Tofia isi sui e to’aono o le Komiti Fa’afoe o le Litaea

O le vaiaso nei na taunuu ai i luma o le Fono Faitulafono tofiga fou a le afioga i le Kovana le tumau ia Lemanu Peleti Mauga, mo i latou e to’aono ua tofia e avea ma totino o le Komiti Fa’afoe o le Litaea a le malo.

 

O i latou nei: Sonny Thompson; Beaver T. Ho Ching; Dr. Falema’o ‘Phil’ Pili; Maaelopa Bob Tuiasosopo; Magalei Logovi’i ma Aleki Sene Sr.

 

I se vaega o le tusi a Lemanu i ta’ita’i o le Fono i le aso 28 Mati 2014 sa ia taua ai e fa’apea, o suafa uma o i latou ua taua i luga, ua silafia uma i latou e le Fono e tusa ai o a latou tautua ma auaunaga i le malo.

 

O Thompson ua malolo litaea mai i vaega au a le malo tele i ni tofiga maualuluga i le 1993, ma o lo’o avea nei o ia ma fa’atonusili o le Matagaluega o Tagata Faigaluega a le malo.

 

O le susuga Ho Ching o se alii faipisinisi lauiloa i le atunuu, lea o lo o ia faafoeina ma lona aiga le kamupani tele o le CBT Ho Ching, o se kamupani o lo o faatauina atu oloa fau fale i le atunuu.

 

O le tausaga e 1971 e oo mai i le 1995 sa avea ai o ia o le isi pule sili mo le kamupani, mulimuli ane i nai tausaga sa sosoo ai seia oo mai i le taimi nei, ua avea o ia ma peresetene, o ia fo’i o lo o taulimaina tulaga uma ma mea totino a le pisinisi.

 

O le susuga ia Pili ua tele lona tomai i le itu tau tupe a le malo, sa galue fo’i i isi lala o le malo e pei o le LBJ, TOFR, sa avea foi ma sui o le Fono i le 2004 e oo mai i le 2006, ma o le taimi nei, o lo o avea o ia ma teutupe a le malo.

 

O le susuga ia Tuiasosopo, o se alii faipisinisi ua silia i le 25 tausaga o ia faafoeina nei ituaiga matata. Sa galue o ia i pisinisi tua i Los Angles, ma o le tomai i tulaga tau pisinisi o lo o ia te ia, o le a fesoasoani malosi ai i le faaleleia atili o galuega a le Komiti Fa’afoe.

 

O le afioga i le alii senatoa ia Magalei e pei ona taua e Lemanu i lana tusi, o lo’o avea nei ma totino o le Komiti Fa’afoe a le Litaea, ma e tele fo’i lona tomai i galuega a le malo e pei ona galue ai i le Ofisa o le Paketi, mulimuli ane avea ma Teutupe a le malo i tausaga ua mavae.

 

E faapena fo’i i le susuga a Sene e pei ona taua e Lemanu, lea o lo o avea ma taitaifono o le Komiti Faafoe a le litaea i le taimi nei.

 

Saunoa Lemanu e faapea, na amata galue mai lava Sene i le vaega o le litaea i le taimi na fa’atoa amata mai ai lenei teugatupe, seia oo mai i le taimi nei e pei ona fa’alauiloa ai le oo atu o tupe teu a le litaea i le $211 miliona.

 

Ua malolo litaea o ia i le taimi nei i le maea ai o le silia i le 40 tausaga o avea ma pule o le ulua’i Ofisa o Fesootaiga a le atunuu, lea na toe suia e avea ma Pulega o Fesootaiga a Amerika Samoa.

 

E talitonu Lemanu, o le tomai o lo o ia Sene i galuega e fesootai ma teugatupe o le litaea, o le a fesoasoani malosi lea i le fa’aleleia o galuega a le komiti faafoe fou.

 

E pei ona silafia, mai sui e to’a 7 o le komiti faafoe tuai na tofia e le kovana ma tuuina atu i luma o le fono, e na o le to’atasi lava na pasia e le Fono, o le susuga lea ia Tofala Iafeta, ae na teena uma le isi to’a 6.

 

O tofiga fou e pei ona taua, ua faamoemoe le fono latou te iloilo ma fesiligia i le fono faapitoa a le kovana lea ua nofoia nei, i se iloiloga faapitoa ua valaauina e le taitai komiti o le Litaea a le maota maualuga ia Avegalio Aigamaua, lea ua fa’atulaga mo le itula e 8:30 i le taeao nei.

Comment Here