isi o mataupu e aafia ai faiga faaalatua na tula’i mai i le malo o le mataupu e pei ona aafia ai ni isi o tagata faigaluega a le Ofisa o Femalagaaiga, lea ua mafua ai ona molia ni tagata faigaluega se toalua i le tulafono i le faia o faiga faaalatua atoa ai ma le faaaoga faagaoi o tupe sa totogi atu e tagata mai fafo mo a latou pone i le faafouina o a latou pepa nofomau i le teritori.

 

Na taua e Lolo e faapea, o suesuega o le a gafa ma Save e aofia ai mataupu i tagata e ulufale mai ma toe ulufafo atu ma le atunuu.