Ads by Google Ads by Google

Toe te’ena Senate tofiga o Dr. Jacinta Galea’i

Na toe te’ena e le Senate i le taeao ananafi ia le tofiga a le kovana mo Dr. Jacinta Galea’i, avea ai o ia ma Fa’atonusili o A’oga, e ala i se palota, 8-6.

E 8-7 le palota sa latou teena ai Dr. Jacinta i le masina o Setema 2011 e ui e toatele e talitonu ua lava ma totoe agavaa o lenei alo o le atunuu e tautua ai i le Ofisa o Aoga.

O ni isi o Senatoa e le i ai ni o latou finagalo na fa’aalia faasaga, sei vagana le fa’aalia o lo latou talitonu i le agava’a o Dr. Galea’i mo le tofiga.

I le fa’agasologa o le iloiloga a le Komiti o A’oga lea na fa’afoeina e le ali’i ta’ita’ifono ia Senatoa Alo Dr. Paul Stevenson, na fa’aalia ai e Senatoa Fuata Dr. Iatala, le toe mana’omia o seisi falea’oga fou i Aunu’u, ae fa’apea fo’i le si’itia o le tautua mo faiaoga ma fanau a’oga, i le tulaga o le soifua maloloina.

Na ta’ua e Fuata, e lua vasega i lea a’oga, o lo o faia i totonu o le fale ta’alo, ona ua le lava potu a’oga.  E 110 le aofa’i o le a’oga, ae na o le to’a 15 faiaoga.  O ni isi o faiaoga e tau savavali atu mai Tutuila ma o se itu o lo o atugalu ai le ali’i Senatoa, ona o le tele o tupe o lo o fa’aalu e nei faiaoga, e tausavaili ai.

Na ta’ua fo’i e Fuata, le tatau ona i ai o ni fale e mafai ona fa’amautu i ai faiaoga tausavali, aua afai ae tulaga fa’aletonu le tau ma taofi le feoa’i o va’a i le va o Aunu’u ma Tutuila, o le a leai ni fale e mafai ona fa’amautu i ai faiaoga mo le po.

Sa saunoa Dr. Galea’i, ua mae’a ona asiasi atu i a’oga i sisifo, ma o le kuata lenei ua ia fa’amoemoe e asiasi atu ai i a’oga i le itu i sasa’e o le motu.

Na fa’aalia fo’i e Dr. Galea’i, ina ua le pasia o ia e le Fono i le tausaga ua te’a, na toe fo’i ma galue i le ofisa o le kovana, ae peita’i, na toe filifilia o ia e avea ma fesoaoani i le Lutena Kovana lea na avea ma fa’atonu le tumau mo le Ofisa o Aoga.

Sa saunoa Senatoa Velega Savali Jr,, ina ua ia asia aoga i Manu’a, e tele se manaoga o lo o i ai.  Ma sa ia fa’aalia fo’i, le tatau ona i ai o ni polokalama a le Ofisa o A’oga mo fanau ua fuafua e fa’au’u i tausaga ta’itasi, ina ia mautinoa e maua ni a latou galuega.

Ina ua fa’aalia e Dr. Galea’i, le lata i le faitau afe, o fanau a’oga e fa’au’u mai i a’oga a le malo i tausaga ta’itasi, na saunoa Velega, o se fuainumera maualuga lea fuainumera, ae le o mautino pe maua ni galuega.

Na saunoa Velega, o le faafitauli lea ua tulai mai i le malo i le taimi lenei, ua tapunia avanoa o galuega pito i luga ina ua leai nisi e malolo litaea, ae ua tapuni atu ai ma avanoa faigaluega ina ua leai ni galuega fou e toe maua mai le malo.

O le isi vaega na fautuaina e Velega o le polokalama o Sikolasipi lea ua maitauina le tele o fa’afitauli o lo o tulai mai ai. Saunoa le alii Senatoa mai Manu’a, o se tasi lenei polokalama o lo o tele se vaega tupe a le malo o lo o alu ai, peitai e le o manino lelei ripoti i tulaga o fanau ma tulaga o sikolasipi, po o ai e agava’a i sikolasipi, o fea e i’u i ai fanau pe a uma a latou aoga.

Saunoa Velega, o tulaga uma ia e tatau ona manino i le ripoti a le vaega o le Sikolasipi, e taua ai le galulue fa’atasi ma le Ofisa o Aoga.

Na fa’aalia foi e le ali’i Senatoa ia   Paogofie Fiaigoa ia ni isi o fa’afitauli o lo o va’aia i a’oga o lona itumalo, e tali tutusa ma fa’afitauli a le a’oga i Aunu’u.

Na ta’ua e Dr. Galea’i, o se tasi o fa’afitauli, e le o lava tupe e fausia ai ni falea’oga fou, peitai o le isi lea fuafuaga ua taulai i ai lana va’ai pe afai ae pasia o ia.

I le faaiuga o le iloiloga na fautuaina ai e Alo Dr. Galea’i, ina ia silasila i nisi o aoga sa fa’aleagaina i le galulolo,  ae o lea e o’o mai lava i le taimi nei o lo o fa’aaoga pea fale tapoleni.

Saunoa Alo, o nisi o taimi ua le lelei ai mafaufau o tamaiti i le aoga ona o le vevela o le faleie ma faa faigata ai ona a’o le ABC a fanau.

Saunoa Dr. Galea’i, o lo o i ai tupe ua maea ona fa’atulaga mai e le malo tele e fausia ai faleaoga o aoga sa fa’aleagaina i le galulolo e pei o le Aoga Tulaga Muamua i Taputapu, Fagasa, Masefau, Afono, Vatia, Aoa ma Tula.

Na faai’u le iloiloga i se tatalo na saunia e Dr. Jacinta, mulimuli ane ina ua faia le palota, sa le’i pasia e le Senate o ia.