O le Aso Gafua o le vaiaso fou lea ua faamoemoe e tatala aloaia ai le toe tauaofiaga a le Fono Faitulafono i lona Nofoaiga lona 32.

O le tauaofiaga masani lenei a le Fono Faitulafono e talanoaina ai nisi o mataupu mai le malo ma le Kovana, aemaise ai le paketi o le tausaga tupe fou, ma le iloiloina o le Tupe Faasoasoa o le Tausaga Tupe 2013 i.

O le Tausaga tupe fou lea ua faamoemoe e amata ia Oketopa 1, pe a maea ona tapunia le tausaga tupe tuai lenei 2012 i le aso 30 Setema.

I se tusi mai i le Fofoga Fetalai i afioga i Faipule, sa ia faamanatu mai ai le toe tauaofia o le Fono i le vaiaso fou.

E le’i maua mai se tulaga i le maota maualuga pe sa i ai se fesootaiga a le alii peresetene ma afioga i Senatoa, mo le toe tauaofiaga mulimuli o lo o totoe nei.

O le tauaofiaga lenei ua maea ona folafola e le alii kovana sili ia Togiola Tulafono, o le a ia toe tuuina atu ai i luma o le Fono pili tupe sa ia faaulu e fesoasoani ai i le falemai, lea e le’i faia ai lava se finagalo o le Senate.

O nisi o pili na taua e le alii kovana o lo o tumau ai pea lona talitonuga e aoga ma lelei mo le falemai, o le pili lea e sii ai lafoga o oloa e pei o le sikaleti, pia ma le ava malosi, atoa ai ma le pili mo se nonogatupe e $10 miliona e faatupe ai le polokalama lea e auina atu ai gasegase i fafo mo togafitiga.

Saunoa Togiola i se tasi o ana polokalama e faapea, o le taua o le sii o lafoga ina ia maua ai tupe mo le falema’i, o le a faa faigofie ai i le atunuu ona aga’i atu e vaai le foma’i ma fai talavai, aua o loo tofu sao tagata uma i le totogiina o le lafoga mo le falema’i, ae o le sii o pili a le falema’i ma le faamoemoe e totogi lava e le tagata lana pili, o le a avea lea ma faafitauli i le atunuu.

I le tulaga o le nonogatupe e $10 miliona e auina atu ai gasegase i fafo mo togafitiga, na saunoa ai Togiola e faapea, o le agaga o le tulafono lea, afai ae pasi ae le Fono le nonogatupe lea ma tuu atu le tupe lea i le falema’i, o le a toe faaluaina le tupe e faaaoga e togafiti ai gasegase i lalo o le polokalame a le Medicare.

Mo se faataitaiga e pei ona saunoa le alii kovana, afai e faaalu e le falemai a le LBJ le $1 e togafiti ai se gasegase, e toe totogi mai e le feterale i lalo o le polokalame a le Medicare le isi $1 e faafetaui ma le $1 lea ua faaalu e le LBJ, lona uiga afai e $10 miliona e faaalu e le LBJ e togafiti ai gasegase, o le a totogi mai foi e le feterale le isi $10 miliona, ma avea ai lea tupe o se tupe e tupu pea mo le falema’i i Fagaalu.