Ads by Google Ads by Google

Tofi Kovana Task Force e galulue i le sailia fesoasoani mo le LBJ

A o taumafai ai le maota o sui e tau saili se auala e foia ai le fa’afitauli tau tupe o lo o fa’aauau pea ona fetaia’i ma le falema’i o le LBJ i le taimi nei, na taua ai e le Ta’ita’ifono fou o le Komiti Fa’afoe a le falema’i i luma o faipule e fa’apea, ua mae’a nei ona tofia e le ali’i kovana se Komiti Faapitoa (Task Force) e galulue ma le pulega a le falema’i, i le va’avaaia lea o auala e mafai ai ona maua se fesoasoai tau tupe mo le falema’i.

 

E pei ona taua i ripoti a le falema’i ua mae’a ona tauaao atu i luma o le maota o sui, e silia laititi lava i le $10 miliona le tupe o lo o aitalafu ai le malo i le falema’i talu mai le masina o Fepuari na te’a nei, ma o lo o tupu pea i luga lea aitalafu e le o fa’aitiitia.

 

O le iloiloga a le maota o sui ananafi, sa valaauina lea e le afioga i le ali’i faipule ia Vesi Talalelei Fautanu Jr, o ia fo’i lea o le ta’ita’ifono o le Komiti o le Soifua Maloloina, e fesiligia ai sui o le malo ma le falema’i i se auala e mafai ona faia e foia ai le aitalafu a le malo i le falema’i, peita’i o se itu sa fa’aalia ai e le toatele o faipule le agaga fa’anoanoa i le taeao ananafi, o le le mafai lea ona oo atu sui o le malo sa poloaina e molimau mo lenei iloiloga, e aofia ai le Teutupe ma le Faatonusili o le Ofisa o le Paketi.

 

Na faailoa e Vesi i luma o le komiti le talosagaina o ia e le alii kovana ia Lolo Matalasi Moliga, o le a le mafai ona oo mai sui o le malo e molimau, ona o lo o i ai sa latou fonotaga faapitoa e manaomia le auai o i laua ia e to’alua.

 

E talitonu le Samoa News o le taeao ananafi sa faia ai le fonotaga masani a le Komiti o Tapenaga o le Fu’a, mo le fa’alauiloaina o fuafuaga ua mae’a ona fa’amautu e le Komiti.

 

Na faafetaia e le taitaifono o le komiti faafoe a le falema’i ia Filifaatali Michael Fuiava afioga i faipule e tusa ai o lo latou naunau e saili se auala e foia ai le fa’afitauli o lo o tula’i mai i le falema’i, peita’i o le fesili e tatau ona fesiligia muamua, fa’amata e muta ai fa’afitauli pe afai ae maua se fofo o le fa’afitauli o lo o tula’i mai i le taimi nei i le itu tau tupe.

 

“O le itu lea ua matou talanoa ma le Task Force a le ali’i kovana e ave i ai la matou fa’amuamua, o le sailia lea o se auala e fa’aitiitia ai aitalafu a le malo o lo o i ai i le taimi nei, ae o le fesili, e fa’apefea ona fa’aitiitia aitalafu a le malo”, o le saunoaga lea a Filifa’atasi.

 

Saunoa Larry Sanitoa e fa’apea, o le tulaga o lo o pito sili ona faafitauli i lona manatu, o le tupe o le lafoga o totogi e 2% sa pasia e le fono mo le falema’i, lea o lo o taofi e le malo e aunoa ma le totogiina atu i le falema’i, ae o lea lava o lo o tipi tupe o lafoga a tagata faigaluega uma i le atunu’u.

 

Na ioeina e le Pulesili o le falema’i ia Taufetee John Faumuina le finagalo o Sanitoa, ma ia talosagaina ai loa le maota o sui ina ia fa’ateletelegese sa latou fuafuaga e fesoasoani ai mo le falema’i, ae se’i tau fono muamua le Task Force a le kovana ma sui o le falema’i i le taeao nei e tau saili ai se fofo o lenei fa’afitauli.

 

Saunoa Vui Florence Saulo e faapea, ua tele naua tausaga o fetaia’i pea le falema’i ma fa’afitauli tau tupe, ma ua tatau fo’i ona mautu se auala e foia ai lenei fa’afitauli, e aofia ai le vaavaai e fa’aitiitia totogi o ni isi o tagata faigaluega a le falema’i.