Ads by Google Ads by Google

Toe tuuaia Savea ma se tamaitai Asia i ID pepelo

Ua toe molia e le malo le alii faigaluega o le Ofisa o Femalagaaiga o Polone Savea, faatasi ai ma se tamaitai mai Saina o Jin Hua Tong Sullivan i lo la auau faatasi e faia ni gaioiga tau faasese, ina ia maua e ni tamaitai Saina se toalua ni ID e mafai ai ona aumau i totonu o le teritori.

O le lona lua ai lea o mataupu e faatatau i ID pepelo ua tuuaia ai Savea, lea o lo o taofia pea i le toese i le taimi nei, ina ua le mafai ona ia totogi le $20,000 e tatala ai o ia i tua.

I faamaumauga a le faamasinoga o lo o taua ai e faapea, o le mataupu lona lua lenei ua aafia ai Savea.  Ma na amata suesueina lenei mataupu e le alii su’esu’e o Fa’aua’a K. Elisara, ina ua masalomia e ni tamaitai Saina se toalua lo la tauaveina o ni ID pepelo.

Na maua i totonu o faamaumauga komipiuta a le Ofisa o Femalagaaiga, o ID ia sa tu’uina i tamaitai Saina, o ni ID ua maea ona tuuina i ni isi tagata mai fafo.

Ina ua fesiligia le susuga Sam Soliai mai i le Ofisa o Femalagaaiga, sa ia ta’ua e faapea, o le aso 11 o Setema 2011 na ia taulimaina ai ni ID se lua mai i tama’ita’i Saina e toalua o lo o ta’ua, ina ua la tuua le teritori i le taeao mo Samoa, ma toe foi mai ai i le afiafi o le aso lava lea.

Na manino i faamaumauga mai totonu o masini komipiuta, o Liumanu Seumaala, o ia lea o le sponsor a tamaitai Saina ia e toalua, ae ina ua ia fesiligia Seumaala i se isi mataupu i le masina o Setema 2011, sa ia taua ai e faapea, o lo o pisi i le tau faagasoloina o pepa a tamaitai Saina ia e toalua.

Ina ua fesiligia Seumaala e faatatau i lenei mataupu, sa ia taua ai e faapea, o se tamaitai Saina e nofo mautotogi i lona fale, o ia lea o Sullivan, sa talosaga atu ia te ia pe mafai ona ia sponsor ina ni tamaitai se toalua mai Saina o lo o fia ulufale mai i le teritori e galulue i se tasi o faatoaga.

Na faailoa e Seumaala i le leoleo suesue e faapea, na te le iloa pe na faapefea ona vave maua ID o nei tamaitai, ae na pau lava le gaioiga sa ia faia, o le saini o le pemita e malaga mai ai ma tuu atu ia Sullivan, ae na te’i ina ua ia maua le tala, sa la malaga i Samoa i le aso 14 o Setema 2011.

O le mafuaaga lea na ia talosaga ai le sui o le Ofisa o Femalagaaiga i le malae vaalele e taofi ID o tamaitai Saina ia e toalua, lea na toe tuuina atu e le sui o le Ofisa ia te ia, ma ia tuuina atu ai i le alii leoleo suesue sa gafa ma le suesueina o le mataupu.

Na faamaonia e Seumaala e faapea, na ia iloa o ID sa tuuina atu i tamaitai Saina nei, o ni ID pepelo.

Na faamaonia e Savea i le alii leoleo suesue lona mauaina o se $200 i le taimi na pu’e ai ata mo ID a tamaitai Saina ia e toalua.

Na taua e Savea e faapea, na talosagaina e Sullina sana fesoasoani i le pu’eina o ata mo ID a tamaitai Saina ia e toalua, ma sa ia faatonuina ai Sullivan e avatu tamaitai i le Ofisa e pue a la ata, ma avatu faatasi ai ma la tusi folau faatasi ai ma le ta’i $100 a le tagata e toatasi.

Na faailoa e Savea i le leoleo suesue e faapea, o le auala lea na ia faaaogaina e maua ai ID a isi foi tamaitai Saina e toalua, o lona aveesea o le ata o lo o i luga o le ID tuai, ae tuu i ai ata o tamaitai ia e toalua.

Na teena e Sullivan lona tuuina o se $200 ia Savea ma e na te le masani foi ia Savea, ae peitai, o lo o taofi mau Savea, o Sullivan sa tu’uina atu ia te ia le $200.

O lo o tuuaia i le moliaga mamafa o le totogi tupe o se tagata faigaluega a le malo ma ua maea ona tatalaina o ia i tua mai i le falepuipui, ina ua maea ona ia totogia le $5,000 e pei ona faatulagaina e le faamasinoga.

O le susuga Fiti Sunia o lo o tulai mo Sullivan ae o Kimberly Hyde, o lo o tulai mo le malo, ma Michael White o lo o tulai mo Savea.

O Sullivan o lo o tuuaia i le moliaga mamafa e tasi, o lona totogi tupe o se tagata faigaluega a le malo.

Ae mo Savea, o le aso 11 o Fepuari 2013 lea ua faatulaga e toe fofogaina ai lana mataupu i luma o le Faamasinoga Maualuga, i le maea ai lea o lona teena o tuuaiga faasaga ia te ia i le taeao ananafi.