Ads by Google Ads by Google

Toe tolopo iloiloga SIC sa fuafua

mo le polokalame 1602

Ua toe tolopo le iloiloga a le Komiti Suesue a le Senate (SIC) lea na fuafua e faataunuu i le taeao ananafi seia i ai se isi aso, ina ua le atoa le aofai o sui o le komiti e faatautaia ai se iloiloga.

O le iloiloga sa fuafua e fesiligia ai le polokalame lea e taua o le ‘Section 1602’ o loo i lalo o le vaavaaiga a le Faletupe o Atina’e, lea e faatupe mai e le Feterale mo le fausiaina o fale mo i latou e maualalo le tamaoaiga, peitai ua le faataunuuina ona e na o le to’atolu sui o le komiti na faatasi atu.

O sui na auai e aofia ai le taitaifono, le afioga i le alii Senatoa ia Lualemaga Faoa, o le sui taitaifono ia Velega Savali Jr, ma Malepeai Setu. Sa faatasi ai foi ma le loia fautua a le Senate ia Henry Kappel.

Saunoa le afioga Lualemaga e faapea, ina ia tusa ai ma tulafono e faatautaia ai galuega a le Komiti Suesue, e tatau ona atoa le kalama ona faatoa mafai lea ona faataunuu galuega a le komiti, ae talu ai e na o le to’atolu sui ua auai, ua manatu ai le komiti o le a toe tolopo le iloiloga seia i ai se aso.

Na maea le saunoaga a le taitaifono ona ia valaauina lea o molimau sa poloai e oo atu i le iloiloga, o le tofa Lolo Letalu Moliga, o ia lea o le Peresetene o le Faletupe o Atina’e a Amerika Samoa, faapea ai ma Pat Galea’i, lea o loo faauluulu i ai le Ofisa o loo vaavaaia tupe na tuu mai e le feterale e fesoasoani i le toe faaleleia o le tamaoaiga o le teritori (ASESRO).

Na valaau e Lualemaga molimau ina ia oo atu i lalo o le maota fono, ma ia faailoa i ai le mafuaaga ua ala ai ona le faataunuuina le iloiloga a le komiti suesue, lea foi na talia ma le agaga faafetai e molimau.

Saunoa le tofa Lolo, e avanoa lava i latou i soo se taimi e manaomia ai e le komiti mo se isi iloiloga, ua latou sauni fo’i e tuuina mai ni tali e tusa ai o fesili o le a fesiligia ai i latou e le komiti.

Sa faailoa foi e Lolo i le komiti, o le mamalu o le atunuu o loo faatumulia ai i le pito i luga o le maoto fono a le Senate, e le gata o tagata faigaluega a le Faletupe o Atinae’a, ae o nisi o i latou o tagata sa agava’a i lalo o le polokalame o le 1602.

Sa i ai faatasi i le au faalogologo le afioga i le alii Senatoa ia Lemanu Peleti Mauga, lea o loo paga ma le tofa Lolo i le faiga palota tele o loo loma nei.

O le tofa Lolo lea ua faamoemoe e tauva mo le tofi Kovana i le palota o loo loma nei, ua faamoemoe e faamuta le avea o ia ma Peresetene o le Faletupe i le aso 30 Iuni, i le maea ai lea ona tuuina atu o sana tusi faamavae i se taimi e lei mamao atu.

E ese mai ia Lolo ma Pat na poloaina e oo atu e molimau, sa poloaina foi e le SIC le tuuina atu uma o isi faamaumauga e uiga i le polokalame o le 1602, atoa ai ma agavaa e mafua ai ona talia se talosaga a se tasi i le polokalame.

I se pepa o faamatalaga na tuuina atu e Lolo i luma o le Fono i se iloiloga sa faia ai i le tauaofiaga na mae’a atu nei, o loo ia taua ai e faapea, o le polokalame lenei o loo faatupe mai e le malo tele i lalo o le igoa ‘Low Income Housing Tax Credit Program, Section 1602’, ma e tusa ma le $30,778,499 sa tuuina mai mo Amerika Samoa.

O aiaiga o le polokalame, o le 85% o le tau atoa o le galuega e totogi e le polokalame, ae 15% e totogi e le tagata talosaga, ma o galuega uma lava o loo i lalo o le polokalame lenei e tatau ona mae’a a’o le’i tuana’i le aso 31 o le masina o Tesema 2012.