Ads by Google Ads by Google

Tofia Moetului avea ma Pulesili o le Ofisa o Tiute

O le faaiuga o le masina ua te’a na toe faia ai e le Teutupe a le malo ia Dr. Falema’o Phil Pili se tasi o suiga i totonu o le Ofisa o Tiute, lea o lo o i lalo o le vaavaaiga a lana Matagaluega o Tupe, ma ia tofia ai le afioga ia Moetului Sipili Fuiava e avea ma Pulesili o le Ofisa o Tiute, e sui tulaga ia Lee Agava’a Lele’a.

 

I le tofia ai o Moetului e faauluulu i ai le Ofisa o Tiute, ua tofia ai loa Lele’a e galue mo le Ofisa o Femalagaaiga a le malo.

 

O se tasi o mafua’aga na taua e Pili i lana tusi sa tuuina atu i le Ofisa o Tiute, faatasi ai ma kopi sa tuuina atu i le kovana sili ma le lutena kovana, o le taumafai pea lea ina ia faatumauina le tulaga maualuga o le auaunaga a lea ofisa ma faaauau pea le galulue faatasi mo le puipuia o tupe a le malo, e ui ua i ai ni nai suiga laiti ua vaaia i le taimi nei.

 

O le tofia ai o Moetului na te tauaveina lenei tulaga taua, o le a ia faatinoina ai tiute uma sa tauaveina e le Pulesili o le Ofisa o Tiute ua mavae atu, e ala i lona vaavaaia o le tautua a le Ofisa atoa, ma ia mautinoa e tulaga lelei le vaavaaiga o lea auaunaga, aemaise ai le tuuina atu i ripoti i taimi tatau.

 

O le a galulue soosoo tauau fo’i le afioga a Moetului ma le Pulesili lagolago o le Ofisa o Tiute, faapea ai ma le Teutupe a le malo.

 

O le isi suiga e pei ona taua e Falema’o i lana tusi, o le tofia pea lea o Loloaso Easter Wightman e avea ma Pulesili lagolago o le Ofisa, o le a galulue soosoo tauau o ia ma Moetului i le vaavaaia ma le mataituina o le auaunaga atoa a le Ofisa, aemaise ai o le lagolago lea i le faatinoina o tiute tauave a le Ofisa i aso taitasi.

 

O le susuga ia Konelio Tufele lea ua toe tofia e galue i le vaega o le ‘Customs Executive Administrative Assistant’, o lo o a galulue soosoo tauau fo’i ma le Pulesili faapea ai le Pulesili lagolago i tulaga uma e faatatau i le tautua a le Ofisa.

 

O le susuga ia Fa’atauva’a Uitualagi ua tofia e galue i le vaega o le ‘Finance/Compliance Officer’ mo le Ofisa o Tiute, o le a galulue soosoo tauau ma Moetului i le auiliiliina lea o pili a le Ofisa mai taimi ua tuana’i atoa ai ma le taimi nei.

 

O le faatolu ai lea ona faia suiga i le tofiga o le Pulesili mo le Ofisa o Tiute talu ona tula’i mai le faigamalo fou aemaise ai o le faaiuga e faamalolo ia Vaetagaloa Glen Lefiti mai le tulaga o le Pulesili sa ia tauavea mo le tele o tausaga.

 

E pei ona silafia, o le faaiuga e faamalolo ai Vaetagaloa mai lona tulaga sa i ai, na afua mai i le faalavelave lea na aafia ai se tagata faigaluega a le Ofisa o Tiute, ina ua ia alu atu ma piki mai se afifi mai le Falemeli i Fagatogo e aunoa ma le tuuina atu o le afifi e siaki e alii Ofisa mai le vaega o Tiute, ma le faatinoina ai loa e Vaetagaloa lona tiute o le ta’ita’i o le Ofisa, e logo ai lona pule e uiga i lenei mataupu.

 

O le afioga ia Moetului na ulua’i tofia e Lolo e ala i le avea o ia ma totino o le Komiti Faafoe o le Ofisa o Femalagaaiga.