Ads by Google Ads by Google

Toe tolopo iloiloga SIC ina ua le atoa sui o le komiti

E le’i mafai ona faataunuuina le ulua’i iloiloga a le Komiti Suesue a le Senate, le SIC faasaga i le polokalama o le ‘1602’, ina ua le atoa sui o le komiti e mafai ai ona faataunuu le iloiloga.

A’o le’i ta le itula e 9:00 i le taeao ananafi, na faatumulia ai le pito i luga o le maota fono a le Senate i molimau sa poloaina e oo atu mo le iloiloga, faapea ai uo ma aiga.

Na taua e le taitai komiti o le SIC ia Lualemaga Faoa e faapea, e tusa ai o tulafono o lo o faavae ai galuega faatino a le komiti, e tatau ona atoa le kalama e mafai ai e le komiti ona faataunuu ana galuega masani.

“Ae talu ai e le o atoa totino o le komiti e mafai ai ona faataunuuina lenei iloiloga, o lea ou te faamalulu atu ai i le mamalu o molimau sa poloaina e oo mai e molimau, ae o le a le faataunuuina la tatou iloiloga i le taeao nei, ae o le a toe fuafua mo se isi aso,” o le saunaoga lea a Lualemaga.

O sui o le komiti sa auai na aofia ai le afioga Lualemaga, Senatoa Pagofie Fiaigoa ma Senatoa Fuamatu J.V Fuamatu ma le loia a le Senate ia Henry Kappel.

O sui o le komiti e le’i auai na aofia ai Senatoa Velega o le sui taitai komiti, afioga Mauga Tasi Asuega ma Fuata Dr. Tagiilima I’atala.

E tolu aso na fuafua e le SIC e faataunuu ai lenei iloiloga, ma e le i fa’ailoa e Lualemaga se aso o le a toe fa’aauau ai lenei iloiloga.

E toalua ni molimau sa poloaina e le SIC e oo atu ananafi na fesiligia e le Samoa News i ni o la finagalo e tusa ai o le le faataunuuina o le iloiloga, ma e ui e le’i finagalo i laua e faailoa o la suafa, ae sa la taua lo la le fiafia i le komiti ona o le le faataunuuina o le iloiloga sa fuafuaina.

Na taua e le isi o i laua ia, o se tama talavou e faapea, “sa tatau ona fesootai uma sui o le komiti ina ia faamautu la latou iloiloga i le aso (aso ananafi), ina ia taofia ai le ma’imau mai o taimi na matou o mai ai a’o lea ua toe tolo le iloiloga.”

Ae ina ua fesiligia le isi molimau sa na o le ata ma faapea mai lana tala, “ua ou tau fefe lava e fai sa’u tala leaga ua oo mai le taimi o le palota, ae manaia pe a tuu ai pea faapea.