Ads by Google Ads by Google

Tofia Afoa na te fa’aauauina tofi Senatoa

Ua tasi le fa’afitiga o aleaga i le afioaga o Fagatogo ma Utulei, o le afioga i le Loia Sili o le malo, le Aloali’i ia Afoa Suesue M. Lutu o le a avea ma Senatoa o le itumalo, na te faaauauina le tofi na amata mai e le afioga i le Tapunuu ia Fa’agata Mano Fa’agata ua tu’umalo.

 

Ina ua fesiligia e le Samoa News ia Afoa e tusa ai o lenei tofiga maualuga, sa ia faamaonia mai lona taliaina o le tofi ua lafo atu e le afioaga e tautua ai i le Fono Faitulafono, o le isi lea vaega o le tafa tolu o le faigamalo a Amerika Samoa.

 

Na faamaonia mai e le afioga i le alii faipule ia Maugaoali’i Leapai Tusipa Anoa’i i le Samoa News e faapea, o le fonotaga sa faia i le aso Lua na te’a nei na tasi ai le afioaga o Fagatogo ma Utulei, e avea Afoa ma o latou sui i le maota maualuga a le Senate.

 

Na taua e Maugaoali’i e faapea, sa tasi le afioaga o Fagatogo e toe filifilia le afioga i le Tapunuu ia Tiumalu Telesia Tiumalu e avea ma latou senatoa i le Fono, ae ina ua tuu atu le avanoa i le afioga a Tiumalu mo sana saunoaga, na lafo ai loa e Tiumalu le fa’aaloalo ia Afoa mo le faaauauina o le tofi.

 

I le ulua’i fonotaga a le afioaga o Fagatogo i le lua masina talu ai e saili ai se tasi e sui tulaga i le afioga Fa’agata ua tuumalo, na tasi ai le finagalo o le afioga ia Tiumalu o le a fai ma senatoa o le itumalo, mulimuli ane o lea ua toe suia le faaiuga ina ua lafo e Tiumalo le faaaloalo ia Afoa.

 

Na faamaonia mai e ni isi o le afioaga sa i ai i le fono e faapea, na faaoloolo maau fo’i le fetalaiga a Taamu Vaigafa e fia alu i le tofi o le itumalo, peitai o le talitonuga o le afioaga, o le tofi Senatoa i le maota o le Senate e na o tamali’i o le atunuu e au i ai.

 

O le aso Toona’i o le vaiaso nei lea ua faamoemoe e feiloai ai le itumalo o le Maoputasi i le malae i Gagamoe i Pago Pago, mo le faamaoniaina o tofi o le itumalo.

 

I lalo o le Faavae, e tolu tofi senatoa o le itumalo o le Maoputasi i totonu o le maota maualuga.

 

O le isi tofi o lo o tauaveina e le afioga i le alii senatoa ia Faumuina Tagisiaalii o lo o fai ma sui o Aua ma Leloaloa/Atu’u, o le isi tofi o lo o nofoia e le afioga i le Maoputasi ia Mauga Tasi Asuega mo le afioaga o Pago Pago, mo le tofi lona tolu e filifilia mai i Fagatogo/Utulei ma Fagaalu.