E le o toe umi feuiaiga o lo o faia i le taimi nei ae fa’amautuina loa gaioiga mo le amata fausiaian lea o se falepuipui fou, e pei ona fa’amaonia mai e le Komesina o Leoleo i le vaiaso na te’a nei.

Ae na taua e le tofa Leseiau Laumoli lea ua malolo litaea mai le tele o tausaga sa ia tauaveina ai le tulaga o le sui komesina mo le Matagaluega o Leoleo i le lata i le 30 tausaga, o le fausia ai o se falepuipui fou, “o le a fa’amuta ai le toe tula’i mai o fa’alavelave ua tele tausaga o feagai ma le Matagaluega o Leoleo, o le sosola lea i tua o pagota atoa ai ma le faigofie ona fa’aulufale atu o fualaau faasaina atoa ai ma isi mea e le ta tau ona i ai i totonu o le falepuipui”.

Saunoa William Haleck e fa’apea, “toe pau le la’asaga o lo o totoe i le taimi nei o le filifilia lea o le konekarate latou te fausia le galuega, pe afai e mae’a ona filifilia mai le tauofoga lea ua mae’a ona tu’uina atu i tua”.

Na tauia e Haleck e fa’apea, o le taua o le fa’anatinati o le galuega, o le a mafai ai ona foia le tele o fa’afitauli o lo o maitauina i totonu o le falepuipui i le taimi nei, aemaise lava i le tulaga o le le lava o fale e tuu i ai pagota, ma avea ai ma fa’afitauli i le to’atele o pagota e loka i totonu o le sela e tasi, o se fa’afitauli fo’i o lo o atugalu i ai le fa’amasinoga i so o se taimi e lau ai fa’asalaga i latou e fa’amaonia a latou solitulafono.

Na fa’amaonia mai e le Fa’atonusili o le Matagaluega o Galuega a le malo ia Faleosina Voight, o i latou fo’i ia na tusia le ata o le galuega, o le fausaga o le falepuipui fou e foga fale tasi, ae le foga fale lua e pei ona ulua’i fuafuaina muamua i le asiasiga a le kovana na asia ai le toese i Tafuna i le faaiuga o le tausaga na te’a nei.

Na faamautu mai fo’i e Voight e fa’apea, o le falepuipui fou e pei ona talanoaina, e fausia lea i le va o le falepuipui o tagata matutua o lo o i ai nei, ma le falepuipui o Tamaiti o lo o i tua atu, po o tua teisi atu fo’i o le vaega sa i ai le falesa tuai a pagota sa masani ona fai ai a latou sauniga lotu.

E pei ona silafia, o le asiasiaga a le tofa a Lolo Matalasi Moliga i le toese i Tafuna i le masina o Tesema 2013, e le gata sa tau sailia ai ni auala e foia ai fa’afitauli o lo o feagai ma le falepuipui i le tele o tausaga, ae na faamautuina ai loa fuafuaga mo le fausiaina o se falepuipui fou, lea e fa’atupe mai i le vaega tupe e lata i le $4 miliona mai vaega tupe mo Galuega Tetele (Capital Improvement Project - CIP) o lo o fa’atupe mai e le malo feterale.

O le asiasiga a le alii kovana, lea fo’i na maua ai ma le avanoa mo Tusitala e auai atu ai, sa mafai ai ona molimauina le to’atele naua o pagota e taofia i totonu o le sela e tasi, mai le ta’ito’a 4 i le ta’ito’a 5, ae o sela nei e na o le ta’ito’a 2 lava pagota e mafai ona taofia ai.

Saunoa Haleck e fa’apea, o lo o i ai le faamoemoe afai e maea le tauofoga ma filifilia se konekarate latou te faatinoina le galuega, e tatau ona faia le sauniga e amata ai le fausiaina o le falepuipui fou i se taimi o le masina fou o Aokuso.