Ads by Google Ads by Google

Tofia Perelini e avea ma Taitaifono Komiti Fa’afoe ASPA

I ni isi o poloaiga faalaua’itele ua maea ona sainia e le afioga i le alii Kovana Sili, ia Lolo Matalasi Moliga, ua ia faalauiloa ai lona filifilia o Perelini Perelini e avea ma Taitaifono o le Komiti Faafoe a le Faalapotopotoga o le Eletise ma le Suavai (ASPA), faapea ai ma le tofia o Henry Tavake e avea ma Faatonusili le Tumau mo le Ofisa o le Sports Complex.

I lana tofiga mo le Komiti Faafoe a le ASPA, na taua ai e le tofa Lolo e faapea, ”ina ia tusa ai ma le Faavae toe teuteu a Amerika Samoa, ua ou tofia ai Perelini Perelini na te tauaveina tiute ma galuega a le Taitaifono o le Komiti Faafoe a le ASPA, seia oo atu i le taimi e faamaonia ai o ia e le Fono Faitulafono, poo le taimi foi e maea ai le umi ua ia tofia ai o ia.”

O le susuga a Perelini sa avea muamua ma ‘Chief Operations Officer’ a le ASPA mo le tele o tausaga.

Sa faapea foi ona ia tofia ai ma isi totino e to’afa o le Komiti e lagolagosua i le susuga a Perelini.

O totino e toafa o le Komiti ua toe filifilia i ai le sui tuai e toatasi ia Vaa Sokelati, ma sui fou e toatolu e aofia ai Peter Crispin; Isabel Hudson ma Daniel King.

“O i latou nei ua ou tofia, o le a galulue pea i o latou tiute o totino o le Komiti Faafoe seia oo atu i le aso e faamaonia ai i latou e le Fono Faitulafono,” o se vaega lea o le saunoaga a Lolo i lana poloaiga.

Sa ia taua foi e faapea, “Ua ou talitonu ma le mautinoa o sui fou nei o le Komiti Faafoe o le a latou tuuina mai le agavaa o lo o moomia, mo le faaleleia o le tautua a le ASPA, ma latou aveesea ai tulaga maualuga ua i ai le tau o le eletise i Amerika Samoa.”

Ua talosagaina foi e Lolo le atunuu ina ia malamalama ma tuu atu la latou lagolago ia i latou nei, ao latou galulue ai e una’i aga’i i luma le tautua a le ASPA mo le atunuu.

Mo le tofiga a le susuga a Tavake, sa taua e Lolo, le tumau ai o lana galue i le tofiga ua tofia i ai o ia, seia oo i le taimi e tofia ai se Faatonusili tumau ma faamaonia mai e le Fono Faitulafono.

Ua toe faasa’o mai foi le tofiaina o Liua Fatuesi e avea ma Faatonusili le Tumau mo le Ofisa Su’etusi a le Teritori (Territorial Audit Office), ae le o Francis Faumuina e pei ona ia ulua’i faalauiloa

O le tofiga mo Fatuesi e pei ona taua e Lolo, o le a ia tauaveina tiute ma tofiga o le Faatonu mo lea Ofisa, seia oo i le taimi e tofia ai se Faatonu tumau ma faamaonia mai e le Fono Faitulafono.

E oo mai lava i le taimi nei e le’i nofoia e le afioga i le alii kovana sili ma lona aiga le maota o le malo i luga o le Mauga o Alii, faapea ai foi ma le afioga i le lutena kovana ia Lemanu Peleti Mauga ma lona aiga, latou te le’i nofoia foi le maota o le lutena kovana i Utulei.

Na taua eFiu Johnny Saelua e faapea, o galuega mo le toe faaleleia o fale nei e lua ua mafua ai ona tuai le nofoia e Lolo ma Lemanu ma o la aiga.

E pei ona silafia, o le maota o le kovana i luga o le Mauga o Alii sa nofoia lava e le afioga i le matua ia Togiola Tulafono ma lona aiga, ao avea ai o ia ma kovana o le malo, ae mo le maota o le lutena kovana i Utulei, e le’i nofoia lava e Faoa Aitofele Sunia ma lona aiga talu ona maea le toe faafouina i le tausaga na te’a nei.

E le o mautinoa mai le umi e faagasolo ai galuega mo le toe faaleleia o maota o le malo.